¹ Eshu e Pentekote, ayiwo wankeankum ondii omog. ² Ko ne mbala emog, wayug oshuru oyim dzug, kamsi opepe e biu, eyia njuo n'evuru enkum eyikiwo ngigneme. ³ Ilm, oshin omog ti ilm i tshiya, ipwe, itinamaka, etsangya ne dzug ote ewo wankum wur na wur. ⁴ Mby wankum wajuo na Mpeve-Santu, s'abanikiwo na ntuba etuba emuu, n'oshin eyatumike Mpeve na ntuba. ⁵ Ne ntangu enagn, ayiwo na wa Yuda eyipierike ne Yeruzalem, ti vear ayim buu enkum. ⁶ N'oshuru eyiyug wo enagn, s'akim wo wankum wayia ondii omog, wakafijiaka ve, djwi wur na wur ayugikinde wa longoki inagn watuba n'otuba e wiya wo. ⁷ Wankum wayen ngituka. S'atubikiwo wog na wog wuwun: "Vi-a-vii, vear atuba ene wankum epa wali vear a Galilea ve? ⁸ Mby oshin onkagn eyug su watuba n'otuba esu wur na wur n'otuba e wiya nde? ⁹ Nendien sili vear ayim Parte, Medes, ti Elamite, ti vear apier ne Masedonia, ne Yudea ti ne Kapadosi, ne nklingi e Azia, ¹⁰ ne Frijia ti Pamfilia, Ejipiti ti buu e Libia mbeama na Sirenia, angingien ayim Roma, ¹¹ waYuda ti vear amikum kamsi waYuda, vear a buu e Kreti ti wa Arabia, silayug walatuba na biu e etshia e Nzeam" ¹² Wayen ngituka, wakafiyen djwi isituba wo ve, watuba wog na wog wuwun: "Ene etuba nge?" ¹³ Kansi amuu ayuikiwo two, wuwun: "Watiyuy veana." ¹⁴ Mby, Petelo s'ayiminde nda djum n'omog enagn ne nteang e vear anagn, avey otuba, ndenden: "Apeam a waYuda ene, ti gnu gnankum emiyia ne Yeruzalem, jiagni vii ane; yugangi wuo vii atuba me n'atii agnu! ¹⁵ Vear ane watoyuy veana ve oshin obansa gnu, djwi sili ko ne ntangu iwua e mbiiy enkum. ¹⁶ Kansi ene, eli vii ayitubi ngunsa Joele ndenden: ¹⁷ ne nshu insuka, oshin otuba Nzeam, ayapeame Mpeve ya wur enkum; aman apeam ti aman ankear ayabikulaka wo, enkwo ti asig ayayenaka wo emono na viy, mby antsuru agnu ayayenaka wo wandoy. ¹⁸ Ata ya vear ame otshia ampeam ti ankear, ne nshu inagn, ayapeame Mpeve eme, mpi ayabikulaka wo. ¹⁹ Ayapuraka me bidimu ne dzug olung ti ne buu, aluung, tshiya ti edjinga. ²⁰ Vuna ayakum nde mpib, mby ngwon ayakum nde aluung, ne nteang e ntokum eshu eyakea Nkum, eshu ende eninen ti eshu osiang. ²¹ Mby wur eyavie dzin i Nkum ayavug nde." ²² Ampeam a Israel, yugagni otuba one! Yezu e Nazarete, wur eyipii Nzeam osiang ne kati egnu, djwi n'etshia enen ti bidimu, na vii a ngituka, eyikii Nzeam ndemie ne kati egnu, ojiagni gnemie; ²³ oshin oyiwong Nzeam n'oshin ojiande, osar wo n'ewuo e wur e masumu, mby gnu, s'okwog gnu, s'odjag gnu ne kulunsi. ²⁴ Nzeam amobiya n'ewa, amolima ne mpay ewa, djwi ewa apikug n'onkir otshwag. ²⁵ Ogniang Davidi atuba djwi na nde ndenden: "Ayenikime Nkum ntangu