¹ Djwi na makabu intuma wasantu, epa eli mfunu ve djwi na me mofugnagni. ² Djwi ndajia etura wuo elignu na wo enagn vim etsame mvey osiang etay e vear a Macedonia. Akabime memen Achaie ali ngawong bana ko mvwe eyileg mpi eli mpuy egnu eyitumike vear amuu ne kati egnu djwi na nkie. ³ Atum me atwung djwi vii agnu a wuo emipagnasu oshuong ekatsa mpama mpi oyiagni ngiwong, kamsi eyitubi me. ⁴ Yug kaku, ekasakum nsogn djwi na su, yug ntangu eyakum me ti atwung a Macedonia, (mpatuba ata vim djwi na gnu) otokugagni ve. ⁵ Wog enagn, ntotumagni atwung djwi wosarisagni na ngwong akab a vim ayipignu elaga; djwi makabu inagn iyi ngawong, na luzolo empea mpi ekwon ngya wotumagni na biu. ⁶ Jiagni gnugnun: Wur efuy itaang, ayakeagande ko itaang, mpi wur efuy entsign ayakeagande ko entsing. ⁷ Wur na wur apii n'oshin omibansande n'etura. Wur na wur apii epa n'ignie ve, epa na biu mpi ve. Djwi Nzeam aleang wur epea n'osiang. ⁸ Mpi Nzeam asoyuragninde gnu na wa ngrasia inde, djwi oyiagni na vim ankum, oyiagni na vim entsign djwi etshia enkum e wuo ekie gnu. ⁹ N'oshin omifugn wo: "Atikab otsun onde mpi atipea ya ankea emva." Masonga ende emisatsuga ntangu enkum. ¹⁰ Wur epea mbeam ya wur efuy evur ti mampa djwi n'olio onde, ayopeagni nde mbeam entsign. Ayopeagni nde entsign djwi na masonga egnu. ¹¹ Asopeagninde oshin onkum djwi ofuyagni n'etura e wuo e mpea vear, mpi vear entsign wakeari nsag-na-vie ya Nzeam. ¹² Djwi otshia e nkabula ene epa eli ko ya vear amidjir Nzeam ve. Eli vim epea osiang ti nsag-na-vie ya Nzeam. ¹³ Oshin omileang vear ankum, asikumisagnu Nzeam n'oshin olemfuka gnu n'along a Kristu. Asikumisagnu mpi Nzeam n'oshin opeagnu makabu djwi na wo ti djwi na wur na wur. ¹⁴ Oshin otsawo ndeangagni gnu, atsawonsama Nzeam djwi na gnu. Wakie oshin onagn djwi na ngrasia entsign e Nzeam eli ya gnu. ¹⁵ Nsag-na-vie ekey ya Nzeam djwi n'ikab inde epikug su na ntuba.