¹ Wog enagn, sitisiangagni vii alir otuba o Kristu, sikumagni ne vii akuon bifu, djwi sikwon ntsugagni itsin evuru emuu empa na ntun etshia e ngiwa, e lukwikilu ya Nzeam, ² n'along a mbotika, na ngyab wur mbwo n'ote, na lufutumuku e vear amiwa, na ewu e mvwe na mvwe. ³ Enagn eli vim eyakiesu yug Nzeam atipea mbug. ⁴ Djwi, epikug ata fioti vedjwi na vear ayiyen oveanga mbala emog, ayiyug nsa n'ikab i dzug olung, ayivey ikab i Mpeve-Santu, ⁵ amiyug sa n'otuba owuo e Nzeam na biu eleye ne mby i mvwe , ⁶ ayilog , ata amikea nkum vear a mpa mpi wamikea ntshima itura iwo, djwi ya wo, walekuog Mon e Nzeam ne kulunsi, walopii nsogn. ⁷ Ntangu etsanteng mvuye, amuang vay ne buu, buu atsande mpur vim a mfunu ya wur eyifuy mbeam, alakie mpi otshia e lusakumuna e Nzeam; ⁸ Kansi yug buu elepur atiene na eshung atiene, asishing wo buu enagn, asivey wo nkuu, mby asibuo wo tshia. ⁹ Atwung a ngangn, ata situba oshin onagn, djwi na gnu, silakung vii wuo djwi na evug. ¹⁰ Djwi, Nzeam kaku onshiey ya nde ve djwi asajing otshia egnu, lutondo eyiyegni gnu djwi na dzin inde, n'etshia eyikignu, mpi elekiignu djwi na wa santu. ¹¹ Sileang wur na wur ne kati engu ayii na ngangn etshia e Nzeam djwi owumagni ekaagn egnu tii nsuka, ¹² djwi okwon ndemagni, djwi osalanagni vear ayasavey oleama-nzo e nsilulu, na lukwikilu ti inaagn. ¹³ Nzeam, ntangu eyipinde nsiulu ya Abrama, akasila ne dzin i wur emuu olenga nde ve, asilinde ne dzin i nde ndemie, ¹⁴ ndenden: Vi-a-vii, ayosakumuna me, ayopeame aman etsign n'okuu oyie. ¹⁵ Mby Abrama, ntangu emitsug nde inaagn, s'avii nde nsilulu inagn. ¹⁶ Kansi vear atsawo nsila ne dzin i wur olenga nde, kansi lusilu eli itsin i djwi itsantsug nsuka ne vii akum a vear. ¹⁷ Wog enagn, ntangu eli Nzeam aling nde ngyegne ya vear afuete mvey oleama-nzo nsilulu wayen oshin omiwong nde djwi na wo, s'asilinde , apikug nsogno ve, ¹⁸ djwi ne vii ape epikug nde nsogno ve, eli Nzeam apikug njim ve, ayen su atitepea kikesa biu, ondii omog esizuba su ekug ko na nkir ekaagn eyi tekabinde. ¹⁹ Ekaagn enagn, sili na wo kamsi wur atilogo lungu e moyo, edjwi-djwi mpi e biu, eshwi neti, elengi eleama emidzub wo, ²⁰ ondii oyishwi Yezu djwi na su kamsi na ntelag mbug, nde wur eli Nkum epea empeab otshuag-otshuag kamsi Melkisedeki.