¹ Ntangu enagn, isuu i wa longoki ilevean ko vean, mby wa Yuda eyitubike etuba e Greki s'agnikiwo na vii a wa Yuda e Israel djwi wakapeaka wa nsakwe iwo vim anda ayikabulikiwo konso eshuu. ² Mby wa ntumwa djum n'ipe inagn s'aviiwo oluy e wa longoki inkum, wuwun: "Epa eli wuo ve sisasugn along a Nzeam djwi siye nkabula vim anda ne mesa. ³ Wog enagn, atwung, sonagni ne kati egnu ampeam ashambia ali na ntiegn ewuo, wamijuo na Mpeve-Santu, sapii otshia onagn. ⁴ Mby su sisakie ko otshia e bisamu na along a Nzeam." ⁵ Vear ankumwaleang nginu inagn. Wason Etiene, wur eyii na lukwikilu e biu ti Mpeve-Santu, Filipu, Prokore, Nikanor, Timoni, Parmenasi ti Nikolas yuda e Antioshi. ⁶ S'ajiwo ne nteang e wa ntumwa, wasama djwi na wo mby wayab mbwo n'ete. ⁷ Otuba o Nzeam alepagnikiwo etay n'etay, isuu i wa longoki ilega mvean ne Yeruzalem. Ti wa nganga-Nzambi entsign wadjir mpi. ⁸ Mby, Etiene wur eyii na ngrasia entsign ti biu o Nzeam, akikinde vii a ngituka ti bidimu ne kati e vear. ⁹ Kansi vear amuu ayike ne sinagoga eviewo sinagoga e vear apa ali ampfumi e wa Sirenien ti e wa Alexadrien, ti amuu a Silisi na Azia, s'ayimiwo. vear anagn atsugikiwo esiy waEtiene. ¹⁰ Kansi wakakugaka na ntiegn na Mpeve eyike ya nde na ntuba ve. ¹¹ Mby s'apiwo vear amuu ekri djwi watubi wuwun: "Sitoyug atwe Moize, atwe ti Nzeam." ¹² Wakie ontshiey ya vear, antsuru na wa long i nsiku ti vear anagn wosamisa, wotshung s'ovariwo ne nteang e ewi e ankum awo. ¹³ Wapur wa ntiegn oyang wuwun: "Wur ene apisiangi ve na ntwe ondii o santu mpi na wa nsiku. ¹⁴ Djwi sitoyug atuba ndenden Yezu e Nazarete enagn, ayabvuo nde ondii one, ayasogno nde na wa nsiku iyitepii moize." ¹⁵ Wankum eyike n'ewi enagn, ntangu emisiang wo vy na ndir Etiene, wayen elung ende etikum kamsi wanzio.