¹ Yaku mu nganini mununu mana mu bongo nga tata. Bangunzu, ba bongo nga bampangi ba nge. ² Lu bongo banketu nga bangudi ba bana, ba bene bampini nga bampangi ba banketu mu mbundu yi bunkete. ³ Zitisi bafudi, bafudi ba kiediki. ⁴ Mana na mufudi wu munketu kene we bana holo batekulu, ka ba longo mu ku zitisi ntete bikanda biawu. Ba vutulu ku ba mbele ba butidi bawu mu diambu bwabunu ka zolawu Nzambi. ⁵ Mufudi wu kiediki wu wene yandi buhiki ka sia mbundu ku Nzambi. Ka sia mbundu kilumbu kiakulu yi mpibi yi mubi mu ku sambidi we ku lombo. ⁶ Munketu, wunu zingawu mu kiese kene wu fwa ata bu kene wu moyi. ⁷ Lu ba lombo bimi bini mu diambu ba yaku kala we bifu. ⁸ Ho mutu ka kebaku kikanda ki yandi ntete ba bene mu nkati ka kikanda, ka bisidi dikwikidi, mana kene nsidi Mupani. ⁹ Ku munketu, mu ku kala mufudi wu kiediki ka kala yi mamvulu ma ku masambanu mana ka kele we yakala di mosi. ¹⁰ Ka yabana mu bisalu biandi bi bunkete, ku kala na ka nsese bana bu bunkete, ka yembewu banzenze bu bunkete, ka sukelewu malu ma bandimi, ka sadisiwu ba ba kele mu mpasi we ku sala bisalu bi bunkete. ¹¹ Mana bafudi ba ba mpini, ba bisawu mu ku ba songidi mu mukanda. Mu diambu ba di hanawu mu biese bi lutu, Ba zolaku Kidisitu, ba zolele ba kwele. ¹² Mu bwabunu mi ba tadidi mu diambu ba lendoko disilu di bawu di ntete. ¹³ Ba tuku yiki bifu bi mbi. ba kwendawu mu ma nzo makulu, keku na ku kangala mpamba mpamba, we ku hoyi ku vulu, we ku koto misamu mi batu, we ku hoyi bi hoyi hoyi. ¹⁴ Nzolele na bafudi ba ba nketu ba bene bampini ba kwele, ba kumu yi bana, ba natisi ma nzo, mu ku kotisi mu misamu ku bambeni na ka sadidi mbi. ¹⁵ Mu diambu ba ba hiki ba balumuku, ba landa satana. ¹⁶ Ho munketu yandikulu kwikidawu kene we bafudi, ka ba sadisi mu diambu dibundu di yaku bongo kiyeke kini, mana di tala bafudi ba kiediki. ¹⁷ Bambutu ba natisawu bu bunkete ba bongo batu ba kiediki we dikumu di vulu ntete ntete. ¹⁸ Mu diambu masoniki ma hoyawu na ba fenoko ku kasa ngombo ku munwa ho ka dia kibundu, mana" wu salawu kisalu kene yi mfunu difutu." ¹⁹ we"lu yaku bongo mifundu mi ba fundidi mutu nkulu ho kweku yi bambangi bolo holo ba tatu. ²⁰ Mu bongo wu sala masumu ku dise di bakulu mu mpidi na ba hiki ba wa bomo. ²¹ Mpene nswa ku dise di Nzambi we Kidisitu Yesu yi bambasi ba sia ku dise, mu ku tala minsiku ku kondo ku kukatulu we ku kondo ku kutadidi misamu mi mbi. ²² Lu yaku sia batu moko lu koto mu masumu ma mutu hiki. Wu sala na mukiediki. ²³ Lu fenoko ku nwa mamba mana lu fete nwa bi malafu binkein mu diambu di disakisi we ku bele bela kunu. ²⁴ Masumu ma batu ba hiki ma yabana ata ba mu sambisoko. ²⁵ we masumu ma hiki ma kusawu ku manimi bwabunu bisalu bi hiki mpe bi bunkete bi yabanawu ata bi bihiki bi fanoko na lu bi sweke bi bi yabana bini.