1 Bamwi bamasankwa bakaza kuzwa ku Judaya kuza ku Antiyokeya alimwi akuisha bamakwabo, kwaamba,'' cita kopalulwe mbuli ciyanza ca Muusa, ngatofutulwi.'' 2 Ici cakaleta Paulo a mbanabba kukazhanya kunene alimwi akubandizhanya mbabo. Ono Paulo a mbanabba abamwi kuzwa mulimbabo bakasalwa kuya ku Jelusalema kuswanganya bashiciya alimwi abamanene kujatikizha mubuzho oyu. 3 Balo ono, balinga kutuminwe a cikombelo, bakainda moonse mu Phonisha amusamaliya akwa mbilizha kusanduka kwa bamashi. Bakaleta kukondwa kubaazha kubamakwabo. 4 Nibakashika mu Jelusalema, bakatambulwa uba cikombelo alimwi uba positola alimwi uba manene, alimwi bakaambilizha zhintu zhoonse Leza nzhakacita zmbabo. 5 Ono bamwi basankwa bakashoma, naali mwimbunga lyaba Falisi, banyamuka akwaamba,'' cilyeelele kubapalula alimwi akuba shinikizha kubamba mulawo wa Muusa.'' 6 Ono bashiciya alimwi abamanene bakabungana antomwi kulanganya makani aya. 7 Nibaamana kubandika kubandika kwaciindi ciilamfu, Petulo wakanyamuka akubambila ati.'' nobamakwesu, mulizhi kwaamba kalekale Leza wakapanga muzeezo akati kenu, kwaamba kwiindila mumulomo wangu bamashi batelele lizwi lya makani mabotu, alimwi bashome. 8 Leza, uzhi mozo, ulapa bukamboni kuli mbabo, kubapa muuya usalala, mbona mbwakaciita kuli ndiswe. 9 Alimwi taaku nakaandanya akati kandiswe abalo, kupanga myozo yabo kusalala alushomo. 10 Ono cinzhi ncomumweelezhela Leza, kwaamba mubike ijoko panshingo yabashiciya lyalo naba bamaishiwesu naba ndiswe twakakilwa kulinyamuna? 11 Ono tulashoma kwaamba tuyofutulwa kwiinda muluse lwa mwami Jesu, mbuli mbubakalinga.'' 12 Onse mabunga akaumuna akunyufwila mbanabba alimwi a Petulo nibakalinga kwambilizha zhitondezho alimwi a zhiyosho Leza nzhakaciita akati kabashi kwindila mulimbabo 13 Nibakacileka kwaamba,Jacobo wakakumbula, akwaamba,'' nobamakwesu,'' amunyunvwe. 14 Simoni wakaamba mbuli Leza mbwaka tanguna kuyovwa bamashi caluse kwaamba abweze alimbabo bantu ba zhina lyakwe. 15 Mazwi abanshinshimi alazuminana aceci, mbuli mbucilembelwe, 16 'Zhakwiinda izhi zhintu ndakuza, alimwi ndakuyaka alimwi litente lya Davida, lyalo lyakawa; ndakaabusha matongo alimwi, 17 kwaamba ati bashilizhi bakalangaule mwami, kusanganizha boonse bamashi baitwa mwizhina lyangu.' 18 Mbubobu bwaamba mwami, wacita zhintu izhi zhazhibwa kuvwa ciindi cakale-kale. 19 Aboobo, muzeezo wangu ngwakwamba, tutapezhi abo bamashi basandukila ku Leza. 20 Pesi tulabalembela kwaamba ati balitatamune kumuzhimu, kubwaamu, alimwi akulya banyama balifwila, alimwi akubuliwa. 21 Mukuti Muusa wakakambaukwa mumadolopo yoonse kuvwa muciindi cakalekalw alimwi ulabalwa muma sinagogo muma nsabata onse.'' 22 Ubobo calibonya kabotu kubashiciya, ubamanene, ocikombelo coonse, kusala Judasi uwitwa Banabbasi, alimwi Silasi, balinga kusololela cikombelo, akubatuma ku Antiyokeya a Paulo alimwi a Banabbasi. 23 Bakalemba ici amanza abo,''kuzwa kubatumwa a bamanene, bakwaanu, kuli bamashi bakwesu baku Antiyokeya, Siliya, Silisha: Ndamwazha! 24 Twatelela kuti bamwi basankwa baazwa kulindiswe, katutabatumine, bamunyonganya ushiisho shicimya myuuya yaanu. 25 Ono mbucaba bobo, toonse twanyufwana kusala bamasankwa akubatuma kulindimwe atoomwi amuyandwa wasu Bbanabasi a Paulo, 26 bamasankwa bakabika buumi bwabo muntenda kaambo kalizhina lya mwami wasu Jesu kilisitu. 27 Abobo tulatuma Judasi a Silasi, bashi bakamyambile cintu cikonzhana mumazwi abo. 28 Nkaambo cakalibonya kabotu ku muuya usalala akulindiswe, kutamibikilila mukuli ubazha kwiinda shintu sheshi zhiyandika: 29 Nkwaamba mulileshe kuzhintu zhipaizhigwa kumitumi, bulowa, zhintu zhishinwa, akubwaamu. Na mwalilesha kwazwa kuzhintu izhi, cilakabota kulindimwe. Mushalekabotu.'' 30 Ono baalo, nibakaya, bakaselemukila ku Antiyokeya; nibakabunganya makamu antomwi, bakapa lukalata. 31 Nibakalubala, bakasekelela kaambo ka kuzumikizhigwa. 32 Judasi a Sailasi, abamanshinshimi, bakazumyamya bakwabo amazwi manji akubazumya 33 Nibakakala ciindi cilaamfu kulya, bakatumwa kuvwako muluumuno kuzwa kubakwabo balinga kubatumine. 34 Pesi cakabolela Sailasi kushalankuko. 35 Pesi Paulo a Banabbasi bakakala Antiyokeya a banjianji bamwi, kolya kobakaisha kukambauka lizwi lwa mwami. 36 Nikwakainda mazuba Paulo wakaamba kuli Banabasi,'' atuzhokele ono tukaswaye bamakwesu mumadolopo yoonse mutwakakambauka lizwi lya mwami, tukabone mbubabele.'' 37 Banabbasi wakayanda kuti batolelele Johani, wakakwitwa ati Maako. 38 Pesi Paulo wakatelaika kuti tacili cibotu kubweza Maako, wakabashiya ku Pamfiliya akutazumanana ambabo mumulimo. 39 Ono kwakaba kukazhanya kunene, caakuti bakaandana kuzwa kuli umwi a umwi, amana Banabbasi wakabweza Maako akukwasula kuya ku Sipulasi. 40 Pesi Paulo wakasala Sailasi akuya, nakashomwa a bakwaabo kuluse lwa mwami. 41 Amana wakainda mu Siliya a musilisiyo, kuzumyazumya zhikombelo