¹ ''Bakwesu a bamatata, amuvwe kukwabilila nkwizanda kupa kulindimwe.'' ² Ono imbunga niyakavwa Paulo kaambo muci Hebulayo, bakaumuna. wakaamba, ³ ''Ndimu Juda, wazhalilwa mu Tarso wamusilisia, pesi ndakalila mudolopo ei kumapanta a Gamaliyeli. Ndakalaililwa kwendelana azhila yamilawo iyumu ya bamatata. Ndimunkutwe wa Leza, mbona mbumubele boonse sunu. ⁴ Ndakampenzha muzhila yenka iyi kushikila kukuyaya, kwaanga akupaku ntolongo boonse basankwa abamanakazhi, ⁵ mbuli mupaizhi munene abamanene mbunga bapa bumboni. Ndakatambula makalata kuzwa kuli mbabo abakwesu mu Damasica, akuyankuko kubazhola kaabangilwe mu Jelusalema kwamba bapewe ciisubulo. ⁶ Caciitila kuti nindakakwenda akuswena ku Damasica, ciindi camashikati ndilyona mumuni ubazha kuvwa kujulu wakamweka kunzhinguluka. ⁷ Ndakawila panshi akuvwa lizwi lyamba, Saulo, Saulo, nciinzhi nciumpezhela?' ⁸ Ndakaingula,' Ndiweni, mwami?' wakaamba kulindime, 'Ndime Jesu wa Nazaleta, ngutokumpenzha.' ⁹ Bakali andime baubona mumuni, pele taku nabakazhiba lizwi lyawezo uwakabandika kuli ndime. ¹⁰ Ndakaamba,' Nciinzhi ciinkaciita, mwami?' mwami wakanambila,' nyamuka uye ku Damasica. uko ulakwambilwa zhoonse nzhiwelele kuciita.' ¹¹ Ndakaalilwa kubona kaambo kamumuni umwekesha, akusololelwa amaza yababo balinga andime, ndakashika ku Damasica. ¹² Kwalo ndakaswanganya musankwa uitwa Ananiya, musankwa wa kaalyaba kwendelana a mulawo akukwata impuwo imbotu kubama Juda boonse bakalinga kukala nkuko. ¹³ Wakaza kulindime, waimikana ali ndime ukwaamba,' Saulo mukwesu, yaluka meenso' mulyola ndyona ndakamubona. ¹⁴ Mane wakaamba,' Leza uwabamatata besu wakusala kuzhiba luyando lwakwe, kubona ululeme akunvwa lizwi kuzwa mumulomo wakwe. ¹⁵ Ubobo ulakuba kamboni wakwe kubantu boonse kujatikizha nciwabona akunvwa. ¹⁶ Ono ncinzhi colindila? Nyamuka, bbizhigwa, akusanzha zhinyonyono zhako, kwiita palizhina lyakwe.' ¹⁷ Nindazhoka kuvwa ku Jelusalema, anindakakupaila mutempele, ndmpewa ciilengano. ¹⁸ Ndaamuubona uladambila,' Fwambana uvwe mu Jelusalema ndilyona, nkaambo tabakazumini bumboni bwako kujatikizha andime.' ¹⁹ Ndakaamba,' Mwami, baalo beene balizhi kwaamba ndakaanga akuuma abo balikushoma mulindimwe moonse mu masinagogo. ²⁰ Ono bulowa bwa Sitefani kamboni wako nibwakatiilwa, andime bdakakuzhimine afwafwi akuzuminizha, alimwi ndaalikulindilila zhisani zhabaabo baakamujaya.' ²¹ Pele wakadambila,' kooya kaambo ndakutuma kuulamfu kubamashi.''' ²² Bakaamunyufwila kushika na kaamba nakaambo ici. Mane bakoompolola a kwaamba,'' Azwe ulimbuli boobu mu nyika, ubobo tacelele kwaamba a pone.'' ²³ Niba kakucioompolola, kusowaila zhisani zhabo, akusowaila lusuko mujulu, ²⁴ Mwedelezhi munene wakalailila kwaamba Paulo aletwe mukati. Wakalailila kwaamba abuzhiwe mibuzho akuumwa, kwaamba awalo mwiine azhibe ciibali kumoompololela. ²⁵ Ono nibakamwanga amatambo, Paulo wakaambila mweedalezhi munene walinga mufwifwi,'' sa cilimumulawo kuuma musankwa wamu Roma alimwi utana kubetekwa?'' ²⁶ Ono mweendelezhi munene nakanvwa ici, wakaya ku mweendelezhi munene alinguwe akumwambila ati,'' Ncinzhi ncimuzanda kuciita? kaambo wezu muntu muzhale wamu Roma.'' ²⁷ Mweendelezhi munene wakaza akumwambila,'' Ndambile, sauli muzhalwa wamu Roma?'' Paulo wakaamba'' mbombubo.'' ²⁸ Mwendelezhi munene wakaingula,'' maali maangi ngundakaula buzhalwe.'' Pele Paulo wakaamba,'' Ndakazhalilwa mu Roma.'' ²⁹ Bamasankwa bakakwile kumubuzha bakamushiya mukufwambana. Awalo mweendelezhi munene wakayowa nakazhiba kwaamba Paulo muzhale wamu Roma, kaambo kamwangile. ³⁰ Buzuba bwakacilila, mweendelezhi munene wakayanda kuzhiba bwini bwama Juda akutamikizha Paulo. Ono wakamwangulula akulailila ba mampaizhi banene ababeteshi kuswangana. Mane wakaleta Paulo akumubika akati kabo.