¹ Yi lu lombele ku dise di bimi biakulu, ku dingi, bisambu bi mpidi yi mpidi, tu lombawu, we matondo mu diambu di batu bakulu. ² Mu diambu di bamfumu ba mbutu we ba ben mu biyeke, mu diambu ba nata dizingu di bunkete we di malembe, di ku kondo bifu bi mbi we ku kala mutu wu bunkete. ³ Bi biakulu bi monikawu bi bunkete ku dise di Nzambi ngulusu betu. ⁴ Ka zolele batu bakulu ba huluku, mana ba yaba nsangu za kiediki. ⁵ Mu diambu Nzambi kene yandi mosi we mutu wunu sangisa Nzambi we batu, Kidisitu Yesu. ⁶ Wu wu di hene yandibene nga kimenge mu diambu di bakulu, kini kiene kimbangi ba hene mu tangu di fene. ⁷ Kisini ki bwabunu ba nsidi mulongi we ngenzi, yi, hoyawu misamu mi kiediki yi tuku hunoko yene mulongi wu Bamimpani mu dikwikidi we mu kiediki. ⁸ Nzolele na batu ba sambidawu mu kiziki kiakulu, we ku zangunu moko ma kondo masumu ku zulu ku kondo nkabu we ku nwanini. ⁹ Mpidi mosi nzolele banketu ba vata bunu ba vatawu, we ku lemvuku we ku di yala. Ba yaku sumbu ata nsuki, ata wolo, ata bimi bi matu, holo milele mi ntalu. ¹⁰ Mana ba vata bi biene bini bi bunkete ku banketu ba ba longawu bifu bi bunkete mu bisalu bi banketu. ¹¹ Munketu ka fete ku longoko mu ku kondo ku hoyi we kiese kiakulu. ¹² Tuminoko na munketu ka longo holo ka bongo kimfumu ki yakala, mana ka sala wu sibama. ¹³ Mu diambu Adami ba mu sadidi mutu ntete, ku manimi yi bese sala Eva. ¹⁴ Mana keku Adami wu ba hunini, mana munketu wu ba hunini bungi wu sumukini mu ku bungu minsiku. ¹⁵ Mana ka huluku na ka kala yi bana ho ka cha mbundu mu dikwikidi, we dizolo we kimpefu we mabanza ma bunkete.