¹ Atwung, silokabagni ojiagni ngrasia e Nzeam emiyen wo ne mvuru i Nzeam i Macedonia. ² Ntangu eyii Nzeam alatesa ne mpay iwo inen, osiang oninen eyikiwo na wo ti omva eninen eyikiwo na wo emiwur otsun o ngaagn entsign. ³ Ndi ntiegn djwi apiwo n'etura emog, elenga kiteso eviya wo. Ti ne luzolo ewo, ⁴ ti ilewigni su na iluu, watewigna s'apii mbug siyii vear akie ti wo otshia e vear a kwikila. ⁵ Vii awo ekalog oshin oyibansi su ve, kansi, atigniwo mpea djuung iwo wemie ya Nkum, mby ya su ne luzolo e Nzeam. ⁶ Mby s'amiwignasu ya Tite aye nshira otshia onagn etay egnu kamsi eyibaninde. ⁷ Oshin olignu wuo ne vim ankum, ne lukwikilu, n'otuba, n'oshin onjia vii, mpi ne ngaagn oshin onkum, ti ne ngaagn egnu djwi na su, tshwagagni ko nteang n'otshia e ndeang vear. ⁸ Epa motumagni na biu ve. Kansi ndatuba djwi na njia masonga e ngaagn egnu na ndir oshin oyen vear amuu. ⁹ Djwi gnu ojiagni ngrasia e Nkum esu Yezu-Kristu. Ata ayiinde nkea otsun, akum nde omva djwi na gnu djwi n'omva ende okumagni ankea otsun. ¹⁰ Enagn, ndopeagni ilag ime djwi n'onsarisagni. Etikug mvwe emog, epa ko djwi abanignu na nkie vim emog ve, kansi ayiignu na luzolo enkie. ¹¹ Shiragni wog opeane. Djwi oyiagni na luzolo ti mpuy enkie wog, gnu mpi yagagni oshiragni oshin okug gnu. ¹² Yug oliagni na luzolo enkie otshia one, eli wuo ti vear mpi asijir wo. Itsin iwo efwete ngya ne vim eli wur na wo kansi epa vim eli wur akwon ve. ¹³ Etuba su ene epa na mpea amuu osiang ve djwi n'ompeagni gnu odzuru, kansi siling oyiagni oshin omog. ¹⁴ Otsun ognu e ntangu ene asikug wo na mfunu e vim aliwo na wo. Oshin omog, djwi otsun owo ekug na mfunu e vim alignu na wo, mby okugagni oshin omog. ¹⁵ N'oshin emifugn wo: "Wur eyiike na wo entsign akayia na wo e ngilega ve; mpi wur eyii na wo itaang akakwon ve." ¹⁶ Sipii nsag-na-vie ya Nzeam n'oshin omitsug nde ngaagn n'etura e Tite, ngaagn eli me na wo djwi na gnu. ¹⁷ Djwi akajir ko vii eayiling su ve, kansi ayinde mpi na mpuy enkukisa wog. Atiyia etay egnu na luzolo ende ndemie. ¹⁸ Sitotum nde ti otwung eli mvuru i Nzeam inkum walekab otshia onde elelong nde along a Nzeam. ¹⁹ Vim emuu, oson wo nde mpi ya vear a mvuru i Nzeam djwi akien nda su djwi na nkukisa otshia o nkie vii a wuo ene. Ene djwi na nkembo e Nkum ndemie, ti luzolo esu djwi na nsarisa. ²⁰ Situn wur atubi nda su djwi na makabu etura e wuo elevey su. ²¹ Sileling nkie vii a wuo, epa ko ne nteang e Nzeam ve, kansi eli mpi ne nteang e vear. ²² Silatum mpi otwung omuu ti wo. Simotesa mpi simoyen ali n'osiang na nkie etshia entsign. Opeane, ali mfunu djwi na ekaagn eninen eli nde na wo ya gnu. ²³ Mby djwi na Tite, ali wur etsa su nkie otshia ti nde mpi ewur eme otshia djwi ya gnu. Djwi na atwung asu, eli vear a mvuru i Nzeam watatum. Wali lokumu djwi na Kristu. ²⁴ Mby yegnagni wo ngaagn egnu, mpi yegnagni ti vear a mvuru i Nzeam itsin i djwi eli su n'omuong djwi na gnu.