¹ Ntangu emishir oshuru onagn, Paulu s'atum nde vear na mvie walongoki, apea ilag djwi wayi na kikesa. Mby s'anam nde nda wo, s'atshinde Masedonia. ² Ntangu emikien etitign enagn enkum, alepii walongoki along wayii na kikesa, s'atshinde Gresia. ³ S'akinde ngwon isar mpiog. WaYuda wakie mpfug emog djwi na nde ne ntangu eling nde ndim djwi na ntsa Syria, mby s'akey nde mbug e Masedonia. ⁴ Djwi na ntsa na nde n'Asia , ayiwo Sopater mon e Pyrrhus e Beree, Aristarque ti mon e butama e mpa e vear adjir e Thessalonika, Gaius e Derbe, Timothei, Tychiki na Trofime a vear a Asia. ⁵ Wo ane , atshiwo nkung vear nteang ne Troasi. ⁶ Mby su , ne nshu ilawo mampa ikuon ete, sishue n'ashua ne filipia, ne mby e nshu itean, sikutana n'atwung anagn ne Troasi, sikie nshu ishambia neti. ⁷ Eshu eteang , e mposo eyibanisu, ntangu emisang'a su djwi na mbag mampa, Paulu s'asulikinde nda walongoki. Akanikinde na ntsa mpimpign enagn kansi abin asulu tii ngnina otshu. Ayiwo na wa muinda entsign n'itunu evuru e dzug n'ondii oyikisu sankum. ⁹ Kansi onkwo omog, dzin inde Etichus, agneminde ne madikisi evuru, ntangu elongiki Paulu, nde ativur lwong e biu. Lwong enagn ologo yim etign evuru otatu tii ne buu, ntangu emoshung wo, atiwa. ¹⁰ Kansi ntangu emikr Paulu, atsa avur ne dzug inde, mby s'oveynde ne mbwo inde. Atuba ndenden: "Oyayugagni womo ve, ali na luzingu." ¹¹ Ntangu emikeande mvean dzug, abag itign i mampa, ala, akeantuba enatsign tii mbiy enkum, mby s'akien nde. ¹² Wakea mvara mon ompeam enagn ngitien, ayiwo n'osiang entsign. ¹³ Mby su, s'atshisu nteang n'ashwa, sisasugn Paulu, sitsankr ne Asosi, ondii oyitubisu sivey Paulu, djwi nde, asandeyia mbug e nkuu. ¹⁴ Ntangu emiyia nde ntevea ne Asosi, s'ovey n'ashwa mby s'atshisu Mitilenia. ¹⁵ Mby, yim kog, sikien n'ashwa, sikum mpimpign enagn ne nteang e esiang e Chios. Mpimpign ewo, sikum n'esiang e Samos mby eshuu emuu eyilani s'akumsu wiya enen e Mileti. ¹⁶ Oshin oyitubi Paulu ndenden aleg ne Efeso djwi akaleang ngya etean ne Azia ve; aletshikinde eveang-eveang djwi, yug ekug oshin onagn, eshuu e Pentekote ayii ne Yeruzalem. ¹⁷ Mby, yim mileti, s'atum nde wur ne Efeso ntsa nkaba antsuru a dibundu. ¹⁸ Ntangu emikum wo etay ende, atuba nda wo ndenden: "Yim ko eshuu enteang eyitsug me nkuu ne Azia, ojiagni gnemie oshin olepier me ma gnu. ¹⁹ Ndekii otshia o Nzeam n'etura e ngikra, na viey ne vy ti mpay ilempii wa Yuda na wampfug ilekiwo. ²⁰ Ojiagni gnugnun kaku vim emoziyagni me ve ne vim ayii mfunu djwi na gnu mpi oshin eyolongagnime ne kati e vear ankum ti ne mvuru na mvuru. ²¹ Ojiagni oshin onkagn eyikabikimewaYuda ti waGreki na ntshima itura iwo etay e Nzeam, wayii na lukwikilu ya nkum esu Yezu Kristu. ²² Ntangu ene, yenakagni, Mpeve-Santu ndean atintshung, ndetsu Yeruzalem, mpijia ve vii nge esilog ya me mpiog. ²³ Kansi Mpeve-Santu alenkabi ne viya enen inkum ndenden eshing e bolog ti mpay ilankung me. ²⁴ Kansi me, mpitsug onen djwi na luzingu eme kamsi eli na mfunu entsign ve, wuo nshiri otshia ome n'oshin oyiviime ya Nkum Yezu, djwi na nkab ntiegn e oshwong o wuo e ngrasia e Nzeam. ²⁵ Ntangu ene, liragni, ndajia memen, gnankum endii elelongikime ekub e Nzeam, opafiyenagni elung eme ene ve. ²⁶ Wog etuba me ya gnu lwo ene memen kaku me n'ipwo ve n'aluung a wur enkum. ²⁷ Djwi olongakagni me luzolo e Nzeam, nkaziy ata vim emog ve. ²⁸ Osugagni djwi na gnu gnemie, osugagni djwi na itwung ameme eyopiagni Mpeve-Santu na ndiraka. Osugagni ntangu epeagnu vim anda ya dibundu enkagn e Nzeam eyiviynde n'aluung ande ndemie. ²⁹ Ndajia, yug ntikien, wankwiy i nkier ayashwewo ne kati egnu, mpi wapayawum itwung ine ve. ³⁰ Ndajia, ne kati egnu, vear ayayiawo mpi ayalong wo vii oyang djwi wabin walongoki ne mby ewo. ³¹ Oliragni wuo. Kanagni gnugnun mvwe isar inkum nkasianga ve n'ondongagni, na mbiy na otshuu ti viey ne vy. ³² Ntangu ene, ndopeagni ya Nzeam ti ya otuba o ngrasia ende, djwi nde wur ekug nompeagni biu mpi n'ompeagni oleama-nzo ne kati e vear ankum ali wasantu. ³³ Nkaleang ata ekri, ata wolo, ata ileama i wur emog ve. ³⁴ Gnu gnemie ojiagni, mbwo ine, akikiwo vim ayikime na wo mfunu ti vear ayiki ti me. ³⁵ Inkum inagn, oyegnagnime mbanu memen yug okie otshia, asikug yie nsarisa vear ali kaku biu mpi ekug okanagni otuba eyitubi Nkum Yezu ndemie ndenden: "Osiang eli entsign yug opea kansi epa yug ovea ya wur ve." ³⁶ Ntangu emishir nde ntuba vii anagn, afukama mby asama nda wo wankum. ³⁷ Wankum waliyeentsign, walog ne nking e Paulu, woyama. ³⁸ Wayia ngy-ngy wankum djwi n'eyitubinde ndenden wapafiyen elung ende. Mby s'ovariwo tii n'ashwa.