¹ Me, Paulu, ndawigna ya gnu, n'oshin e ngikra ti mawete e Kristu. Ndi na mawete ntangu eli me ne nteang egnu, kansi ndi na nkier yug ndi etey na gnu. ² Ndawigna ya gnu, ntangu eli me ondii omog ti gnu, kaku me na mfunu e ngya na kikesa ti ekaagn ve. Kansi ndabansa asiyiame na mfunu e ngya na kikesa ntangu esiyiame ne nteang e vear abansa wuwun sizinga n'oshin eleang djuung. ³ Ata silekien ne djuung, sipalua mbaagn n'oshin o djuung ve. ⁴ Djwi endug eleluiso na wo epa eli e oshin o vear ve. Kansi eli endug e biu e Nzeam djwi na mbuye mvuru i biu-biu. Elalima otuba oyang. ⁵ Silabuye mpi vim ankum amitsug wo dzug-dzug epijia Nzeam ve. Silevari nginu inkum na ndemfuka ya Kristu. ⁶ Mpi sili ngiwong na mpea ndola ya enkum ekie djwi inkwon ndefuka, tii ko ntangu eyakug gnu gnankum na ndemfuka. ⁷ Liragni wuo eli nteang egnu. Yug wur ajia ndenden ali ya Kristu, akani oshin oli nde ti Kristu, su mpi sili ya nde. ⁸ Ata ndatovey lokumu entsign djwi n'ekub esu, eyitepii Nkum djwi sotwungagni, epa djwi n'ompagnagni ve, mpafiyug nsogn ve . ⁹ Mpa leang epui kamsi ndopeagni mpay n'enkeana efugn me. ¹⁰ Djwi vear amuu wuwun: "Enkeana ende etuba vii a wuo mpi aletubi vii a biu-biu, kansi yug olir, eli ngilem mpi otuba onde epa eli wuo na ngyug ve." ¹¹ Ekug wuo oshin o vear ane wajii wuwun situba n'enkeana ntangu eli kaku su kog ve, eli vim eyakiesu yug sili kog. ¹² Sikatsa djwi watetsug nteang go siyer ti amuu aleling lokumu ewo wemie. Kansi yug waleyer wog na wog, enagn kaku wo na waagn ve. ¹³ Enkum enagn, sipakie omuong elenga onduu esu ve. Kansi asiyimasu ko n'onduu eyitepii Nzeam, onduu eli etey elenga ondii oli gnu. ¹⁴ Djwi sikalenga onduu osu ve, ntangu eyikum su ondii oli gnu. Ayisu vear a nteang ayikum etey etay eli gnu n'along a Kristu. ¹⁵ Sikakie omuong ndenga onduu etshia e vear amuu ve. Kansi, atsug su ekaagn, kamsi lukwikilu egnu etifuye, ondii ekiesu otshia asikum wo onen mpi ayasawotsiga ko n'onduu onagn. ¹⁶ Sitsug ekaagn neti djwi silong otuba o Nzeam ti ne viya ili etey na gnu. Sipakie omuong ve n'otshia omikie vear amuu. ¹⁷ Kansi yug wur alakie omuong, "aki ne dzin i Nkum." ¹⁸ Djwi epa wur awigni ndemie ve ndenden woleang ndug ali wuo, kansi Nkum ndemie wur esituba.