¹ Agrippa atuba nda Paulu ndenden: "Osikug ntuba djwi na yie yemie." Paulu asiang ewuo, atuba ndenden: ² "Ndi n'osiang, vuy Agrippa, djwi na ntuba ne nteang egnu lwo ene, na vii ankum amimfugn waYuda; ³ djwi olawung njia vii a wiya e waYuda. Mby s'awigna me ya gnu, ongyugagni. ⁴ WaYuda inkum walajia epier eme yim ko olieng ome ne kati e buu eme ti ne Yeruzalem. ⁵ Anjiiwo yim ko n'itsin mpi walajia wuwun apierikime kamsi farize, ne kimvuka e vear elenga viy biu e vii asu a Nzeam. ⁶ Opeane, ndi nendien na nsama djwi ndaling elaga e Nzeam eyipiinde ya ateasu. ⁷ Djwi ene eli elaga eyitsugikie ekuu esu djum n'ipe etura djwi waviy n'oshin oyifukiminikiwo Nzeam na otshu na mbiy. Eli djwi n'ekagn enagn, vuy Agrippa, emimfugn waYuda. ⁸ Djwi na ngene kati egnu kaku ata emog ebansa ndenden ya Nzeam, kaku vim ekwon ve djwi na nkea mbiya vear amiwa? ⁹ Ne ntangu emuu, abansikime memen mfwete nkie vii apwo entsign djwi na dzin i Yezu e Nazareth. ¹⁰ Akiime wog ne Yeruzalem. Mitsug vear entsign eyidjiir ne bolog, n'ekub eyimpii ankum a wanganga-Nzambi, mpi ntangu eyidjagikiwo vear anagn, ashwikime etay e vear aledjag anagn. ¹¹ Apikime ndola mbala na mbala ne wasinagoga inkum, alatumikime na ntuba vii apwo djwi na Nzeam ewo. Ayikime na nkier entsign djwi na wo, alapikime mpay tii ne wiya angingien. ¹² Ko na djwi inagn, s'atshime Damasi, ankum a wanganga-Nzambi vear ayimpi mbug ti onkeana eyifugn wo; ¹³ mpi ne mbug, ne ntangu djum n'ipe, vuy, ngyen oveanga omog oyim dzugelenga vuna mpi etedjing ne ngnina, me ti vear alekienike ti me. ¹⁴ Ntangu emilog su sankum ne buu, ngyug otuba omog etuba nda me n'otuba e wayuda ndenden: "Saulu, Saulu, djwi na nge elempiyie me mpay ngean? Kaku mfunu e ntun ve kamsi mpunda atun na ndemfuka na fimbu e nkum nde." ¹⁵ Mokeara memen: "Nkum, yie nagn?" Nkum akeara ndenden: "Me, ndi Yezu elepiyie mpay. ¹⁶ Ntangu ene, yima ne nkuu iyie, djwi yug ntopwe yie ngean, eli djwi motsug okum wur otshia mpi ntiegn ne vii ajiayie opeane djwi na me mpi na vii ayoyegne me ne mby i nshuu; ¹⁷ mpi ayovugame ne kati e vear ti e empaagn etay eyotum me, ¹⁸ djwi ongami viy awo ti na ndima ne mpib wakey ne mwinda, walim ne biu e satana wakey ya Nzeam, djwi waviy ya Nzeam ndolula i masumu ti oleama-nzo eyapeame ya vear amitsug me n'ikri djwi na lukwikilu ewo ya me." ¹⁹ Wog enagn, vuy Agrippa, nkakie ote biu ve n'emono enagn eyiyen me yim dzug; ²⁰ kansi nteang ya vear a Damasi, mby ne Yeruzalem, tii etitign enkum e Yudea ti empaagn, alongikime watshimi itura iwo walir etay e Nzeam, wakii etshia ewuo e vear amitshim itura. 21 Itsin iwo wog enagn eyintshung waYuda ne tempelo enandjag wo. ^{22 24} Nzeam aminsarisa tii opeane, djwi mean ndi ngiyima mpi ndapea ntiegn ya alieng ti antsuru djwi na vii ayitubi wangunsa ti Moizeayiwo efwete nkug; ²³ wuwun Kristu afwete ngyen mpay, mpi afwete ngya wur enteang ayafutumuka ne kati e wabafwa, ayegni mwinda ya waYuda ti ya empaagn." ²⁴ Ntangu etuba Paulu na ngyegne ndenden kaku ipwo imikiende ve, Festus s'atubinde na biu ndenden; "Paulu, oli n'ifara; waagn eyie emilega s'amikum yie n'ifara." ²⁵ Kansi Paulu atuba ndenden: "Epa ndi n'ifara ve, nkum Festus; etuba me ene eli vii a masonga ti e waagn. ²⁶ Djwi vuy ajia vii ane mby s'atubame ya nde na wuo enkum, djwi ndajia memen kaku vim eli ngizuba ya nde ve; djwi ekayia n'oziy ve. ²⁷ Vuy Agrippa, odjir vii ayitubi wangunsa? Ndajia memen oladjir wog." ²⁸ Agrippa atuba nda Paulu ndenden: "Oling me ko ndjir vii awo, mpi nkum okristu?" ²⁹ Paulu atuba ndenden: "Ndasama Nzeam, ata opeane ata ne mby i nshuu, epa ko yie ve, kansi ti vear amuu ankum angyug lwo ene, wayii kamsi me, kansi epa na nkori i bolog imintshung wo ene ve. ³⁰ Mby vuy Agrippa s'ayiminde, nda Festus ti Bernisi, na vear ayiike ngigneme ti wo; ³¹ ntangu emilim wo n'ondii oyisamikiwo vii angn, s'atubikiwo wog na wog wuwun: "Wur ene kaku vim emikiende ve esikug nde na mvey ndola ewa ata na nshwe bolog." ³² Agrippa atuba nda Festus ndenden: "Wur ene anakug nde wosiangi eyi akwon nding na ntsa nsama ne nteang e Cezar."