1 Saulu aleang nde oshin oyidjag wo Etiene. Eshuu enagn, s'abaniwo mpea mpay ya vear a evuru e Nzeam e Yeruzalem; mby walongoki inkum s'apagn wo ne Yudea ti ne Samaria, wasasugn ko wantumwa. ² Vear a itura iwuo s'apfugn wo Etiene, woliye entsign. ³ Saulu akiinde ipwo entsign ya vear a evuru e Nzeam; aleshwikinde evuru n'evuru mbyakmikinde ti ampeam ti ankear, djwi atsug ne bolog. ⁴ Kansi, vear ayipagn etay n'etay alelongikiwo otuba o Nzeam. ⁵ Filipu akra ne wiya enen e Samaria, s'akabikinde djwi na Kristu. ⁶ Oluy o vear anagn, ntangu eyiyugkiwo mpi eyiyenikiwo bidimu iyiikike Filipu, s'aveyikiwo vii ayitubikinde. ⁷ Vear entsign ayiike na wampeve ipwo, avugikiwo mpi wampeve inagn alepwikiwo, iletsug elie; ata vear ayibeamikiwo mbwo na nkuu avugikiwo. ⁸ Osiang oninen ayiwo ne wiya enagn. ⁹ Ne wiya enagn, ayikiwo na wur emog dzin inde Simoni, alekiikinde ilog; vear a Samaria ayenikiwo ngituka entsign, oyenikiwo kamsi ali wur eninen. ¹⁰ Vear ankum a Samaria, bana n'ilieng tii intsuru oyenikiwo wur enen; atubikiwo wuwun: "Wur ene ali n'ekub e Nzeam, wur eviewo nsuka na biu." ¹¹ Oyugikiwo, djwi bana ntama ayenikiwo ngituka n'ilog inde. ¹² Kansi, ntangu emidjir wo ya Filipu, wur elelong vii a ekub e Nzeam, mpi ne dzin i Yezu-Krisyu, s'aveywo mbotika, ampeam ti ankear. ¹³ Ata Simoni ndemie mpi, adjirnde; emiveynde mbotika, akafinamaka nda Filipu ve, mpi ntangu eyiyenikinde bidimu, ayenikinde ngituka. ¹⁴ Opeane, emiyug wantumwa eyike ne Yeruzalem wuwun Samaria watiyama along a Nzeam, mby s'atumiwo Petelo ti Yoane. ¹⁵ Ntangu emikum , wasama djwi na wo, djwi wavey Mpeve-Santu. 16 Djwi ne ntangu enagn, Mpeve-Santu ayiwo atokri ntete ve ata na wur emog; ayiwo wamivey ko mbotika ne dzin i Nkum Yezu. ¹⁷ Mby Petelo ti Yoane wayab mvwo, s'aviywo Mpeve-Santu. ¹⁸ Ntangu emiyen Simoni ndenden vear wativey Mpeve-Santu ko ne mbwo imiyab wantumwa, s'apiinde ekri. ¹⁹ Atuba ndenden: "Ompiagni mpi ekub enagn, djwi wur enkum esiyabme mbwo, avey Mpeve-Santu." ²⁰ Kansi Petelo okera ndenden: "Tshwag owe ti ekri eyie, djwi obansa yiyen atsawo ntshum ikab i Nzeam n'ekri. ²¹ Kakuyie ata na vim, ata n'ikab isiveayie ne vii ane ve, djwi etura eyie epa eli wuo ve ne nteang e Nzeam." ²² Tshima etura, lim n'ipwo ili n'etura eyie,, mpi sama Nkum djwi ololuli nginu ipwo ili n'etura eyie. ²³ djwi ndayen oli na ndikila emog e oluu, mpi ti eshing e masumu. ²⁴ Simoni akeara ndenden: "Samagni Nkum djwi na me, djwi vii amitubagnu enagn ekwon nkum ya me." ²⁵ Petelo ti Yoane, ntangu emishir wo mpea ntiegn n'otuba o Nkum, ntangu emishir wo ndong along, s'akey wo ntsa Yeruzalem, walelong ne wa wiya i Samaria. ²⁶ Opeane wanzio e Nkum atuba ngean nda Filipu: "Yima, tshwag etay epwe vuna, ne mbug eyim Yeruzalem emitsa Gaza, (Mbug ewo eli ne buu e ndzum.) ²⁷ Ayima s'akien nde. Ayen wur emog otshia e Etiopia, nkum eninen e Kandasi, vuy e onkear e Etiopia. Ayiinde wur eyiwumike vim ande ankum. Atshinde Yeruzalem djwi na mfukimina. ²⁸ Elekeyikinde, atigneme ne char, aletangi onkeana e ngunsa Ezai. ²⁹ Mpeve akaba Filipu: "Tshwag mbeama na char enagn." ³⁰ Mby Filipu atsa eveang etay ende, ayug atanga onkeana e ngunsa Ezai, atuba ndenden: "Owung njia vii atanga yie?" ³¹ Wur e Etiopia okeara ndenden" Asijiame oshin onkagn yug kaku wur ensarisa ve?" Avie Filipu na mvean, wagnemi wape ne char. ³² Odii owo eyitanginde etuba ngean: "Ovariwo kamsi imeme eletshiwo ndjag n'isay, kamsi imon imeme ipitubi ne nteang e wur obag viey, akafingma ata odzum ve. ³³ Ne nsogn eyopiiwo, wakafibag ewu ende ve. Nagn eyasatuba na aman ande ayasayia mby? djwi watitsug nsuka ne luzingu ende ne buu." ³⁴ Wur e leta enagn atuba nda Filipu ndenden: "Motoyue , ene ngunsa alatuba djwi na nagn?" Eli atuba djwi na nde ndemie go djwi na wur emuu?" ³⁵ Filipu okeara, s'abaninde n'ondii oyiitangi nde enagn, otendula oshuong o Yezu. ³⁶ Ntangu eletshikiwo ne mbug, wayen vay. Wur e leta enagn (Eunuque) ndenden: "Yen vay awean, nge esikwon djwi mvey mbotika?" ³⁷ Filipu ndenden: "Yug odjir n'etura eyie, kaku vim ekwon ve." Wur e leta enagn ndnden: "Ndadjir memen Yezu-Kristu ali Mon e Nzeam. ³⁸ Mby wur e Etiopia ashem char, wakra wape ne vay, mby Filipu apea wur e leta enagn (eunuque) mbotika. ³⁹ Ntangu emipwewo ne vay, Mpeve e Nzeam avara Filipu, wur e letaenagn akafoyen ve. S'aletshikinde ne mbug ende n'osiang enkum. ⁴⁰ Kansi Filipu ayiampwe n'Azote. Atear buu enagn enkum mpi alelongikinde ne wa viya inkum nenen tii ne Sezare.