¹ Wog enagn, atwung a santu, gnu vear amivea ikab i dzug, veyagni n'oshin owuo, ntumua ti nkum e wankum e vear apea empeab ne lukwikilu egnu elekiisu etshia ene, ² Yezu, eyitsugike ekaagn ya wur eyotsug n'ondii, kamsi eyiki Moize n'evuru ende enkum. ³ Djwi ayen wo akug ne nkembo emog elengankembo eyike Moize na wo, ata wur eyitwung evuru alenga evuru enagn n'osiang. ⁴ Evuru enkum eli na wur etsantwung, kansi wur etsantwung vim ankum eli Nzeam. ⁵ Djwi na Moize, ayinde n'ekaagn n'evuru e Nzeam opfugn, ayinde wur otshia djwi na mpea ntiegn e vim afuetewo nkab nteang; ⁶ Kansi Kristu ali Mon neti evuru, mby evuru ewo eli sug, enagn ko yug sitikir biu ekaagn eleyen su omwong ene tii nsuka. ⁷ Wog oshin otuba Mpeve-Santu ndenden: "Luo ene, yug otiyug otuba onde, ⁸ oyadzignagni itura ignu ve, kamsi eyikii atea agnu ote biu ne dezer. ⁹ Eyimpii atea agnu mpukumuna djwi na ndir yug asilog me, mby s'ayen wo etshia eme ne mvwe onign. ¹⁰ Ayug me nkier djwi na mdwong aman anagn, mby s'atubime memen: "wali ko n'etura elajingi mbug, watojii mbug ime ve." ¹¹ Asilime na nkier ime memen: "Wapashue n'oyuor ome ve!" ¹² Osugagni, atwung, wur emog apiyi n'etura epwo ve, na etura ntsug, djwi asapea Nzeam e luzingu okwongo. ¹³ Kansi, longagni vii ane gnug na gnug konso eshuu, tii ko eshuu eyatuba wo wuwun: "Luo ene eshuu wo! Djwi wur emog ne kati egnu akazign etura djwi na ndog ne masumu. ¹⁴ Djwi su, simikum vear ali wa Kristu, ko yug sititsug ekaagn tii nsuka kamsi oshin oyibanisu n'itsin, ¹⁵ ntngu emituba wo wuwun: "Luo ene, yug otiyugagni otuba onde, oyadzignagni itura ignu ve, kamsi ntangu eyikii ateagnu ete biu." ¹⁶ Wa nagn emuu eyikii ote biu ne ntangu emishir wo nyug otuba o Nzeam, yug epa wankum eyipwine Ejipiti, wog vear ayike ne mby e Moize? ¹⁷ Mby Nzeam ayug nde nkier mvwe onigndjwi na nagn emuu, yug epa nkier i vear ayikii ote biu, edjuu ewo asakawo log ne dezer? 8 Mby asili nde djwi na nagn, yug epa djwi na vear ayikii eneang ve? ¹⁹ Yenakagni, wean wakashue ve djwi na ote biu ewo.