¹ Ogniang, lukwikilu eli ekaagn e biu ne vim eleang wur aviy, elayegne vim apiyen wo. ² Antsuru aviy wo ntiegn ewuo ko djwi na lukwikilu eyiwo na wo. ³ Eli ko djwi na lukwikilu mby s'ajii su susun Nzeam akinde vim ankum n'otuba onde, djwi sijii susun vim ayen su na vy, wakakie wog na vim apiyen su ve. ⁴ Ko djwi na lukwikilu, Abel s'apinde empeab elenga empeab e Kaino na wuo; ko djwi na lukwikilu ewo Nzeam s'oyen nde ali wur ewuo, s'avey nde makabu inde, ko djwi na lukwikilu ende eli tii luo ene Abel alatuba, ata amiwa. ⁵ Eli ko djwi na lukwikilu s'alimiwo Henoki, otum wo ne dzug djwi akawa, Nzeam wur eyolimi djwi wakoyen, djwi apikiwo ntiegn djwi na nde ne nteang e Nzeam wuwun ali wur ewu. ⁶ Djwi, yug lukwikilu kaku ve, epakug ya nde ve na ngya wuo ne nteang e Nzeam; djwi ekug wuo wur elevangi mbeama na Nzeam adjir ndenden Nzeam aliko, atsande mfuta vear atsonding nde. ⁷ Eli ko djwi na lukwikilu, Nzeam s'akabinde Nowa vii ayii watoyen ve, s'alemfukinde na womo, mby s'atwung nde ashwa n'abaya, djwi na mvuga vear opeang onde; ko djwi na lukwikilu enagn s'abag nde ewu e vear a buu, Nowa s'asande vey oleama-nzo na lukwikilu ende oviewo wur ewuo. ⁸ Eli ko djwi na lukwikilu, Abramas'alemfukinde, ntangu elelingikinde ondii esisande vey, s'alekienikinde apijia etay nge eletshinde ve. ⁹ Ko djwi na lukwikilu s'atshinde mpier ne buu e nsilulu kamsi buu angingien, s'apierikinde ne mvurui kapo,na Izaka na Yakob, wo vear avey mpioleama-nzo e nsilulu inagn. ¹⁰ Ogniang, akwungikinde wiya emitwung wo itsin evuru e biu, evuru eli Nzeam ndemie wur efuete ntwung wog. ¹¹ Eli djwi na lukwikilu, Sara ndemie, ata mvwe inde ayiwo itilenga, s'akug nde mvea mon ti ankeana, djwi adjiir nde n'ekaagn e wur eyopii elaga enagn. ¹² Wog enagn, yim ya emog eyi djuung itilem, ankena entsign wamisawur kamsi weer ne dzug, kamsi zelo ili nikri i nzey eli kaku wur esikug na ntanga ve. ¹³ Wankum wamiwaka ne kati e lukwikilu, wakavea ata vim ayapiwo elaga ve; kansi ayen wo vii awo, wapea mbea ko etey, ajiwo wuwun wali angingien mpi waleleg ne mbug ne buu ene. ¹⁴ Vear atuba oshin onagn elakab wuwun waleling buu e mpier. ¹⁵ Yug wayi na mfunu enkea etay eyim wo, anakeawo ntshim. ¹⁶ Kansi opeane, waling buu emuu ewuo, eling ntuba buu eli ne dzug. Wog enagn, Nzeam apiyug nsogn ve djwi wovii Nzeam ewo, djwi amiwong wiya emog djwi na wo. ¹⁷ Djwi na lukwikilu Abrama s'apinde Izaka mon nde emog n'empeab, eyiviy nde n'elaga eyopii nde, ntangu eyotesi Nzeam yug asinunga nde, ¹⁸ eyokabinde ndenden: Izaka wur eyopea ankeana. 