¹ Mby wur emog dzin i nde Ananiasi, nda wear nde Safira wasar evur ewo, ² wasawum ikab ekri, (wear nde ajinde) , mby s'ayiwo na ekri eyisatsuga, wakey ne nkuu i wantumua. ³ Petelo nda nde ndenden: "Ananiasi, djwi na nge satana emiyuo nde n'etura eyie djwi oye ndjim Mpeve-Santu, osawum ikab i ekri e evur emisar yie ? ⁴ Yug okwon nsar, epinayiaka ko eyie ve? Kansi ntangu emisar yie, ekri ewo ekayia ko eyie ve? Djwi na nge emitsug yie nginu ipwo n'etura eyie ngean? Ene otodjim vear ve, kansi otidjim Nzeam. ⁵ Ntangu emiyug Ananias otuba onagn alog ne buu, s'awinde. Vear ankum ayiyug vii anagn wayug womo entsign. ⁶ Aman ampeam wayima, wodzub eleama, s'ovariwo, watsa ompfugn n'aluma. ⁷ Ne mby e ntangu isar, wear nde ko ayia nshwe, akajia vii amileg ve. ⁸ Petelo atuba nda nde ndenden: "Onkabi, nge asargnu evur egnu n'isuu ine?" Okeara ndenden: "Ee ko n'isuu inagn." ⁹ Mby Petelo ndenden: "Oshin onkagn emikana gnu na ntesa Mpeve e Nkum? Yen, vear ayim mpfugn wum yie wali ne mbung evuru, asovara wo na yie. ¹⁰ Ko ne ntangu enagn, alog ko ne nkuu i ntumua Petelo, s'awinde. Aman ampeam anagn washwe, woyen atiwa, s'ovariwo, watsa ompfung mbeama na wum nde. ¹¹ Womo eninen ekir atwung ankum na vear amuu ayiyug vii anagn. ¹² Bidimu na vii amuu a ngituka akikiwo ne kati e vear ne mbuo i wantumua. Ayikiwo ondag omog n'epfug e Salomoni, ¹³ kaku wur emuu eyifivangaka etay eli wo ve. Kansi vear a Israel aleangikiwo entsign. ¹⁴ Isuu i vear ayidjir ya Nkum, n'ankear na ampeam, elega ko mvean; ¹⁵ s'alevarikiwo vear a nkeang ne mbug e iyawiya wataky ne ntir na endi evur wo, djwi ntangu esileg Petelo, ignignig inde esadzub amuu. ¹⁶ Vear amuu entsign ayimikiwo wa wiya ili pipi na Yerusalem, avarikiwo vear a nkeang na vear ayii na wa mpeve ipwo, wankum avugikiwo. ¹⁷ Ne ntangu enagn, nkum e wa nganga-Nzambi na vear ankum ayi wa nde , (na ikab i wa saduse), wayug kimpala. ¹⁸ Watshung wantumua, watuomo ne bolog e vear ankum. ¹⁹ Kansi wanzio emog e Nkum, otshu onkum s'ayinde ng'ama ipfug inkum i bolog, s'apur nde , nda wo ndenden : ²⁰ << Tshuag oyiagni n'evuru e Nzeam , long'agni vear along ankum e luzingu ene>>. ²¹ Emiyug wo ngangn , washue n'evuru e Nzeam ko ne suka-suka mpi s'along'ikiwo. Ntangu emiyia nkum e nganga-Nzambi na vear ayi wa nde ,s'ashuiwo mpfug ti antsuru ankum a Israel, watum vear watsu mvey wa ntumua ne bolog. ²² Ntangu emikum ayer-nkuu ne bolog, wakayen wa ntumua ve. wa kea nkaba ankum ngean : ²³ Sitiyen epfug ngitshung wuo-wuo, na ayer nkuu ayikung'ike ne nteang e ipfug; kansi ntangu eming'a su, sikayen ata wur emog ne ti ve. ²⁴ Ntangu emiyug wo vi anagn, nkum e evuru e nzeam na ankum a wa nganga-nzambi waling ko oshin nge esikie wo djwi na wa ntumua n'oshin osiyia vi awo. ²⁵ Wur emog ayia nkaba ndenden : Yen, vear ayitshung gnu ne bolog wali n'evuru e Nzeam , wa pea along ya vear mpiog. ²⁶ Mby ankum e ayer-nkuu avey ayer-nkuu, watsa mvey wa ntumua n'evuru e Nzeam, wakakie na biu na bui ve, djwi alur wo vear wakabug atari. ²⁷ Ntangu emavara wo ne nteang e ankum awo, nkum e wa nganga-Nzambi s'ajwinde vi ane. ²⁸ Sikopumagni na ndong ne dzin inagn ve? Lirakagni, otiyuragni Yerusalem enkum ko na along a gnu ,oling'agni ndog'o alung a wur enagn n'ote e su. ²⁹ Petelo na watumua imuu inagn wa keara wuwun: Asilemfukasu ya Nzeam kansi epa ya vear ve. ³⁰ Nzeam e atea su amibiya Yezu n'ewa, ndug eyidjag gnu , eyiler gnu n'oshung. ³¹ Nzeam amojir ne wum ende ewuo, amotsug Nkum na wur eyi te vug'a, djwi vear a Israel wavy ndolula i masumu i wo , watshimi itura, ³² Su sili wa ntiegn i vi anagn, na Mpeve-Santu eyipii Nzeam ya vear alemfuka ya nde. ³³ Wayug nkier n'otuba onagn , s'aling wo djag wa ntumua. ³⁴ Kansi farize emog ,dzin nde Gamaliel, ayinde long e nsiku, vear entsign oleang'ikiwo, ayima mpi atuba nda wo watopur wa ntumua ne lien. ³⁵ Mby s'atubinde nda wo ndenden : Apeam a Israel, osug'agni na vi aling gnu nkie ya vear ane. ³⁶ Djwi kaku etean ve, Tendasi ayim nde, oveyikiwo wur e wur , vear etitign e nkama inign wo naba. Odjag wo, vear ankum alosodjike wapagn wankum vi a wo ashir. ³⁷ ne mby ende , Yudasi apue , eyii wur e Galile, s'ayimi nde ne ntangu etangaka wo isuh i vear ne buu , nde ko abin vear. nde ko awinde , vear ankum alosadjike wapagn. ³⁸ Ntangu ene, mokabagni , oyafitsug'agni onen na vear ane ve ,siang'agni wo wakien. yug vi alekiwo ene eyim ya vear ,ayawa wo; ³⁹ Kansi yug eyim ya Nzeam , opakug'agni na ndjag wog ve. Osug'agni okaluagni mbaagn ti Nzeam ⁴⁰ S'ayug wo ilag i nde . Wakea mvie wa ntumua ,wanang ko akoy ,wapum na ntuba ne dzin i yezu ,mby s'asiang'iwo. ⁴¹ Wa tumua s'alim wo ne ewi e wo n'osiang djwi na oshin omatue wo ne dzin i Yezu. ⁴² Kansi wo, konso eshu, ata ne mvuru ata ne evuru e Nzeam, wakasiang'a na ndong ne dzin i Yezu-Kristu ve.