enkeankum ne nteang eme, djwi ali ne wum eme ewuo djwi wankandjag. ²⁶ Etura eme eli n'osiang, elm eme ayen kiese. Mby djuung ime ayazinga nde n'ekaagn. ²⁷ Djwi opayasianga moyo eme ve ne wiya e bafwa, mpi opapea mbug ve djwi djuung ime osantu oyie esapwon ne buu. ²⁸ Omingyegne mbug i luzingu; ondii oli yie, ayayuo me n'osiang." ²⁹ Atwung, sianga mokabagni wuo- wuo djwi na tea su Davidi: awinde wamopfugn, aluma ande eli ne kati esu tii eshuu e lwo ene. ³⁰ N'oshin oyinde ngunsa, ajikinde ndenden Nzeam amisila ndenden eli ko mon eyayim n'okuu onde wur eyasagneme n'ekub ende. ³¹ Ajinde nteang mby s'atubinde djwi n'oshin oyabiy Kristu n'ewa, ndenden: "Apayasatsuga ne wiya e bafwa, ata djuung inde ipayapwon ne buu." ³² Ndug Yezu, Nzeam amojiir dzug, mpi su sili wantiegn. ³³ Nzeam ntangu emojiir nde ne wum ende ewuo, emivea nde nsilulu i Mpeve- Santu eyim ya Tea, s'amipeande Mpeve ewo oshin oyen gnu ti oshin oyug ngu. ³⁴ Djwi David akavean ne dzug olung ve, kansi atuba ndenden: "Nkum atuba nda Nkum eme ndnden, gneme ne wum eme ewuo, ³⁵ tii ko eyatsug me wa mbeni iyie ne ngie i nkuu iyie." ³⁶ Mby, evuru nkum e Israel ekug wajii wuo-wuo wuwun Yezu eyikwog gnu ne kulunsi, Nzeam atotsug Nkum mpi Kristu. ³⁷ Ntangu emiyug wo otuba onagn, etikir n'itura iwo, mby s'atubiwo wa Petelo ti wa ntumwa imuu inagn wuwun: "Atwung, su sikii esinge?" ³⁸ Mby Petelo akeara ndenden: "Tshimagni itura ignu, mby wur nw wur avey mbotika ne dzin i Yezu_kristu, djwi na ndolula i masumu ignu, mby asivea gnu ikab i Mpeve-Santu." ³⁹ Djwi elaga ene eli djwi na gnu, djwi n'aman agnu, na muu ankum ali etey, ata watiyia oluy, n'oshin oyavie Nzeam esu. ⁴⁰ Atuba ti vii amuu eshin n'eshin djwi na nkeya itura iwo, na mpea wo biu, ndenden: "Leangagni ovugagni, limagni ne nduong e okuu aman amijng mbug ene." ⁴¹ Vear ayidjiir otuba onde s'avey wo mbotika; ko eshuu enagn, isuu i wa longoki s'avean wo etitign e vear awugu asar. ⁴² Atsugikiwo inaagn n'along a wa ntumwa, ayikiwo ko ondii omog kamsi atwung, alikiwo ondii omog itse-itse, asamikiwo ondii omog. ⁴³ Ayugikiwo womo wur na wur, wa ntumwa alekikiwo bidimu entsign. ⁴⁴ Vear ayidjiirike ankum ayikiwo ondii omog, vim enkum eyikiwo na wo, ayikiwo djwi na wo wankum. ⁴⁵ Asarikiwo vim awo ti epeang ewo, ekri enagn akikiwo akab-akab wankum, wur na wur na vim eli nde na wo mfunu. ⁴⁶ Konso eshuu, ayikiwo wankum ondii omog n'evuru e Nzeam, abagikiwo mampa iwo itign-itign ne mvuru iwo, alikiwo vim awo n'osiang ti nkeya itura wankum, ⁴⁷ Wafukimina Nzeam mpi vear ankum aleangikiwo. Konso eshuu, Nkum aletumikinde n'itwung iwo, vear ayivugike.