¹ Atwung a ngaagn, djwi sili na elaga ene, sisuy djung isu na vim ankum etsampiy djuung ti mpeve. Sisadjiye ko mbug e santu na womo e Nzeam. ² Oteling'agni ondii! Kaku ata wur emog emikie su ipwo ve. Sitopii ata wur mpay n'etura ve ata na mvey vim ande ve. ³ Epa djwi n'ompeagni ewu ve mokabagni vii ane. Djwi atubime nteang omiveagni ondii n'itura isu; djwi siyi na luzingu go siwe ondii omog. ⁴ Ndi n'ekaagn enen na gnu mpi ndi na kiese djwi na gnu. Ndi n'osiang e ngishuna ata ne kati e mpay inkum ilisu na wo ene. ⁵ Ntangu eyiyim su Macedonia, djung isu itoyor ve . Ayisu na mpay eshin n'eshin ti wambaagn nelien, womo neti. ⁶ Kansi Nzeam etsa mpea biu ya vear ali ngilem apinde ntangu eyikum Tite. ⁷ Epa ko ntangu ekum nde ve etepii Nzeam biu. Eli mpi n'oshin oyiyamignu Tite. Atekabinde na ngaagn egnu eninen, na ngy egnu ti n'oshin olignu na mfunu eme. Enagn ampiwo osiang etsign. ⁸ Ata onkeana ome etopeagni ngy n'etura, nkayen mpay ve. Kansi ampiwo ngy ntangu eyiyen me etopeagni gnu ngy. Kansi ayug gnu ngy ko ne ntangu emog. ⁹ Opeane ndi n'osiang epa djwi ayug gnu ngy ve, kansi djwi ngy egnu emotshimagni itura. Ngy enagn ayiwo e wuo, wog enagn, kaku vim emiwuo gnu ve djwi na su. ¹⁰ Djwi ngy eleang Nzeam atsa wo mvara wur atshimi etura evara evug esikwon nde nkana. Kansi ngy e buu epea ewa. ¹¹ Yenagni onen o ngy e wuo emiwur ya gnu. Inaagn oshin nge emiyegnegnu na nkab gnugnu opijiagni ata djwi ve. Oshin o nkier enstigneyignu na wo, womo egnu, mpuy egnu, ngaagn egnu na ngyen wakii ko masonga! Ne vim ankum anagn, omiyegnagni gnemie gnugun opijiagni ata djwi ve ne vii ane. ¹² Ata ntofugnagni onkean ene, nkafugn djwi na wur emikie ipwo ve. Afugn me djwi ngyegne oshin olignu ti su wayen ne nteang e Nzeam. ¹³ Wog enagn sili na kikesa. Vim emuu elenga, djwi na biu esu, sili n'osing e ngilenga djwi n'osiang e Tite, djwi mpeve ende emiyia pwo djwi na gnu gnankum. ¹⁴ Mby yug ntikie omwong djwi na gnu, nkayia na nsogn ve. Kansi, oshin omog na vii ankum ayitubisu ayiwo e masonga, omwong osu djwi na gnu etay e Tite ayiwo e masonga. ¹⁵ Ngaagn ende djwi na gnu eli onen, ntangu elekey nde nkana oshin olemfuka ngu ti ohin eyoyamignu nde na womo ti ekukuma. ¹⁶ Ndi n'osiang djwi ndi na ekaagn entsign ya gnu.