¹ "Atwung ti atea, yugagni vim etuba me ya gnu djwi na vii amimfuggn gnu me." ² Ntangu emiyug woPaulu atuba n'otuba e waYuda, walega ngya pwoo. Ndenden: ³ "Ndi Yuda, angwur wo ne Tarsi, ne buu e Silisia, kansi mifuye ne wiya enen ene, ne nkuu i Gamaliel. Andong wo wansiku biu-biu i ateasu. Ayime na ngagn e nkie otshia o Nzeam enstign, ko oshin olignu lwo ene. ⁴ Ne mbug e along anagn, mipea vear mpay tii ko ewa; mitshung ampeam ti ankear, matwomo ne bolog. ⁵ Nkum e wanganga-Nzambi ti itwung i antsuru a dibundu ankum asikug wo mpea ntiegn , djwi aviime onkeana eyim ya wo djwi na atwung a Damasi. Mfwete ntsa, ntshung vear ayii mpiog majii ne Yeruzalem, djwi wavey ndola. ⁶ Ne mbug eletshime, ntivanga mbeama na Damasi, ne mbala emog, etitign e wa ntangu djum n'ipe, oveanga emog eninen eyim dzug, entsug me ne ngnina. ⁷ Ndog ne buu mpi ngyug otuba omog etuba nda me nndenden: "Saulu, Saulu, djwi na nge elempiiyie me mpay?" ⁸ Mokeara memen: "Nkum, yie oli nagn?" Atuba ndenden: "Me ndi Yezu e Nazareth elepiiyie mpay." ⁹ Vear ayii ti me ayen wo oveanga onagn, kansi wakayug otuba e wur eyitubike nda me ve. ¹⁰ S'atubime memen: "Nkum ekug wuo nkii nge?" Nkum ankeara ndenden: "Yima, tshwag ne Damasi; asokabawo vii ankum afwete yie na nkie. ¹¹ "Nkafiyenaka ve, djwi na oveanga onagn; mby, s'atshime Damasi, vear ayii ti me alenkiriwo. ¹² S'ayen me wur emog kog dzin ind Ananiasi, wur emog ewuo ekir nsiku, waYuda inkum iyiperike neti apiikiwo ntiegn e wuo djwi na wur enagn. ¹³ Ayia etay eli me, ayima mbeama na me, atuba ndenden: "Otwung Paulu, vy ayie angam." Ko ne ntangu enagn, vy ame angam, mokea ondir nde. ¹⁴ Mby atuba ndenden: "Nzeam e ateasu atoson yie djwi ojii nge eleang nde, oyen yiyen ali masonga, djwi mpi oyug otuba oyim n'odzum onde ndemie. ¹⁵ Djwi ayayia yie ntiegn endene nteang e vear ankum ne vii amiyen yie ti emiyug yie. ¹⁶ Opeane nge efikung yie? Yima, vey mbotika yog vay djwi na ndima ipwo iyie ne ntangu evie yie dzin inde." ¹⁷ Ntangu emikeame Yeruzalem, emitsame nsama ne tempelo, s'ayen me emono. ¹⁸ Ngyen Nkum atuba nda me ndenden: "Kie eveang kagn ndim ne Yeruzalem, djwi vear ane wapadjir ntiegn eyie esipea yie djwi na me ve." ¹⁹ Ntuba memen: "Nkum, walajia wuwun mitshung ne bolog vear ankum ayidjirike ya yiene kati e wa sinagoga ine. ²⁰ Ntangu eyipwi aluung a Etiene wur eyie otshia, ayiime neti, aleangikime mpi akirikime ileama i vear ayodjag nde." 0 Kansi nde atuba ndenden: "Tshwag, djwi yie, ayotum me etey , etay e empaagn." ²² Vear wopea mbug na ntuba tii ne djwi inagn. Mby wavey otuba wuwun: "Oshin o wur ene, limagni nde ne buu, djwi epa eli wuo ve ayii ne luzingu." ²³ Watsug elie, wabug ileama iwo, watwomo buu ne dzug, ²⁴ nkum ayer-nkuu atuba nda vear ande na nshwer Paulu neti evuru. Atuba nda vear ande waloyuike djwi imog imog, walonangike ti fimbu djwi na njia itsin i djwi otsugawo elie oshin one. ²⁵ Ntangu emotshung wo mkori, Paulu s'atubinde nda nkum ayer-nkuu eyii kog ndenden: "Eli wuo ne nsiku na mepa wur e Roma mpay ne ntangu eli watobag ewu ende ve?" ²⁶ Ntangu emiyug nkum ayer-nkuu oshin onagn, atsa etay e Kapitene, atuba nda nde ndenden: "Vim nde eling yie nkie? Djwi ene ali wur e Roma." ²⁷ Kapitene ayia, ndenden: "Onkabi, oli wur e Roma?" Paulu okeara ndenden: " Ee." ²⁸ Kapitene akea ntuba ndenden: "Me, mifuta ekri entsign djwi nkum wur e Roma." Kansi Paulu atuba ndenden: "Me ndi wur e Roma yim ko eyingwur wo." ²⁹ Mby vear anatsa djwi wojwi vii asami s'alim wo ko ne ntangu enagn. Ata kapitene enagn mpi ayug nde womo entsign, ntangu eyitubi Paulu ndenden ali wur e Roma, djwi na nkori iyotshung wo. ³⁰ Mpimpih enagn, nkum ayer-nkuu aling nde na njia masonga ne djwi iyifugn wo Paulu. Mby s'opubiwo nkori, atuba nda nkum e wanganga-Nzambi ti ankum amuu na nshwe mpfug. Mby s'atum nde Paulu na nkra, otsug ne ngnina ewo.