¹ Ntangu emileg wo ne viya enen e Amfipolis ti Apolonia, s'akum wo ne wiya e Tesaloniki, neti ayiwo na sinagoga emog e waYuda. ² Paulu, n'oshin omiziga nde, atsa etay ewo nshuu isar i sabata, atsugikinde esiy nda wo n'oshin omifugn wo n'enkeana. ³ Angamikinde enkeana emifugn wo, atendula ndenden ayiwo mfunu djwi Kristu ayen mpay mpi akey mfutumuka ne kati e bafwa. Atuba ndenden: "Yezu elolongagnime enagn, eli ndug Kristu." ⁴ WaYuda imuu ne kati ewo adjiir wo, s'ashwiwo etay e Paulu nda Silasi, ti vear amuu a Greki ayilurike Nzeam, ankear entsign ayi na bifu iwuo ti oluy o vear entsign. ⁵ Kansi waYuda iyii n'etura ikworo, na kimpala ewo, s'avey wo vear amuu apwo ayii n'ilaga, watsug akina, s'atombokikiwo n'iyawiya. Watsa n'evuru e Jasoni na ndingPaulu ti Silasi djwi wavari ne nteang e vear ankum. ⁶ Ntangu ekayen wo ve, wasavey Jasoni ti atwung amuu watsampea ne mbwo ankum abag ewu ne wiya enagn, wuwun: "Vear amitsug buu opfugn mavanga, wean watiyia mpi ti ya su nendien. ⁷ Vear amiyama Jasoni n'evuru ende walekii vii amitun Cezar n'enkeana emitsug nde mbwo, waletubi wuwun eli na vuy emuu, dzin inde Yezu." ⁸ Ntangu emiyug oluy o vear anagn ti ankum abag ewu vii anagn, ayug wo mpay n'itura iwo. ⁹ Ntangu emifuta Jasoni ti atwung anagn ekri emabagawo, mby s'asiangi wo, s'akien wo. ¹⁰ Otshuu onagn, atwung anagn s'asiangi wo Paulu ti Silasi, s'atum wo Beree. Ntangu emikum wo, s'ashwiwo ne sinagoga e waYuda. ¹¹ WaYuda inagn ayiwo n'itura ngie, epa kamsi ali ne Tesalonika ve; djwiavey wo otuba o Nzeam eveang eveang, walelonguki konso eshuu vii ayifugn wo n'enkeana djwi na ndir yug eli vii a masonga. ¹² Wog enagn, vear entsign ne kati ewo adjiir wo, ti ankear amuu ayii wa Greki ti ampeam entsign. ¹³ Kansi ntangu emiyug waYuda ili ne Tesalonika wuwun Paulu allong along a Nzeam ti Beree, watsa, watsug ontshiey ya vear djwi na ntomboka. ¹⁴ Mby atwung s'avey wo Paulu s'otum wo ne nzey, Silasi nda Timotei wasatsuga kog. ¹⁵ Vear alevarike Paulu watsonkey tii ne Atene. Emosawokey mpiog, nde s'akabinde oshin osikiewo djwi na Silasi ti Timotei djwi watsu eveang eveang etay eli nde. ¹⁶ Ntangu eyakwungike Paulu ne Atene, ayug nkier n'etura ende djwi na biteke iyiyenikinde iti juone wiya enagn. ¹⁷ Mby s'atsugikinde esiy nda waYuda ne sinagoga, ti vear ayilurike Nzeam, ti vear amuu alesangikinde nda wo konso eshuu n'endii e vear oluy. ¹⁸ Vear a wagn amuu Epicuriens ti wa Stoiciens atsugikiwo esiy mpi wa nde. Mby amuu s'atubikiwo wuwun: "Vim nge etuba wur ene? " Amuu wuwun: "Ali wur elelong vii a Nzeam aningien," djwi alelongikinde Yezu na vii a lufutumuku. ¹⁹ Wavey Paulu wotum ne (aeropage), wuwun: "Siling njia along a mpa nge elelong yie ene ?" ²⁰ Djwi oletubi vii amog a mpa n'atii asu. Wog enagn siling njia vii anagn eling ntuba nge." ²¹ (Djwi vear ankum a Athene ti angingien ayipierike kog aveyikiwo ntangu ewo ko na ntuba mpi na ngyug ko vii a mpa anagn.) ²² Mby Paulu ayima ne kati kati e (aeropage), atuba ndenden: "Gnug, vear a Athene, ndayen oleangagni vii a Nzeam n'oshin onkum. ²³ Djwi n'oshin omikien me ne wiya ene, emiyen me vim alefukimini gnu, ntiyen kunda emog watifugn vii ane: "Ya Nzeam e ongingien." Wog enagn, vim elefukimini gnu eli opijiagni ve, eli wog enagn elolongagni me. ²⁴ Nzeam eyiiki buu opfugn ti vim ankum ali neti, djwi ndug wur eli Nkum olung na buu, apitsumpier ne tempelo emikie vear na mbwo ve. ²⁵ Kaku vim etsawompea ne mbwo i vear ve kamsi nde akwon vim; djwi nde ndmie wur etsampea luzingu ya vear, ti egnim ya vim amuu ankum. ²⁶ Ya wur emog, s'akiinvde buu enkum ti vear ankum ali na luzingu ne buu ene, amitsug nsuka ne nshuu ti onduu ne luzingu e wur na wur. ²⁷ Mby, vear waling Nzeam, mbala emuu asoling wo mpi aoyen wo, apa ali etey na su ve. ²⁸ Djwi ne kati ende silekien, silazinga mpi siliko, oshin oyitubi (poet) emog ne kati egnu: "Djwi su mpi, sili aman ayim n'okuu onde." ²⁹ Mby, djwi sili na djuung i Nzeam, sipikug mbansa ve susun kinzambi eli kamsi wolo, kamsi mpalata go kamsi itari imiwong wo ti mabansa i wur. ³⁰ Wog enagn Nzeam akatsug onen na ntangu enkum eyikoojiaka wur ve, kansi atuba nda vear ntangu ene, n'endii enkum, na ntshima etura, ³¹ djwi amikie eshuu emuu eyabag nde ewu e buu opfugn, ne masonga, ya wur eyison nde. Nzeam amipea mbanu e wur enagn ya wur enkum oshin eyokey nde ombiya ne kati e bafwa. ³² Ntangu emiyug vear a Athene etuba nde na lufutumuku e bafwa, amuu wayue Paulu two; kansi amuu wuwun: "Ayokeasu ongyug mbala emuu ikey." ³³ Ne mby ewo, Paulu s'asiangi nde. ³⁴ Kansi vear amuu wasatsuga wa nde, wadjiir, Denys mpi ti vear amuu ayii ti nde.