¹ Ndingi yi yi fene mu ku sidi mbundu: Ho mutu ka zolele ka kala mfumu wu ba nganga_Nzambi, ka tuku dingi kisalu ki dikumu. ² Ku fene mfumu ba nganga- Nzambi ka kala mutu wu bunketu. Ka kala yakala wu munketu mosi. Ba yaku mu mono we diambu di mbi, ka kala mutu wu dikumu, ka yamba batu. Ka kala yi kikese ki ku lngo ndingi Nzambi. ³ Ka yaku di hana mu malafu, ka yaku kala ngolo mana ka kala mutu wu ku lebama. Ka yaku kala mutu mbi. ⁴ Ka natisi bu bunkete bunkete kikanda kiandi mana bana ba yandi ba mu lemvukidi. ⁵ Mana na mutu ka yeboko ku natisi kikanda ki yandi, nki mpidi ka fene ku natisi dibundu di Nzambi? ⁶ Ka fenoko ku kala Mukidisitu wu mpa, mu diambu ka yaku kala yi dilendu holo ka bongo ndolo yini ka bongele satana. ⁷ Ku fene ka kala yi kimbangi ki bunkete ku ba bene ku mpenze, mu diambu satana ka yaku mu monini we ku bwa mu mutambu mufu. ⁸ Ba ba sadisawu dibundu ba kala batu ba dikumu, ba kala kiana we ba ba huna. Ba fenoko ku nwa malafu holo ba fenoko ku kala yi misamu mi mbi. ⁹ Ka batidi binsweke bi dikwikidi ba tuku tu songidi bi kondele yi mabanza ma mbi. ¹⁰ Ba fene ba ba meke ntete, ku manimi na ba nungu ba fene ku ba bongo nga bisadi. ¹¹ Bnketu mpidi mosi, ba kala batu ba dikumu. Ba yambulu ku kala ba ba nsubawu ba kala yi bifu bi bunkete we kulemvuku mu misamu miakulu. ¹² Ba ba sadisawu dibundu ba fete kala we munketu mosi. Ba natisi bu bunkete bana ba bawu we bikanda biawu. ¹³ Mu diambu ba ba sadidi bu bunkete, ba bongele kiziki ki dikumu we ku cha mbundu bungi mu dikwikidi di diene mu Yesu Kidisitu. ¹⁴ Yi ku sonokenene bimi bi, mana yi tuku zolo yisi ku wene nge bilumbu bi. ¹⁵ Mana ho yi tuku hingidi, nsonokene mu diambu wu yaba bwe fene ku di natisi mu kikanda ki Nzambi, bunu kwene nzo Nzambi, mpanda yi simbawu misamu mi kiediki. ¹⁶ Mana ba fenoko ku bisi musamu wu kiediki wu monokene ku mutu wunu tambusulu ngolo:"Ka monokene mu kimutu, mana mpefu Nzambi yi mu nungisi, mambasi ke ma mwene, ma nsi makulu ke ma wudi musamu yandi,ba mu tambusele mu ma nsi makulu ba mu hele dikumu ku zulu."