9 Abansikinde ndenden Nzeam ali na biu, ata na nkea mbiya vear n'ewa, asikeande ngyen mon nde. ²⁰ Eli na lukwikilu Izaka asakumuni nde Yakob na Ezau, djwi na vii aya ne mby i nshuu. ²¹ Eli djwi na lukwikilu, ntangu eyi Yakob aling ngwa, asakumuninde aman a Yozefo emog-emog, afukimina Nzeam, abeam djuung n'ikom n'ikom inde. ²² Eli djwi na lukwikilu, ntangu eyi Yozefo aling ngwa, s'atubinde djwi na oshin oyapue aman Israel n' Ejipiti, s'akabinde na mvey viyu inde ²³ Eli djwi na lukwikilu, ntangu eyiwur wo Moize, mea nde ti tea nde s'oziy wo ngwon isar n'evuru, djwi ayen wo wuwun ali ntsa n'elung, wakalur womo otuba e vuy ve. ²⁴ Eli djwi na lukwikilu, ntangu emikum Moize intsuru, akafileangaka ve wovii mon e mon onkear e Falao, ²⁵ s'aleang nde wopii mpay oshin omog ti vear a Nzeam kansi epa ayii n'osiang enkie masumu ve, ²⁶ avey nde nsogn i Kristu kamsi otsun omog oninen elenga iteang ili n'Ejpiti, djwi vy ande ayenikinde ko ifutu iyavey nde. ²⁷ Eli djwi na lukwikilu s'alim nde n'Ejipiti, akayug womo ve na nkier i vuy, djwi akum nde eutra biu, kamsi wur eyiyenike wur epiyen wo na vy. ²⁸ Eli djwi na lukwikilu s'akinde pake, mpi ajem nde aluung akakir aman a nsom eteang ne kati aman Israel. ²⁹ Eli ko na lukwikilu s'abag wo nzey e kwi kamsi ondii o ngiyum, kansi aman Ejipiti enaleg wo, s'awiwo wankum ne vay. ³⁰ Eli djwi na lukwikilu, epiy eyidjing Yeriko s'alog wo ntangu emitshim wo nshuu ishiambia. ³¹ Eli djwi na lukwikilu Raaba eyii onkear o nduma s'akawande nda vear ote biu, djwi avey nde vear ayitum wo na ndiir wiya, avey nde wuo n'evuru ende. ³² Nge emuu esifitubame? Djwi mpayia na ntangu esituba me djwi na Gedeon ve, djwi na Baraka, djwi na Samsoni, djwi na Jefte, djwi na Davidi, djwi na Samuele, ti wa ngunsa, ³³ djwi na lukwikilu ewo, anungi wo mbeagn wa buu imuu, akiwo vii a masonga, aviy wo vii ayakabiwo ne nsilulu, atshung wo edzum e wa ntambu, ³⁴ adzum wo tshia, wavug n'ewa enadjag wo n'empien e vur epe, wavug ne wa nkeang iwo, ayiwo na biu ne mbeagn, ayernkuu angingien s'alurikiwo. ³⁵ Ankear s'ayen wo edjuu atwung awo ntangu eyibiy wo n'ewa; amuu s'atshiwo ne mpay i mvwe na mvwe, wakaleang avug wo ve, djwi wakey mbiy wuo-wuo n'ewa; ³⁶ amuu s'ayuikiwo two, wavey itii na akoy, watshung nkori watwomo ne bolog; ³⁷ wadjag n'atari, wabag djuung iwo na siy, wapea mpay eshin n'eshin, wadjag n'empien e vur epe, alekienikiwo etay n'etay, aluer wo mpuy ameme na mpuy i mbur, wasasugn opu-opuu, mpay eshin n'eshin, ³⁸ buu ekakug djwi na wo ve, walekikien n'eshwi ti n'embimi, ne wugu atari ti ne buu. ³⁹ Vear anagn ankumayipiwo ntiegn djwi na lukwikilu ewo, wakavea vim ayitubi wo djwi na nsilulu iwo ve, ⁴⁰ Nzeam s'amiwong nde vim emog elenga wuo djwi na su, djwi wakum n'ondii owuo yug kaku su ve.