¹ Wog enagn, djwi simivea otshia ene mpi oshin omiveasu ngy e Nzeam, sikwon na ndeem. ² Kansi simifanga vii a nsogn ti ali ngizuba. epa silazinga na waagn epwo ve, mpi epa sila dzum otshia o Nzeam ve. Kansi sileyegni masonga, silewigni na mpea itura isu ne nteang e Nzeam. ³ Kansi yug oshwong owuo elelong su eli ngidzub, enagn eli ngidzub ya vear aletsu ewa. ⁴ Ya vear anagn, nzeam e buu ene amibuye viy a waagn ewo vear apidjir. N'oshin onagn, wapikug na ngyen oveanga e oshwong o wuo ve ti nkembo e Kristu nde wur eli ignignig i Nzeam. ⁵ Djwi su, sipilelong djwi na su nkengasu ve, kansi djwi na Yezu-Kristu nde wur eli Nkum, mby su kamsi vear ande otshiadjwi na ngagn e Yezu. ⁶ Djwi Nzeam ndemie atubinde: "Oveanga ayapiyakawo ne kati e mpib," oveanga owo emipiey n'itura isu, djwi na mpea mwinda e njia nkembo e Nzeam, ntangu eli Yezu-Kristu aliko. ⁷ Nkansi sili n'otsun onagn ne mpugu i buu i mpieme, djwi biu eninen ene eyii ko ya Nzeam kansi epa ya su ve. ⁸ Sitikum vear a ngy n'oshin onkum, kansi epa vear a nsogn ve. Sili n'itura ipe kansi epa vear akwon ekaagn ve. ⁹ Waletepii mpay kansi watofangi vear ve. Waletedjag isur kansi watodjag vear ve. ¹⁰ Silevari ne djuung isu ntangu enkum ewa e Yezu,djwi vear wayen luzingu e Yezu ne djuung isu. ¹¹ Su vear ali ne luzingu, sili ntangu enkum ne nteang ewa djwi na ngagn e Yezu djwi luzingu e Yezuepwi ne kati e djuung isu vear. ¹² Wog enagn, ewa elekii etshia ne kati esu, kansi luzingu elekii etshia ya gnu. ¹³ Kansi sili na mpeve emog e lukwikilu n'oshin omifugn wo: "Ntikwikila mpi ndatuba." Sikwikila mpi, wog enagn silatuba mpi. ¹⁴ Silajia susun wur eyiibiyi Nkum Yezu ayakeande tebiya su mpi ti Yezu. Silajia susun ayatevara nde ti gnu ne nteang ende. ¹⁵ Vim ankum ali ntina djwi na gnu, djwi, oshin oli ngrasia ngimwang djwi na vear entsign, nsag-na viye asivean wo djwi na nkembo e Nzeam. ¹⁶ Wog enagn, sipikug na ndeem ve. Ata nelien e djuung isu sili ngibia, ne kati e djung isu, silekum vear ampa eshu n'eshu. ¹⁷ Djwi ivim i mpay ili ne ntangu fioti ene eletewong djwi na nkembo eninen e mvwe na mvwe elenga kiteso enkum. ¹⁸ Djwi sipilir vim ayen su na viy ve, kansi vim apiyen su. Vim ayen su eli djwi na ntangu e fioti, mby vim apiyen su eli e mvwe na mvwe.