¹ 1. ताहा येशू तिया नासोरी गावूम आलो आने तिया फासला फासला तिया चेला बी आला. शब्बाथ दिहाल येशु देवलाम परमेश्वरा हाऱ्या गोठ्या हिकवुतलो ताहा बाद्दा माहान नोवाय वाट्यो ² ताहा ते आखा लाग्या की ईयाल ऐ गोठ्या काहीने मालुम पोड्या ? ईयाल ओती ओक्कोल काहीने आल आने ईया आयूकी ओता मोडा चमत्कार केहकी वेताहा. ³ ओता तोज कने जिया याहकी मरियम हाय आने इया पावुहू याकोब, योसे, यहुदा, शिमोन हाय आने इया बाहको हुताऱ्यो हाय आने आपु आरी हो ऐ तियाज भोया हाय कने ? ⁴ फासे येशुय तियान आख्यो, “जे भविष्यवक्ता होय तिया सन्मान जातूलाम नाहा वेता ऐहकी नाहा हाय, पेने तिया नगराम आने जातुलाम तिया कुटूंबाम तिया सन्मान नाहा वेतो.” ⁵ आने तिरहाम थोडाचे लोकापे आथ थोविन हारे केये बास तिया शिवाय तियाल बिजे महत्तवा काय नाहा केता आलो. ⁶ तिया भोरुसो विन तिया नोवाय वाट्यो फाचे येशु परमेश्वरा हाऱ्या गोठ्या आहील्या पाहील्या गावून हिकवुतो फिऱ्यो. ⁷ फोचे येशूय बारा चेलाहान दादे आने तियान बेन बेन जुवानू जोडी की मोकला लाग्यो. तियाय तियांन पुथडे काडुला अधिकार देदो. ⁸ आने तियाय तियान आख्यो की “जाहा तुमा जाहा लाकडी शिवाय बिजो काहिज नाय लेवूला नाहा मान्डो लेवूला, नाहा झोकी लेवूला आने पायसा बी नाय लेवूला. ⁹ पेन चापले पोविन निगजा आने बेन डोगल्या नाहा पोवा. ¹⁰ आने तियाय तियान आख्यो जि कोवाम तुमा जा तिहीाने नगराल हुदरुतो नाहा तावक लुग रेजा. ¹¹ आने जिही तुमा जाहा तिही तुमा स्वागत नाहा केयो आने तुमा गोठ्या नाहा ऊनाया गी नाही लाग्या तिहीने निगीन जाती वेला तियान साक्ष देवुला ती इकी आपु पागु ऊदलो तिहीज फोकडी डेऊला. ¹² फाचे चेला तिहिने निगी गिया आने लाकाहान पापाहा बद्दल पासतावो केरा ऐहकी आखता फिरा लाग्या. ¹³ आने तियाहाय खुबूज पुथडान लोकाहामने ओडी काड्या आने खुबूज दुखाहान तेल लागवीन हारे केये. ¹⁴ हेरोद राजाल येशू बद्दल मालुम पोड्यो, काहाका येशू बद्दल बादहा लोकोहान मालु आथो, ते आखतला बाप्तिस्मा देनारो योहान मोलामेने फाचे उठ्योहो, तिया खातोरुज तियाकी इ नोवाय लागे एहेंडे मोडे मोडे कामे वेतेहे. ¹⁵ बाकी लोक आखतला “येशू आ एलीया हायख् बाकी लोक आखतला आगला जे भविष्यवक्ता आथा तियामेरोज ओ बी भविष्यवक्तो हाय. ¹⁶ पेन इ उनाइन हेरोदाय आख्यों जिया योहाना मुनको माय तोडी टाकावलो तो जिवतो वेयोहा.” ¹⁷ हेरोदाय तिया पावहु फिलीप इया थेयील राखी लेदली आथी इ गोठ तियमा विरुध्द हाय एहेंकी योहानाय हेरादाल आख्यालो तिया खातोर हेरोदाय माह मोकलावीन योहानाल तिइन आवीन कोंडी देदालो. ¹⁸ इ तियाय