¹ तिया टेमावे ईशु चेला ईशुही आला आने फुचां लाग्या का, "होरगा राज्याम बादाहां से मोडो केडो ? ² ताहा तियाय एक हाना पोयराल तियाही हादीन तियाहाम हेवे उबाे केअयो. ³ आने आख्यो, "आंय तुमाहांन खेरोज आखंहु, तुमा मोन बाेदलीइन इया पोयरा होच वेअया वाची तुमाहांन होरगा राज्याम जावानारोज नाय." ⁴ इयाखाताेर जो केडो माअंहु साेवताहा इया पोयरा होच नंम्र मोना वेअहे, ताेज हारेगा राज्याम बादाहां से मोडाम मोडो उबजी. ⁵ आने जो केंडो माअहु एहंडा एका हाना पोयराल मांय नावाकी स्वीकारी लेहें, तोअ मान हादी लेहे. ⁶ पेन जो केडोबी माअवे विश्वास थोवनाराहांमने एकाल विश्वास थोवून से दुर की, दी, तियाल वेअनारी विहिरी मोडाम मोडी शिक्षा से तिया कोगीम मोडो डोगडो बांदीन, तियाल फुगाराम पांअयाम बुडवी देवनू इं हाराम हाराे हाय. ⁷ प्रभुवे विश्वास थोवजाहान विश्वासामेने दुर ली जातेहे, तियाकी बाकी दुन्या वे पीडा आवी काहाका विश्वास्याहान विश्वासामेने दुर केअनारा नक्कीज हाय, पेन जो माअहुं विश्वसाहान विश्वासामेने दुर केअहे तियावे ती पीडा आवी. ⁸ तोअ आथाकी नेता पागकी खोटं काम किइन तु विश्वासामेने दुर वी जातो वेरी ता, तु तिवाहान पाडीन फेकी दे! तोअ वेन आथ वेन पाग हाय आन तु नाेरका आगीम टाकाम जाहो, इया से ठोठयो नेता लेंगडो विइन होरगा जावनु इं तोअ खाताेर हारो हाय. ⁹ तोअ डोआकी तु विश्वासामेने दुर वी जातो वेरीता तियाल काडीन फेकी दे, वन डोआ रीइन नरक आगीम टाकाय जावनु इया से, काण्यो विइन होरगाम जावनू तोअ खाताेर हारों हाय. ¹⁰ देखा, इं हाने पोयरे कावींज काम्ये नाहा, एहेकी मं होमजाहा आंय तुमाहान आखंहु. इया हाना पोयराहा दुत होरगाम सादा मांआ होरगामेने बाहका आरी रेतांहा. ¹¹ जें लोक टाकाय गेहला हाय, तियाहान वाचावा खातार मा अहा पोयरो आलाले हाय. ¹² तुमाहांन काय होमजायेहे जर एगदा माअहांवे (१००) होव मेंढे हाय. आने तियाहामेने एक मेंढे टाकाय गियोतां तोअ काय केअनारो ? (९९) नांव्यानांवे मेंढे तिहिज दिन, डोगाम जायन टाकाय गेहला. मेंढाल नाय होदनारो का ? '' ¹³ आने तिहिनं माअहाल तोंअ टाकाये गेहलो मेंढो सापडयोता, तोअ किदिहीज टाकाये नाय तिया (९९) नांव्यानांवे मेंढा खाताेर जी खुशी तियाल वेअहे, तियासे वाद खुशी तियाल टाकाय गेहला एका एका मेंढाखाताेर वेअनारी. ¹⁴ एहेकीज, इया हाना पोयराहा मेने एकाबी नाश वेरा नांय जोजे एहेकी तुमा हारेगा बाहका मोरजी हाय. ¹⁵ जर तोअ विश्वासी पावाहाय तोअ विरूध्द पाप केअयोता तुं तियाही जो आने तुमा बेनी एखलाज रिहा तांहा तु तियाय केअलो पाप आखी देखाव, जर तियाय तोअ आखली गोठ मानी लेदी ता तुयुंय पावाहाल मिलवी लेदों. ¹⁶ पेन तियांय तोअ गोठ नाय मानी ता तुं आजी एक नेता बेन लोकाहांन आरी लीइन तियाही जों," ती गोठ खेरी साबुत बेरांखाताेर बेन नेता तीन साक्षीदाराहां जरूरी हाय. ¹⁷ पेन तोअ तियाहाथी नांय उनायीता