¹ Petelo nda Yoane ntangu eyitubikiwo ya vear oshin onagn, wa nganga-Nzambi, nkum e evuru e Nzeam na wa Saduse wayia, ² ayen wo epwo n'along ayipiikiwo ya vear n'oshin oyikabikiwo wuwun Vear ayafutumuka wo ne kati e bafwa djwi na Yezu. ³ S'atshung wo, watwomo ne bolog tii ko mpimpign enagn, djwi ayiwo epiyekwo. ⁴ Kansi vear entsign eyiyug otuba ewo adjir wo, isuu i vear avean wo etitign e vear awugu atean. ⁵ Mpimpign enagn, ankum a wiya, antsuru ti wa long i nsiku s'asangiwo ne Yeruzalem, ⁶ na Ana, nkum e wa nganga-Nzambi, Kaifa, Yoane, Alexandre ti vear amuu ankum ayi ankum a nganga-Nzambi. ⁷ Watsug Petelo ti Yoane ne ngnina ewo, mby s'ajwikiwo wuwun: "N'ekub enagn, mpi ne dzin inagn emikiegnu vii anagn?" ⁸ Mby Petelo, ntangu emiyuo nde na Mpeve-Santu, nda wo ndenden: "Ankum a wiya ti antsuru Israel, djwi otiyueagni vear lwo ene djwi na iwuo iyiikisu djwi na wur e nkeang, djwi sokabagni oshin oyivug nde, ¹⁰ jiagni gnankum, na vear ankum Israel wajii! Eli ne dzin i Yezu-Kristu e Nazarete eyikwog gnu ne kulunsi, Nzeam okeynde ombiya ne kati e bafwa, eli ne dzin inde eyen gnu wur eli ne nteang egnu ene atikea djuung wuo ngean. ¹¹ Yezu-Kristu ali itari iyifangi gnu, gnu antwung mvuru, kansi itari iwo imikum i mfunu, emikir ikuu evuru. ¹² Evug epa eli ya wur emuu iky ve, djwi ne ngie olung one, kaku dzin imuu iky imipeawo ya vear esitevuga ve. ¹³ Ntangu emiyen wo ekaagn e Petelo ti Yoane, wayen ngituka, djwi wajia wuwun wali vear akon waagn, wakeanjia na oshin oyikiiwo ya Yezu. ¹⁴ Kansi n'oshin oyiyenikiwo wur eyivug ali ko mbeama na wo, wakafikea ntuba ata djwi ve. ¹⁵ Watuba wa wo na mpwe nelien, mby wasalir wog na wog wuwun: "Djwi na vear ane sikii esinge? ¹⁶ Djwi vear ankum a Yeruzalem walajia kidimu emikiewo, ene kaku oshin osisan su ve. Kansi, ko djwi n'esiang ekapagn etay enkum ne kati e vear, s'angniangagni biu wakwon mfituba ya wur enkum ne dzin inagn. ¹⁸ Mby, ntangu amakeawo mvie, wapum biu na nkwon mfituba, na nkwon ndong ne dzin i Yezu. ¹⁹ Kansi Petelo ti Yoane s'akeari wo wuwun: "Liragni gnemie, yug ekug, ne nteang e Nzeam, silemfuki ne vii agnu too ne vii amitetum Nzeam. ²⁰ Djwi su, sipikug nsianga na ntuba vii ayiyen su ti ayiyug su ve." ²¹ Wakea gnianga biu, mby s'asiangi wo wakien, wapiyen ndola nge esapeawo ve, ogniang n'oluy o vear anagn, djwi wankum akearikiwo nsag-na-viye ya Nzeam na vii anagn. ²² Djwi wur eyivug na nkeang ayinde intsuru na mvwe onign. ²³ Ne mby eyasiangiwo, s'akiwo ntsa etay eli atwung awo, s'akabiwo vii ankum ayitubi ankum a wanganga-Nzambi na antsuru a dibundu. ²⁴ Ntangu emiyug wo vii awo, wankum wasiang otuba ya Nzeam wuwun: "Nkum, yie wur eyikii olung, na buu, na vay, na vim ankum ali neti, ²⁵ Eli yog ne mbug e Mpeve-Santu, n'odzum e teasu David wur eyie otshia eyitubi: "Djwi na nge empaagn wa tomboka mpi wa bansa vii akwon ntina ? ²⁶ Wa vuy ili ne buu ene watiyimaka, na ankum watikie mpfug djwi watag Nkum ti Mon nde Kristu. ²⁷ Djwi Herodi nda Pilato watikie mpfug ne wiya ene, na vear a buu imuu, ti vear a Israel djwi na ntag Nkum Yezu osantu eyie, eyikwi yie vir. ²⁸ Wasanga djwi na nkie inkum iyiwong yie n'ewuo eyie ti oshin oyiyi mpwi e yie. ²⁹ Ntangu opeane, Nkum ,yen oshin olepiwo vear mpay, kansi pea vear a yie biu e ndong otuba o yie na kikesa enkum. ³⁰ Shima ewuo e yie djwi ovugike wa nkeang, okike bidimu e eshin na eshin, ne dzin i wur eyie otshia Yezu, osantu oyie. ³¹ Ntangu emisama wo ngangn, evuru eyiwo enagn egnug mpi wayuo na Mpeve-Santu, mby s'aselongikiwo otuba o Nzeam na kikesa enkum. ³² Oluy o vear ankum ayidjir along anagn ayiwo wankum ko etura emog , moyo emog. Kaku wur eyitubike ndenden vim a nde eli i nde ndemie ve, kansi vim enkum ayiwo djwi na wo wankum. ³³ Wa ntumua alepiikiwo ntiegn biu djwi n'oshin oyikimbiy Nkum Yezu ne kati e wabafwa. Ngrasia eninen ayiwo ya wo wankum. ³⁴ Djwi ne kati ewo, ekayia na wur eyikwon vim ve; vear ankum ayike n'ivur ata mvuru, alesarikiwo, waye n'ekri enagn, ³⁵ wakey ne nkuu i wantumua; mby waki akab ya wur enkum ne kiteso eli mfunu e wur na wur. ³⁶ Yosefo eyipii wantumua dzin imuu Barnabasi, (etuba wuwun mon e along), ali wur e okuu e Levi, ayim wiya e Chypre, ³⁷ asarnde evur eyinde na wo, ajie ekri ewo, akey ne nkuu i wantumua.