तिया पावहा थेय हेरोदिया खातोर केया काहाका तो पावाहा थेयील राखुनू इ तो चूक हाय एहेंकी योहानाय हेरोदाय आखलो. ¹⁹ इया खातोर हेरोदिया योहाना आरी दुश्मनी किइन तियाल माय टाका आथो पेन तेहकी नाय वी सेक्यो. ²⁰ काहा का योहान धर्मी आने चोखो माहू हाय इ जाईन हेरोद बितलो आने तियाल सामभालतलो. योहान जाहा हेरादाल गोठ्या आखे ताहा हेरोद काबराय जातलो पेन तेबी खुशीकी गोठ्या उनाय लेतलो. ²¹ फाचे एक खुबूज आनंदा दीही आलो तो हेरोद राजा जोन्मा दिही आथो तिया खातोर तिही तियांय तिया माडा अधिकाऱ्याहान माडा सिपाडाहान आने गालील देशुमने पुढारी लोकांहान मांडो खाआ खातोर हादले. ²² ताहा हेरोदिया पोयरीय माज जाईन नाच काम केयो, तो विन देरो आने तिया आरी जे लोक आथा तिया बादाहान खुश केये, हेरो राजाय तिया पोयरील आख्यो आज तुल जो मानगुला हाय ती तुमा आय आय तुल तो देहे. ²³ हेरोद तिया पोयरील शपथ लिन आखेहे, तु जो बी मां वे मागहो तो आय तुल देहे, मापे आरदो राज्यो मानगोहो तेबी आय तुल देहे. ²⁴ ती बारे गिई तियु याहकिल फुचा लागि, “आय काय मांगु ?” तियु याहाकिय आख्यो कि “तु बाप्तिस्मा केनारा योहाना मुनको मागे.” ²⁵ ताहा राजो निराश वी गियो, पेन तियांय शपथ खादली आथी तियुकी आन आरी जे लोक बोठला आथा तियांहाकी ती गोठ तियांय पुरीज केरा पोडी. ²⁶ ताहा ती पोयरी तुरुतूज माज राजाही जाइन आख लागी “मान बाप्तिस्मा केदनारा योहाना मुनको एकी थालीम थोविन आमीज मागावी दे.” ²⁷ राजांय तुरुतूज योहान मुनको वाडीन ली आवा खातेार एक सिपाडाल हुकूम दिइन जेलाम मोकल्यो, सिपाडो जेलाम गिया आने याहाना मुनको वाड्यो. ²⁸ तोज मुनको थालिम थोविन ली आविन राजा पोयरील देदो, आने पोयरीय याहाकील देदो. ²⁹ इ उनाईन तिही योहाना चेला आला आने तिया डिल उखलिन माहाणाम थोवी देदो. ³⁰ फाचे प्रेषीत लोक येशुय टोलवाया, आने तियाहांय जो काम केयो, जो हिकव्यो तो येशुल आखी देखाव्यो. ³¹ ताहा येशूय तियाहान आख्यो, “चाला आपे जोंगलाम शोत जागावे जाईन थेडाक आराम किहू, काहाका तिही खुब लोक आवतला आने जातला तिया खातोर तियाहान मांडो खावुला बी वोखोत नाय मिलतलो. ³² ताहा ते उडीम बोहीन जोंगलाम तिगी गिया ³³ पेन खुबूज लोकाहाय तियाहान जाता देखीन ओखी लेदो आने तिया बादा गावूमने लोक चालतांज निग्या, ते दोवडीन येशु आने तिया चेलाहा पेहलाज तिही जाय पोच्या. ³⁴ येशू उडीमने उतेहे ताहा तियांय खुबूज लोक टोलवाला देख्या, तियाहान विइन दोया की आली काहाका पालनारा नाहा रोता एहेंडा मेडाहां होच ते आथे. आन तो तियाहान खुबूज गोठ्या हिकवा लाग्यो. ³⁵ जाहा