¹ Kidimu emog eninen epwe ne dzug olung: Onkear omog apwe, vuna atodzub, ngwon ne ngie i nkuu inde, ti impu imog ili na weer djum n'ipe n'ote ende. ² Ayind na djim, adzamikinde elie, akem, djwi ayinde n'osayu e lwon. ³ Kidimu emuu diaka ekeampwe n'olung; yenaka, dragona emog e kwi, n'ete eshiambia ti asigi djum, ete ende n'ayaga ashiambia. ⁴ Ojir onde elebin ikab i weer emog ne dzug akab asar, mby aletwomike ne buu. Dragona ayima ne nteang e okear eling ngwur enagn, djwi ntangu esiwur nde mon, ale mon ewo. ⁵ Awur mon ompeam efwete mpea adjiu anda ya vear a buu inkum ti fimbu e ewuu n'ewuo. Mby Nzeam s'aveynde mon ewo, atsa ti nde ne kiti ende ekub. ⁶ Mby onkear akim ne buu e ndzum, n'ondii oyiwong Nzeam djwi na nde, eyalaka nde tii nshuu iwugu imog na nkama ipe n'osom. ⁷ Mby obr o mbaagn s'apwiwo ne dzug. Michel ti banzio inde walwa mbaagn wa dragona. Dragona mpi ti banzio inde walwa, ⁸ kansi wkalenga na biu ve, wakafivea ondii djwi na wo ne dzug ve. ⁹ Mby s'otwomiwo ne buu, dragona eninen, njua entama, eviewo ontshung, satana, ndug wur etsandjim vear a buu, wotwomo ne buu, nde ti banzio inde. ¹⁰ Mby ngyug ne dzug otuba omog o biu etuba wuwun: Evug wean etikum opeane, na biu, na ekub e Nzeam esu, na ekub e Kristu ende; djwi wur eyifugnike atwung asu, wur eyafugnike ne ntang e Nzeam esu na mbiiy na otshuu, watotwomo ngie. ¹¹ Watonunga djwi n'aluung a Mon Imeme, mpi djwi n'otuba e ntiegn iwo, wakaleangaka mpi luzingu ewo ve, wakafiyugaka womo ewa ve. ¹² Wog enagn, olung, ti vear ankum apier n'olung, yiagni n'osiang! Mpay ya buu ti vay! Djwi ontshung atikra etay egnu, ali na nkier entsign djwi ajia ndenden ntangu ende etisatsuga itaang. ¹³ Ntangu emiyen dragona ndenden watotwomo ne buu, asadjiye onkear eyiwur mon ompeam enagn. ¹⁴ Mby wapea onkear owo apabu ape a mpu-mfuru eninen, djwi ayim atsi n'ondii onde ne buu e ndzum, ondii eyopeakawo vim anda ne ntangu emog, ne wantangu entsign, ti ne kati-kati e ntangu, etey na ndjua. ¹⁵ Mby, ndjua asatwomo vay ayim n'odzum onde, epwe kamsi nzey, asabug onkear onagn djwi adzig ne nzey. ¹⁶ Kansi buu eyia nsarisa onkear owo, buu angama odzum onde, amign nzey eyiitwomi dragona yim n'odzum onde. ¹⁷ Dragona ayug nkier nda onkear onagn, asatsa ndwa mbaagn nda vear amuu ayiisatsuga, ali n'okuu e onkear onagn, ya vear awum onkwon o Nzeam mpi ali na ntiegn e Yezu.