¹ Djwi silekii otshia ondii omog, siwigna ya gnu na nkwon mvey ngrasia e Nzeam mpama. ² Djwi atuba ndenden: "Ne ntangu e wuo, ayug me bisamu iyie, mpi eshu evug, osarisi me." Yenaka ntangu e wuo, yenaka eshu evug. ³ Epa sitsug ibagu ne nteang e wur emog ve, djwi situn vear wakayen otshia esu mpama. ⁴ Kansi, n'oshin onkum, simiyegne susun sili vear otshia e wuo e Nzeam, wayii n'etura e wuo na nkwung, ne mpay eshin n'eshin, ⁵ ne wabolog, wambaagn, n'etshia e biu, ne okio, ne bisamu otshu, ne nziya, ⁶ ne nkwon mbin, ne njia, ne ngaagn, ne Mpeve-Santu, ne ngaagn e vi-a-vii. ⁷ Sili vear ande otshia ne otuba e masonga, ne biu e Nzeam, siyii na vim alwawo mbaagn na wo ne wum ewuo ti ne wear ewuo. ⁹ Silakie otshia kamsi vear apijia wo, kansi watejia wuo; kamsi vear amiwa kansi sili ne luzingu; kamsi vear ali ne ndola djwi na etshia esu kansi watobag vear ewu ewa ve. ¹⁰ Silakie otshia kamsi vear angy kansi sili n'osiang; kamsi ankea emva kansi ne mbug esu vear entsign walekum ankea otsun; kamsi vear akwon kansi sili na vim ankum. ¹¹ Vear a Kolinto, sitokabagni masonga enkum, mpi sitongamagni etura esu. ¹² Epa su vear amitshung itura ignu ve, kansi eli gnu vear alekum okieg na mabansa ignu gnemie. ¹³ Opeane, ndatuba kamsi ya aman ngamagni itura ignu. ¹⁴ Oyayiagni ondii omog ti vear akwon lukwikilu. Djwi, ngaagn nge etsankie masonga ti ipwo? Go ngaagn nge eli muinda na wo ti mpib? ¹⁵ Ngaagn nge Kristu esikug nde ngya na wo ti Belial? ¹⁶ Vim nge e nsiang eli wur e kwikila ti wur epikwikili? Ngaagn nge eli tempelo e Nzeam na wo ti biteke? Djwi sili tempelo e Nzeam e luzingu, kamsi etubi Nzeam: " Ayapieraka me ne kati ewo, mpi ayakienaka me ne kati ewo; Ayayia me Nzeam ewo, wo mpi ayayiawo vear ame. ¹⁷ Wog enagn: pueagni n'ondii oli wo, mpi namagni", etuba Nkum. "Oyakiragni vim a mbin ve, mby asoyamagni me. ¹⁸ Ayayia me Tea gnu, mby gnu, ayayia gnu djwi na me aman ame ampeam ti aman ame ankear", etuba Nkum Nkea biu.