वाअतो पोड्यो ताहा येशू चेला येशूय जाईन आखताहा, “आपे जोनगलुमने जागो हाय आने वाअतो पोडी गियोहो. ³⁶ तु लोकाहान आखी दे ताहा ते गावाहाम आने खेतुम जाइन तिया तियाहांज खावनु बेचातों ली आवी.” ³⁷ येशुय चेलाहान आख्यो, तुमाज, तियाहान काय तेबी खावुला द्या. “आमा बेत होव चांदी रुप्याहा मांडा बेचाता ली लावीन देजी का ?” ³⁸ येशुय तियाहान आख्यो, तुम्हा जा आने लोकाहान फुचा तुम्हाप कोता मांडा हाय जाइन लोकांहान फुच्यो ताहा तियाहांप बाय पाच मांडा आने बेन मासे ओतेज आथे. ³⁹ येशूय तियाहान आख्यो, लोकाहा चारापे टोला ओलाकी बोहीजा ⁴⁰ ताहा लोक होव - होव आने पाच्हा-पाच्हा ऐहकी टोलाम बोठा. ⁴¹ ताहा येशुय ते पाच मांडा आने बेन मासे आथाम लेदे आशिर्वाद मागीन मांडा मुड्या आन वाटी खावावा खातोर चेलाहान देदा, ते मासे बी बांदाहान वाटी देदे. ⁴² ताहा बादा लोक खाइन ताराया, ⁴³ आन वादला मांडा तुकडाहा की बारा सिबले पोराये आने थोडेक मसये बी वादी गेहले. ⁴⁴ मांडो खानाराहाम आदमीज पाच हाजार आथा ⁴⁵ येशुय तुरुतूज तिया चेलाहान आख्यो आय लोकाहान वाटे लागवूहू तांव तुमा उडीम बोहीन फुगारा ती तोडीपे बेथसैदा गावाम जा. ⁴⁶ आन तो लोकाहान वाटे लागवीन एखलोज डोगापे प्रार्थना केरा गियो. ⁴⁷ वातो वी गियो ताहा तियांहा उडी फुगरा भोर वोचमे आथी आने येशू एखलोज तोरतीप आथो ⁴⁸ जाहा वारो हूंबूरने खुबूज चालतलो तिया खातोर ते पाटला ठोकी-ठोकींन थाकी गेहला, इ येशूय देख्यो ताहा वेगरे तीन ते सोव वाज्ये वेरी येशू पांयापने चालीन तियाहांही आलो, तो तियाहांसे आगाडी निंगी जानारो आथो. ⁴⁹ पेन चेलाहांय तियाल पायावे चालता देखीन “आ पुथ हाय एहेंकी होमजीन खुबूज बोंबली उठ्या काहाका ते बादा तियाल विइन काबराय गेहला. ⁵⁰ पेन येशूय तुरुतूज तियाहा आरी गोठ्या केरा लाग्यो “हिंमत तेरा आंय हाय, बियाहा मां” ⁵¹ तो उडीम चोडी गियो ताहां बारो ठाको रियो,इ विइन चेलाहान खुबूज नोवाय लागी. ⁵² काहाका तियाहान मांडा गोठी ओर्थ होमजायो नाहा. काहाका तियाहा मोने कठीण वी गेहले आथे. ⁵³ फाचे ते तिया तोडीपे गनेसरेत सेहेराही जाय पोच्या, आने उडी तोडीपे बांदी थोवी. ⁵⁴ आन ते उडीमाने उततांज लोकाहाय येशू आख्यी लेदो. ⁵⁵ आन ते लोक पाहीने बादा येशू जिही हाय एहेंकी मालुम पोडतलो तिही ली जा लाग्या ⁵⁶ आन येशू गांवाहाम, खेताहाम जिही बी जाहलो, तिही लोक दुख्याहान बाजारा वेसला जागाम ली आवीन थोवतला आन येशूल राव्या किइन आखतला, तु तियाहान तो पोतडाहा कोर तेबी आथली ला दे आने जोता दुखी लोक तिया पोतडा कोराल आथलुतला ते बाद्दाज हारा बी जाहला.