¹ Mby, Petelo ti Yoane aletshikiwo evuru e Nzeam ne ntangu e bisamu, ayiwo ne ntangu isar e mbiiy enkum. ² Ayiwo na wur emog eyii n'ekom n'ekuu yim ko eyowur wo, ovarikiwo nshuu inkum, wotsug ne mbwung e tempelo eviewo Epfug ewuo, djwi asawugnaka ekri ya vear aleshwi n'evuru e Nzeam. ³ Wur enagn, ntangu emiyen nde Petelo nda Yoane waleye nshue, awugna ekri. ⁴ Petelo ti Yoane watsug elir ewo ya nde, Petelo ndenden: "Otelir!" ⁵ Nde ko alir puoo, abansi nde asiveande vim ya wo. ⁶ Mby Petelo atuba nda nde ndenden: "Kaku me n'ekri ata etiempar esopeame ve, kansi ndopea vim elime na wo: ne dzin i Yezu-Kristu e Nazareth, yima kien!" ⁷ Petelo okir ne wum ewuo, s'ayiminde ko ne ntangu enagn, nkuu inde ikea biu. 8 Atwom ko mbala emog, ayima, mby s'akien nde. Ashue nda wo n'evuru e Nzeam, alekien, aletwom, alekeari Nzeam nsag-na-viye. ⁹ Wur enkum oyen nde alekien, alekeari Nzeam nsag-na-viye. ¹⁰ Wajia wuwun eli wur eyignemike n'epfug ewuo e tempelo, elewugnike ekri; wayituka djwi na vii amileg ya wur enagn. ¹¹ Akafinamaka nda Petelo ti Yoane ve, vear ankum s'ayiwo ondir n'epfug e Salomoni. ¹² Ntangu emiyen Petelo oshin onagn, atuba nda vear anagn ndenden: "Vear a Israel, djwi na nge eyitukagnu na vii ane? Djwi na nge etelir gnu oshin one kamsi eli ne biu esu mpi na ngy esu emikiesu djwi wur ene akien? ¹³ Nzeam e Abrama, Nzeam e Izaka ti e Yakob, Nzeam e ateasu atipea lokumu ya wur nde otshia Yezu, eyisargnu, eyisan gnu ne nteang e Pilato, ntangu eyileang nde wosiangi. ¹⁴ Afangi gnu osantu ti wur ewuo, aleang gnu wapur wur eyidjagike vear. ¹⁵ Omidjagagni Nkum e luzingu, ndug, Nzeam amokea ombiya ne kati e bafwa, su ene sili wantiegn i vii awo. ¹⁶ Eli djwi n'ekaagn etsug su ne dzin inde, mby dzin inde s'amipeawo biu ya wur eyen gnu na ejiagnu ene, eli ekaagn ya nde, mby wur ene s'amivug nde ne vy agnu gnankum. ¹⁷ Ntangu opeane, atwung, ndajia akignu oshin onagn djwi okajiagni ve, ti ankum agnu. ¹⁸ Kansi Nzeam aleang nde vii anagn akug n'oshin oyitubinde nteang n'odzum o wa ngunsa inde inkum ndenden Kristu ayayen nde mpay. ¹⁹ Tshimagni itura ignu djwi masumu ignu ilim, ²⁰ oveyagni ntangu esiyor gnu eyim ya Nkum, mby asotumagni nde wur eyitubinde bana ntama, eli Yezu-Kristu. ²¹ Ndug enagn, olung ayovey nde tii ko eyakea ngima vim ankum, oshin oyitubi Nzeam n'odzum o wa ngunsa inde i santu ne ntamgu e ntama. ²² Moize atubinde ndenden: "Nkum Nzeam egnu ayapur nde ne kati e atwung agnu, ngunsa emog kamsi me, ayoyugakagni nde ne vii ankum ayokabakagni nde. ²³ Kansi wur epayayug vii a ngunsa enagn, ayokma wo n'ondii e aman Israel." ²⁴ Wa ngunsa inkum eyitubike n'olung owo, yim ko Samuel, akabikiwo nshuu inagn. ²⁵ Gnu, olagni aman a wa ngunsa, na alien ayikii Nzeam ti ateasu, eyitubi nda Abrama ndenden: "Okuu o vear ankum ne buu ayavea wo lusakumuna ko ne mby e ankean ayie. " ²⁶ Nteang-nteang eli ya gnu, yug Nzeam apur nde wur ende otshia eyitum nde djwi osakumunagni, vear wasapea ipwo iwo mby.