1 Paulu akum mpi ne Derbe ti ne Lystre, ayen longoki emog dzin ind Timotei, meande ayinde Yuda eyitsug ekaagn, teande ayinde Greki. ² Atwung a Lytre na ali ne Icone apiikiwo ntiegn ewuo djwi na nde. ³ Paulu aleang nde ovey akien ti nde, ntangu emovey nde, s'obag nde djuung djwi waYuda eyii n'ondii onagn, djwi wankum ajikiwowuwun teande ali Greki. ⁴ Ntangu elelegikinde ne wa viya, aletukinde nda atwung na nkir ko vii amituba wantumwa na antsuru a dibundu ne Yeruzalem. ⁵ Mvuru i Nzeam inkum aleviikiwo biu ne lukwikilu ewo, isuu i vear aleveanikiwo konso eshuu. ⁶ Ntangu emapum mpeve-Santu na ndong ne buu e Azia, s'atearwo Frigia ti buu e Galatia. ⁷ Ntangu emikumwo mbeama na Mysia, wayirika djwi na nshwe ne Bitinia, kansi Mpeve e Yezu akapea mbug ve. ⁸ Mby s'ashwiwo Misia, wakra Troasi. ⁹ Otshu onkum, Paulu ayen ndoy ngean: "Wur emog e Masedonia atipwe ne nteang ende, atuba ndenden: 'Yag ne Masedonia, oye nsarisa vear.'" ¹⁰ Ne mby e ndoy e Paulu enagn, aling su sikum eveang eveang ne Masedonia, ajiisu susun Nkum atitevie na ndong along mpiog. ¹¹ Emilim su ne Troasi, sitishwe ne war tii ne Samotrasia, mpimpign enagn, sitsankra ne Neapolisi. ¹² Yim kog, s'atshisu Filipia, eli wiya oluu enteang e Masedonia, ayiwo colonie e vear a Roma, siyia ne wiya enagn nshuu enstign. ¹³ Eshuu e sabata, sipwe nelien e epfug e wiya, mbeama na vay amog, abansi su susun eli ondii o bisamu. Signeme, s'asulikisu ti ankear amuu ayii kog. ¹⁴ Emog ne katiewo dzin inde Lydia, alesarikinde pourpre ne wiya e Tyatire, akumisikinde Nzeam, ateyugikinde. Nkum angaminde etura ende djwi ayug vii atuba Paulu. ¹⁵ Ntangu emivey nde mbotika, ti vear a evuru ende, ateyue ndenden: "Yug oyenagni ndi wur emitsug ekaagn ya Nzeam, shweagni n'evuru eme, gnemagni." S'ajirsu otuba onde. ¹⁶ Eletshikiwo n'ondii e bisamu, mon okear omog ayinde na mpeve epwo na njiaka vii a vear, ayia nsanga nda su. Aviyikinde ekri entsign eyipiikinde ankum ande. ¹⁷ Alesedjii etay eletshisu ti Paulu. Adzamikinde ndenden: "Vear ane wali wansadi i Nzeam eli ne dzug, Walopiagni along evug." ¹⁸ Alekikinde oshin onagn nshuu entsign. Paulu atiyug nkier, atshim, s'atubinde nda mpeve enagn ndenden: "Ndatuba ma yie, ne dzin i Yezu-Kristu, pwe ne djuung i mon onkear ene!" Apwe ko ne ntangu enagn. ¹⁹ Ankum a mon otshia enagn ntagnu emiyen wo ekaagn e mvea ekri etilim, s'akirwo Paulu ti Silasi, wavara n'ilaga ne nteang e ankum. ²⁰ Ntangu emayegne wo ne nteang e ankum abag vii, wuwun: "Vear ane wali waYUda, watiyia ntsug mavanga ne wiya asu. ²¹ Walelong vii amog apikug su na mvey ve, epikug su ndana mpi ve, su vear a Roma." ²² Vear ankum wayug nkier djwi na Paulu ti Silasi; mby ankum abag vii anagn wayara ileam iwo ne djuung, s'atum wo vear djwi wanang fimbu. ²³ Ne mby emanang wo fimbu, s'atomi wo ne bolog. Wakaba nkum e bolog na ngwum wuo wuo. ²⁴ Ntangu emopea wo otuba onagn, s'atwominde ne bolog eli ne kati, atshung eshung ne nkuu iwo. ²⁵ Ne kati kati otshuu, Paulu nda Silasi apikiwo bisamu, washwe walim i Nzeam, vear ayiiki ne bolog ayugikiwo. ²⁶ Ko mbala emog, buu egnug, ebuye epiy e mvuru e bolog enkum n'itsin iwo ngie, ipfug inkeankum ingam, eshing enkum eyitshungikiwo vear a bolog ankum esug. ²⁷ Nkum elir bolog abiy, ntangu emiyen nde ipfug i bolog inkum ngingam, avey ompien onde e vur epe djwi na ndjag djuung, ndenden vear ankum a bolog watilur. ²⁸ Mby Paulu s'adzaminde na niu ndenden: "Oyadjag djuung ve, sankum siliko." ²⁹ Ntangu emiling nkum e bolog mwinda, ashwe eveang eveang, alog ne nkuu i paulu nda Silasi na ekukuma; ³⁰ aapur nelien, atuba ndenden: "Nkum, nge efwetw me na nkie djwi mviy evug?" ³¹ Paulu ti Silasi wokeara wuwun: "Kwikila ya Nkum Yezu mby asivug yie, yie ti familia eyie enkum." ³² Mby wolong otuba o nkum, ti vear ankum ayii ne evuru ende. ³³ S'aveynde Paulu ti Silasi akien nda wo n'evuru ende ko otshuu onagn, asuy mpura iwo, etean kaku s'avey nde mbotika, nde ti vear ayii n'evuru ende. ³⁴ Avara Paulu ti Silasi n'evuru ende, s'apinde vim anda. Ayinden'osiang ti vear a evuru ende djwi n'oshin oyidjir wo Nzeam. ³⁵ Ntangu emikeam vuna, ankum abag ewu watum vear djwi na nkaba nkum elir bolog na nsianga vear anagn. ³⁶ Nnkum e bolog akaba Paulu ndenden: "Ankum abag ewu watitum vear na nkaba me djwi wosiangagni okienagni. Pweagni, tshwagagni na ngemba." ³⁷ Kansi Paulu nda wo ndenden: "Watinang vear fimbu ne vy a vear, su vear a Roma, kaku ata djwi ipwo imikiesu ve. Watitetwomo ne bolog, mby opeane walakea ntepur n'oziy? Kaku ve! Epa ngean ve! Waye wemie na ntepur ne bolog!" ³⁸ Ayernkuu akwungike wakaba ankum abag ewu vii anagn, wayug womo ntangu emiyug wo wuwun Paulu ti Silasi wali vear a Roma. ³⁹ Ankum anagn s'ayiwo ankeya itura, ntangu emapur wo s'atubiwo ya Paulu ti Silasi na ndim ne wiya enen eangn. ⁴⁰ Paulu ti Silasi s'apwiwo ne bolog, watsa n'evuru e Lydia. Paulu ti Silasi ntangu emiyen wo atwung, wapea along na ngya na kikesa, ne mby ewo, s'alim wo ne wiya enagn.