¹ Nkum ewa nganga-Nzambi atuba ndenden: "Ene eli vi-avii?" ² Etiene akeara ndenden: "Atwung na wa tea, yugagni! Nzeam e lokumu apwinde ya teasu Abrama ntangu eyikinde ne Mezopotamia, ne nteang entsa mpier ne Sharan; atuba nda nde ndenden: ³ "Lim ne wiya yie, nam ti atwung ayie, tshuag etay esokabame." ⁴ Mby, alim ne buu e Shalde atsa mpier ne buu e Sharan. Yim kog, ntangu eyiwi tea nde, Nzeam s'otum nde ne buu elignu opeane. ⁵ Akopea ata ondii onde ndemie ve, ata ondii ositsug nde ekuu. Kansi asilinde, (ne ntangu Abrama akayia ata na mon ve) ndenden ayapeande buu ene ya ankeana ande ayasayia ne mby ende. ⁶ Nzeam atubinde ngean: ankeana ande ayatsawo ne buu angingien, ayakum wo ampfumi; ayapeawo mpay i mvwe nkama inign. ⁷ Nzeam ndenden ayabag me ewu e buu enagn eyayia wo ampfumi neti, ne mby ewo, ayatsawo mfukimina me n'ondii onagn." ⁸ Mby akie alien nda Abrama djwi na mbag djuung aman ampeam, ne nshuu iniani, Izaka s'ayinde tea e Yakob, obag djuung, Yakob s'ayinde tea e aman ampeam djum n'ipe. ⁹ Aman anagn ayiwo na kimpala wa Yoefo, wosar, s'ovariwo ne buu Ejipiti, kansi Nzeam ayinde ti nde, ¹⁰ osarisinde ne mpay inde inkum, opea ngrasia ti waagn ne nteang e Faraoni, vuy e Ejipiti. Faraoni s'otsug nde nkum elir Epjipiti ti evuru ende enkum. ¹¹ Nziya eyia ne buu enkum e Ejipiti, ti ne buu e Kanana; atea asu wakayiaka na vim anda ve. ¹² Kansi ntangu emijia Yakob ndenden n'Ejipiti eli na ble, s'atum nde atea asu mbala e nteang. ¹³ Mbala ozole, Yozefo s'amoniki nde ne nteang atwung ande; enagn ondii oyijii Faraoni okuu o Yozefo. ¹⁴ Yozefo atum atwung ande na nkaba teande djwi aye Ejipiti, ti vear openg ond enkum: ayiwo vear oshiambia n'itean. ¹⁵ Yakob akra Ejipiti, s'awinde mpiog, ti atea asu. ¹⁶ Avariwo, atshiwo ampfugn ne Sishem, n'aluma ayishum Abrama n'ekri ya aman a Hamor ne Sishem. ¹⁷ Elag'a eyipii Nzeam djwi vii ayitubinde nda Abrahm ekug , ayiwo etivang'a , aman wawur, wakum entsign ne buu e Ejipiti, ¹⁸ ti ko eyishui vuy emuu n'ekub, nde akajia Yosefo ve. ¹⁹ Vuy enagn s'adjimikinde vear a su ,apikinde wa tea su mpay, djwi wasafang'a aman a wo walewike. ²⁰ Ne nshu enagn ko s'awur wo Moise, ayinde entieng e mon ne vy a Nzeam. wowung'a nguon isar n'evuru e tea nde. ²¹ Ntangu emotsawo mfang'a mon e Faraoni onkear s'ovey nde ,s'atsinde ongung'a kamsi mon nde. ²² Moise olong wo ne waagn enkum e vear a Ejipiti, ayinde biu n'otuba ti n'etshia. ²³ Ntangu emikug nde mvuye onign , n'etura e nde ndenden ekug nky ntsa ntean atwung a me , aman a Israel. ²⁴ Ayen mon emog e Israel walotue ya mon e Ejipiti, ashue etay e otwung'o nde, anang mon e Ejipiti enagn. ²⁵ Abansikinde ndenden otwung nde ayajia ne mbuo i nde , Nzeam ayavug'a nde, kansi wa kajiaka ve. ²⁶ Mpimpign enagn , ntangu emiyia nde n'ondii oli atwung a nde, ayen y'ashia, akea nsangisa wo; ndenden : Djwi na nge ekeagnu mpea mpay gnu na gnu epa oliagni atwung ve? ²⁷ Kansi emog eyipike otung nde mpay, nda Moise ndenden : Nagn e motsug nkum su mpi wur esamisi vii a su? ²⁸ Oling ndjag kamsi edjag yie mon e Ejipiti lii ? ²⁹ N'otuba enagn , Moise s'akim nde . S'akum nd' ongingien ne buu e Madiani, mpiog s'awur nde aman ape ampeam. 