¹ Kumagni vear alesedjii Nzeam, kamsi aman ali Nzeam amaleang wuo-wuo; ² kienagni na ngangn ne mbanu e Kristu eyiteleang nde, s'apinde djuung inde ndemie ya Nzeam djwi na su kamsi makabu na empeab e nsuu e wuo. ³ Kinduma, ata vii a mbin, vear aleang ko waviy entsign, vim anagn apikug ngya ne kati egnu ve,, wasantu ekug wayii oshin onagn. ⁴ Wakwon ngyug otuba ognianga vear, otuba e buzoba, ata nginu ipwo, vim epikug wo nkie ne vy a vear; wuo wayugike ko nsag-na-viye ya Nzeam. ⁵ Djwi, jiagni wuo, kaku nduma emog ve, wur embin, wur eleang ko aviy entsign, nding ntuba wur e nziam e biteke, eyavey oleama-nzo na ekub e Kristu na e Nzeam. ⁶ Wur apodjimagni ve n'otuba e mpama-mpama, djwi nkier i Nzeam atsawo ngya ya aman ote biu ko djwi n'oshin o vim anagn. ⁷ Oyatshibagni ata vim emog ti wo ve. ⁸ Nteang-nteang ayikignu ne mpib, opeane otikumagni ne mwinda ne dzin i Nkum. Kienagni kamsi aman ali ne mwinda! ⁹ Djwi, mbeam i mwinda eli na nkie iwuo n'oshin onkum, lunugnu ti masonga. ¹⁰ Liragni vim eli wuo ya Nkum; ¹¹ oyakiagni etshia e mpib ve, kansi bagagni wo ewu. ¹² Djwi eli nsogn na ntuba vii awo atsawo nkie n'oziy; ¹³ kansi inkum itsawo nkie, atsawo nkeampwe ne mbii enkum, djwi vii ankum etsawo nyen eli yelee. ¹⁴ Wog enagn wamituba wuwun: "Biy, yie wur eli ne lwong, biy ne kati e vear amiwa, mby Kristu asoyegne nde mwinda." ¹⁵ Osugagni, olekienakagni na waang, kansi epa kamsi ibunu ve, kamsi ankea waang; ¹⁶ keantshumagni ntangu, djwi nshuu itikum iwpo. ¹⁷ Wog enagn, oyayiagni kamsi vera a mpama ve, kansi ekug ojiakagni luzolo e Nkum. ¹⁸ Oyayuyagni veana ve, enagn eli kinduma. Wuo oyuragni na Mpeve; ¹⁹ sulakagni ngug na gnug ne wa lim, ne wa nkunga i Mpeve, shuyagni wa lim inagn n'itura ignu inkum djwi na mpea Nkum kiese; ²⁰ peagni Tea Nzeam nsag-na-viye ntangu enkum, djwi na vim ankum, ne dzin i Nkum esu Yezu-Krsitu, ²¹ olemfukagni gnug na gnug na womo e Kristu. ²² Okear na okear alemfuki ya wum nde kamsi etsande ndemfuka ya Nkum; ²³ djwi ompem ali nkum e wear nde, kansi Kristu ali Nkum e evuru e Nzeam, eli djuung inde, djwi nde wur eyovugi. ²⁴ Oshin olemfuka evuru e Nzeam ya Kristu, ankear mpi ekug walemfuki ya awum awo ne vim ankum. ²⁵ Ampem, wur na wur aleang wear nde, kamsi Kristu eleang nd evuru e Nzeam, apiinde djuung inde djwi na evuru e Nzeam, ²⁶ djwi ekum e santu ne ntangu osuy nde, ne ntangu oyog nde na vay e otuba onde, ²⁷ djwi apur ne nteang ende, evuru e Nzeam e nkembo, eli kaku ata itono ve, kaku ognugn ve, kaku ata vim eli oshin onagn ve, kansi evuru e Nzeam e santu, kaku opwuo. ²⁸ Wum afwete ndeang wear nde oshin onagn, kamsi djuung inde ndemie. Wur eleang wear nde, aleang djuung inde ndemie. ²⁹ Djwi, kaku wur emitun djuung inde ndemie ve, kansi aliy djuung inde, alawong wuo-wuo kamsi etsankie Kristu djwi na evuru e Nzeam, ³⁰ djwi su, sili ilim i djuung i nde. ³¹ Wog enagn, ompeam ayalim nde n'opeang e teande na meande, atshi djuung nda wear nde, mby wape wakum djuung imog. ³² Ene eli oziy eninen; yug, ntuba ngean, eli oshin oli Kristu ti evuru e Nzeam. ³³ Wog enagn, wur na wur ne kati egnu aleang wear nde kamsi djuung inde ndemie, onkear mpi alemfuki ya wum nde.