मंडळी लोकाहान आखी देखाव आने तोअ मंडळी लोकाहा बी नांय उनायीन तो तुल दुन्यामेने अविश्वासी लोकाहा होच आने करपट्टी लेनाराहां होच वेरी. ¹⁸ आंय तुल खेरोज आखेहुंका जो काय तुमा तोरतीवे मान लेताहा तोअं होरगाम मानाय जाय आने जो काय तोरतीवे नांय तोअ होरगाम वी नांय मानानारो. ¹⁹ आजी आय तुमाहान आखंहु का तोरतीवे तुमाहांमेने जाे एका मोनाकी काय बी वस्तु मिलवां खाताेर प्रार्थना करीता, मांअ होरेगामने बाहको तियांहान ती वस्तु दी देनारो. ²⁰ काहाका तिही बेन नेता तीन जां मां नांवाकी एखटे वेतेहे, तिही आय तियाहाम रिंहु. कृतज्ञ चाकरा दुष्टांत. ... ²¹ तांहा पेत्रांय तियाही आवी तीयाल फुच्यो, ओ प्रभु मांअ विश्वासी पावूहु माअ विरूध्द गुनो केअतो रियो ता आंय तियाल कोती दाव माफ किवं? सात दाव लुग का ? ²² ईशुई तियाल आख्यो " सात दाव एहेकी आंय तुल आखतो नाहा पेन साता सत्तर दाव लुग माफी केअजे. ²³ इयाखाताेर होंरंगा राज एका राजाहोय हाय, तियाल तिया आवत्यांहा बेने इसाब लेवनु एहेकी तिया माेनाम विचार आलो. ²⁴ ताहां राजा हिसाब लां लाग्यो ताहां तिया एका आवत्या वे लाखे रूप्याहां कोर्जो निंग्या, तियाल तियाही ली आले. ²⁵ पेन तोंअकर्जाे सुहांखातार तियावे कावीज नाय. आशा, तिया खाताेर तिया मालिकांय आख्याे का "तियाल आज तिया थेअ - पोयरे आने तिया जी बी मिलकत हाय ती बादे बेचीन काेर्जो पुरो की देवनु " ²⁶ ताहा तोअ आवत्यो, तिया पागें पोडीन तियाल आखा लाग्यो, ओ मालीक वायज धीर ते, आयं तोअ बाठाे कोर्जो पुरो केअहे. ²⁷ ताहां तिया मालीकाय आवत्याय दोया केअयी आने तियांय तियाल सोडी देदो आने तिया काेर्जो वी माफ किदेदो. ²⁸ पेन ओ आवत्यो बारे गियो, ताहां जियावे तिया होव रूप्या लेवनु आथा तोअ आवत्याहां मेने एक जां तियाल मील्यो, ताहां तियांय तीया बाेचीम तिइन आख्यो, तो वे मां कोर्जो हाय तोअ आमीन आमी दे. ²⁹ ताहां तिया जोडीदार तिया पागे पोडीन आखां लाग्यो, धीर तेअ, आय तोअ कोर्जो पुरो की देहे, ³⁰ तेबी तियांय तिया आखली गोठ नाय मान्यो, आने तिया कोर्जाे जांबलुग तियाय पूरो नाहा केअयो, तांबलूग चरीम कॉडी देवो. ³¹ फाचे तीयाय जो काम केअयो ताेअ तिया जोडीदारआवत्याहाय वेअयो, तांहा तेअ खुबूज निरास वी गियाे आने तियांहाय जो काय वेअयों तांअ बादो मालीकाल खुलो आखी देखाव्याे ³² ताहा मालिकाय तियाल तियाही हादीन आख्यो, ओं खोटा आवत्या, तुयुंय मान रांअव्या (विनती) केअरी तियाखाताेर माय तोअ वादो कोर्जो माफ की देवो. ³³ जेहेकी मांय तोअवे दोया केअयी तुयूंय ती तोज जोडीदारावे दोया केरा नाय जोजे का ? ³⁴ आने मालीकाल तिया बाेदल रोग की आली आने तियांय तियाल तिया बादो कोर्जो पूरो केरी तांबलुग तियाय तियाल शिक्षा केरा केता तियाल कोचेरीम कोंडी देदो. ³⁵ जर तुमा बी पूरा मोनाकी आपु पावाहाल माफी नाय क्याहां ता मांअ होरगामेने बाहाकाे बी तुमाहान तेहेकीज केरी.