0 Ne mby e mvuye onign, wanzio emog opwinde n'oshui e ombim e Sinai, n'ekb e etshia n'oshung. ³¹ Moise ayen tshiya, aen ngituka; Ntangu elevang 'i nde djwi na ndir , ayug otuba e Nkum epwe wuwun: ³² "Ndi Nzeam e atea yie , Nzeam Abraham , e Izaak, mpi e Yakob." Moise ekukuma eyo vey akafikug na ndir ve. ³³ Nkum okaba ndenden : lima antum ali ne nkuu iyie, djwi ondii oli yie ene eli buu e santu. ³⁴ Ntiyen mpay i vear a me ali n'Ejipiti. Ntiyug itara wo , mby ntikr djwi m'avug'i. opeane , tshuag ; ndotum n'Ejipiti. ³⁵ Ko Moise ene eyitun wo wuwun: nagn emotsug nkum na wur ebag vii a su? Ko ndug emitum Nzeam kamsi nkum na wur elima vear ne mfumi. Nzeam otumi nde ne ewuo e wanzio eyimoniki na Moise ne kati o oshuii. ³⁶ Eli ndug, wur eyapur n'Ejipiti, eyikie bidimu , ne nzeyi e kui, ti n'oshui wakie mvuye onign. ³⁷ Eli ndug Moise , wur eyikabi aman a Israel ndenden ; " Nzeam eyapur nde , ne kati e atwung a yie ,ngunsa emog kamsi me." ³⁸ Eli wur ene eyiyii ne ngnan vear, n'oshui ti wanzio eyitubi na nde n'ombime e Sinai . Ndug wur yiyii ti wa tea su; wur evii otuba e luzingu djwi na tepea su. ³⁹ Ndug wur e atea su wakaleang ndemfuka wa nde ; wo fang'a mpi watshima itura i wo etay e Ejipiti. ⁴⁰ Ne ntangu enagn ,watuba na Aoroni : esekii wa Nzeam esikienaka na nteang esu, djwi , Moise eyipur vear ne buu e Ejipiti, sipijia ve oshin onkagn emikum nde . ⁴¹ Mby, wapea imon i ngombe, wakie empeab djwi na biteke, mpi wyen osiang djwi na etshia emikiewo ne mbwo iwo. 42 Kansi Nzeam s'asianginde, djwi wasafukimina weer ne dzug olung, oshin oifugn wo n'enkeana e wangunsa wuwun: "Aman Israel, nge wagnam iyidjagikignu ti empeab eyikikignu mvwe onign ne buu e ndzum, ayiwo djwi na me? ⁴³ Ajirgnu itsug i Molok, ti weer e nzeam e Remfani, vim ayiikignu anagn djwi na mfukimina. Wog enagn, ayovaragnime etey na Babilonia." ⁴⁴ Ateasu na itsug evuru e ntign ne buu e ndzum, oshin oyitum Nzeam ntangu eyitubinde nda Moize denden afwete nkie ko oshin emoyegne nde. ⁴⁵ Enagn wog itsug iyivari ateasu n'ekien ewo, ne buu esu ti Yozue. Enagn ayiwo ntangu eyiveywo buu e empaagn ntangu eyakmi Nzeam ateasu watoshwi ntete ve, tii ko ne nshuu iyii David. ⁴⁶ David s'aviynde ngrasia ya Nzeam; s'awugninde na ntwung evuru djwi na Nzeam e Yakob. ⁴⁷ Salomoni s'atwung nde evuru ewo. ⁴⁸ Kansi nde Nzeam eli ne dzug apitsumpier ne mvuru itwung wo na mbwo ve; oshin oyitubi ngunsa ndenden: ⁴⁹ "Olung eli nkway eme, buu eli ondii emearame. Evuru nge esintwunga gnu, ata ondii esiyorakame eli nonkagn? 50 Nkakie vim anagn n'ewuo eme ene?" ⁵¹ Vear awo ane, na itura biu, atiinkna! Oletunagni ko vii a Mpeve-Santu; olekiagni ko vii ayikii ateagnu. ⁵² Ngunsa nagn eli ateagnu wakopea mpay? Adjag wo wa ngunsa iyiyii ne nteang e wur ewuo ene, kansi ntangu ene, gnu mpi, omikumagni vear alosarnde, alodjag nde, ⁵³ gnu vear ayiivey nsiku iyiiki banzio, kansi okakiragni nsiku iwo ve." ⁵⁴ Ntangu emiyug wo vii anagn, s'ayug wo nkier n'itura iwo, watsug agnere djwi na Etiene. ⁵⁵ Kansi nde, emiyuo nde na Mpevi-Santu, alir ko dzug tii, ayen nkembo e Nzeam. Ayen Yezu atiyima ne wum ewuo e Nzeam. ⁵⁶ Etiene ndenden: "Yenagni, ndayen olung otingam, mby Mon-Wur atiyima ne wum ewuo e Nzeam." ⁵⁷ Kansi vear ayii ne mfug enagn s'atsug wo elie, watshung atii awo, satshiwo ognuna wankum. ⁵⁸ Wovara nelien e wiya enen, mby s'obugikiwo atari. Vear ayivey wo ntiegn wasakey ileama iwo ne nkuu i mon onkwo emog dzin inde Saulu. ⁵⁹ Ntangu eyibugikiwo Etiene atari anagn, nde asamikinde ndenden: "Nkum Yezu, vey mpeve eme." ⁶⁰ Ntangu emifukama nde, adzama na biu ndenden: "Nkum, oyalogo disumu ene n'ote ewo ve. Emishir nde ntuba , s'avurnde."