1 Vear amuu ayim wo Yude, alongikiwo atwung wuwun: "Yug watobag djuung iyie ve n'oshin o nsiku i Moize, opavugagni ve." ² Paulu ti Barnabasi s'atsugikiwo esiy ti vear anagn, mby atwung anagn s'atubiwo wuwun ekug Paulu ti Baranabasi na amuu ne kati ewo watsu etay e wantumwa na antsuru a dibundu ne Yeruzalem djwi walir vii ane. ³ S'atshiwo ti vear a evuru e Nzeam, waleg mbug e Fenisia ti e Samaria, alekabikiwo oshin omitshima empaagn itura, vii anagn apiiwo osiang entsign ya atwung. ⁴ Ntangu emikum wo Yeruzalem, wayama n'evuru e Nzeam ya wantumwa ti antsuru a dibindu, s'akabiwo vii ankum amikie Nzeam ya wo. ⁵ Mby amuu ayike wafarize, wayima, wuwun: "Ekug wabag djuung i empaagn enagn, sakabi wlaemfuki ne wansiku i Moize." ⁶ Wantumwa ti antsuru a dibundu s'ashwiwo mpfug djwi na dir vii awo. ⁷ Esiy eninen epwe ne kati ewo, Petelo s'ayiminde, ndenden: "Atwung, ojiagni gnugnun bana ntama, Nzeam amison ne kati egnu, djwiempaagn wayug otuba o Nzeam n'odzum ome, wadjir. ⁸ Nzeam mpi wur ejia itura i vear, amipea ntiegn n'oshin oyapiinde Mpeve-Santu kamsi ya su; ⁹ akakie ata ontshiey ve ne kati esu ti wo, djwi amisuy itura iwo na lukwikilu ewo. ¹⁰ Ntangu opeane, djwi na nge emekagnu Nzeam n'oshin oletsug gnu odzuru ne nking e walongoki, odzuru eli ata ateasu, ata su, kaku emog emivara wog ve? ¹¹ Kansi, eli ko na ngrasia e Nkum Yezu edjirsu susun simivug, oshin omog ti wo." ¹² Wankum wayia ko pwoo, s'ayugikiwo Barnabasi nda Paulu oshin oyikabikiwo bidimu ti vii a ngituka inkum iyiiki Nzeam ya wo ne kati e empaagn. ¹³ Ntangu emishir wo ntuba, Jaki s'aveynde otuba ndenden: "Atwung odzugagni. ¹⁴ Simoni nteang ndean atikab oshin oyilir Nzeam etay eli empaagn, amison ne kati ewo vear alevari dzin inde. ¹⁵ Otuba e wangunsa etikug na vii ane, oshin oyifugn wo wuwun: ¹⁶ "Ne mby ewo, ayakeame, ayakeame ntwung itsug i David eyilog, ayawong me endii emiwaka, mby ayakeawo ngima, ¹⁷ djwi vear amuu amisatsuga ayaling wo Nkum, ti empaagn elevari dzin inde." ¹⁸ Enagn vii atuba Nkum eyikii vim ane eyijiiwo bana ntama. ¹⁹ Wog enagn, me mpi ndaleang wakwon mpea itura mpay ya empaagn emitshima itura etay e Nzeam; ²⁰ kansi s'afugni onkeana susun wakwon mvey mbin i nsama biteke ti kinduma, na wagnam imiwaka opeama ti aluung. ²¹ Yim ko ndwong antsuru amileg, eli na vear ne wiya na wiyaelelong mpi eletangi vii a Moize ne wa sinagoga iwo konso eshuu e sabata." ²² Mby wantumwa ti antsuru a dibundu, ti vear a evuru e Nzeam enkum, wason Judeeyivikiwo Barnabasi ti Silasi, ankum a evuru e Nzeam, s'atum wo Antioshi ti Paulu nda Barnabasi. ²³ Wafugn ngean: "Wantumwa, antsuru a dibundu ti atwung, sitotumagni mbea, gnu atwung empaagn eli ne Antioshi, Syria ti ne Silisia! ²⁴ Simiyug susun vear amuu ayim ya su nendien, sikaatum ve, wamiyia ompiyagni itura na along awo. ²⁵ S'ayensu wuo sankum sison vear asotumagni su mpiog, waye ti atwung asu Barnabasi ti Paulu, ²⁶ wog vear ayivug n'ewa jwi na dzin i Nkum esu Yezu-Kristu. ²⁷ S'amitum su Jude nda Silasi, ayokabagni wo ko vii oshin omog. ²⁸ Djwi, ti Mpeve-Santu ti su, ayensu wuo sikwon ompeagni odzuru o vim amuu, wuoko vim ali mfunu: ²⁹ eli na nkwon nda eky e gnam emidjag wo n'empeab e biteke, na aluung, gnam imiwaka opeama, ti kinduma. Yug otiwumagni djuung ignu na vim anagn, asiyiawo wuo djwi na gnu. Satsugagni !" ³⁰ Mby vear a evuru e Nzeam s'akeywo, wo s'atshiwo Antioshi, watsug atwung ankum ondii omog, mby s'apiiwo onkeana enagn. ³¹ Emitangawo, s'ayiwo n'osiang na kikesa emapeawo. ³² Jude ti Silasi ayiwo mpi wambikudi, s'apiiwo along eshin n'eshin djwi na nkeampea wo biu. ³³ Ne mby i nshuu imikiewo ti wo, atwung s'asiangiwo, wakeankien na ngemba etay e vear ayatum. ³⁴ Kansi Silasi ayen nde wuo asatsuga kog. ³⁵ Kansi Paulu ti Barnabasi wasatsuga ne Antioshi ti vear amuu entsign, piog, alelongikiwo ko otuba e Nkum. ³⁶ Ne mby i nshuu, Paulu atuba nda Barnabasi: "Sikey ntsa ndir atwung ne wiya na wiya enkum eyilongikisu along a Nkum, djwi na ndir oshin oliwo." ³⁷ Barnabasi aleang nde avari mpi Yoane eyiviikiwo Malako djwi watsu ti nde. ³⁸ Kansi Paulu akaleang ve na ntsa ti nde. Djwi nde, anam nde ti wo ne Pamfilia mpi akasarisa ve n'otshia ewo enagn. ³⁹ Oshuru s'apwiwo biu ne kati ewo, mby s'anam wo wur na wur etay ende. Mby Barnabasi s'aveynde Malako washwe ne war s'atshiwo Shipre. ⁴⁰ Kansi Paulu avey Silasi s'akien wo, n'oshin oyitubi atwung na ngrasia e Nkum. ⁴¹ Atear Syria na Silisia alekey mpea vear a mvuru i Nzeam biu.