¹ ताहा यरूशलेम शहरामेने थोडाक परूशी आणे नियमशास्त्रा विरूध्द ईशुई आला आणे आख्यो. ² तो शिष्य वाड - वडीलांये लागुवला नियम काहा पालता नाहा कारण तो शिष्य मांडोखा आला पेहेला आथतोवता नाहा." ³ ईशुई त्याल उत्तर देईन आख्याे तुमा तुमाआ परंपाेरा चालवा केअता देवा आज्ञा काहा मुडताहा. ⁴ काहाका देवाये आखाेलाे हाय का, तोअ याहकी बाहका मान राख आणे जो केडो आपु याहकी - बाहका बद्दल खाराब गाेगेहे त्याला माय टाका जोजे. ⁵ पेन तुमा आखता जो केडो बाहकाले आणे याहाकील आखी का, माल तो केहता जो भी देअलो आथो तो देवाल अर्पन कि देदला हाय. ⁶ ते देवा नियमशास्त्रा मुळेरिया हा का आपु बाहका आणे याहकी सन्मान केराने जोजे या प्रामाणे तुमा आपु अहेडा परंपाेरा देवा वचन वाद केअला हाय. ⁷ ओ ढोंग्याहा तुमा विषयी यशया संदेष्टयांये खेरो आख्योहाय तो आखे. ⁸ हे लोक ओठांकी माआ सन्मान केहता पेन तीयाहा अंतः करण माहायीन दूर हाय. ⁹ आणि ते माहा नियम आपु धर्मातत्वे म्हणून हिकवुता आणे व्यार्थमाआ भक्ती केहता. ¹⁰ ताहा लोकांहाले हादीन त्याये आख्यो उनाया आणि होमजी ल्या. ¹¹ जे मुया वाटे माज जाये तो माहाल अशुध्द नाहा. पेन जो मुयामेने वारे निघे ताेज माहाले अशुध्द केहे. ¹² पासे शिष्य पाही आवीन त्याले आख्यो "परूशांही इ उनाया ताहा तीहाले रोग की आली ई तृलो होमज्या का? ¹³ पेन त्याये उत्तर दिईने आख्यो, प्रत्येक रोप जो माआहोरगामेने वाहकाय लागवुलो नाहा तो उपटुलौ जाय." ¹⁴ त्याहाले जाेओ दया ते आंदला वाटया आही जर एका आंदल्या बीहीरा आंदलाचे वाट देखावा प्रयत्न केओयो ते वेनीवी खड्डाम पोडी. ¹⁵ पेत्राय आख्यो आमाआ केअता ओ दाखलो खुलो किहीन आखा. ¹⁶ तुमा आजीवी नेयहोमजूनारा हाय का ? ईशुई त्याहाल फुच्याे. ¹⁷ जो कायभी मुयाम जाये तो बाठो डेडीमं जाये आणे हाती आगीन बारे टाकाम आवे ई आमीलुग तुमाल होमजू तो नाहा का ? ¹⁸ परंतु ज्या गोठया मुयामेने बारे निघत्याहा त्या गोठया अतः करणाम भोवत्याहा आणे त्याच गोठया माहाले अशुध्द केहत्या. ¹⁹ काहाका खराब विचार खून सिनालो, जारकर्म खाेटया साक्षीनिंदी ई अतः करणामेनी बारे निघतेहे. ²⁰ माहालो अशुध्द केणान्या जे गोठया आही पेन नेय ताेवला आथाकी खादो ते माहु अशुध्द वेतो नाहा. ²¹ फासे ईशु तिहीने निगीन सोर आणे सिदाेन या भागामे गियो. ²² ताहा एके कनानी थेअ त्या भागामेनी ईशुहोवे आली, तीथेय बाेबलीन आख्याे, "प्रभु दावीदा पोयराे, माआपे दया कीये. माआ पोयरी पुथडा की खूब पिडाली हाये. ²³ पेन ईशुई एका शब्दाकी वी उत्तर देदो नाहा ताहा त्याआ शिष्याये त्याही आवीने विनती केअयी तीले मोकली दे काहाका ती आमा फाचला वोवलूती आवे हे. ²⁴ पेन ईशुई उत्तर देदो माल देवामे इस्त्राएला टाकालाहा त्या मेंढा होवे मोकलुलो हाय. ²⁵ हातीतीथेय फाचे ईशुही आली ती ईशुई पागे पोडी आणे आख्याे, प्रभुजी माल मदत केअ. ²⁶ पेन त्याये आख्याे, पोयरा मांडाे लिने कुत्राल टाकुलो बराेबर नाहा. ²⁷ तीय आख्याे, हा प्रभूजी पेन तेबी कुत्रे आपु तोणारा वाटामेने पोडला चूरो खातेहे. ²⁸ ताहा ईशई तिल उत्तर देदो, बाय तो विश्वास मोडो हाय, तु ताे इच्छा प्रोरमाने तुल मिली जाये आणे त्याच वेले तीई पोयरी हारी वेअरी. ²⁹ फासे ईशु तीहीने नीगीने गालीला फुगारा पाही आलो आणे ईशु डोगांप चोडीने तीही बाेठा. ³⁰ हाती खुब लोक तीयाही आला त्याही आपु आरी लुलो, पांगले, आंधले, बेरे आणे बीहीरे अनेक लोकाले ली आला आथा आणे त्याये त्या बीमाऱ्याल ईशु पागाही थोव्या ताहा त्यावे त्याले हारे केये. ³¹ मुके गोगा लाग्ये, लुले आथे ते हारे व्येअये, लेंगडे चाला लाग्ये आंदले वेरा लागे ई वीईन लोक दोंग वेअया आणे त्याही इस्त्राएला देवाआ गौरव केओया. ³² हाती ईशुई तीया शिष्याले हादीने आख्यो, माल लोकांहा किवा आवेहे काहाका ते आज तीन दिहापने माआरी हाये आणे त्याहापे खाऊला काय नाहा आवत्याहाने पुखे मोकलुलो ओहेकी मांडाे इच्छा नाहा काहाका ते वाटे कदाचे थाकीपोडी. ³³ शिष्य त्याले आख्यो " ओहा मोडा लोक टोलाले ताराये ओत्या मोठा इया दूर जांगलाम आमाहापे किहीन वेरी. ³⁴ ताहा ईशुई आख्यो तुम्हापे कोता मांडा हाये ? तियाये आख्यो आमाहापे सात मांडा आणे वायेके हाणे मासे हाये. ³⁵ हाती त्याये लोकाल ऐठा जागापे बाेहा आज्ञा केअयी. ³⁶ हाती त्या सात मांडा आणे मासे लिईने देवाआ प्रार्थना (उपकार) (मान्या) आणे त्या मांडा मुडया आणे शिष्याल देदया आणे शिष्याये लोकाहाले देदया. ³⁷ ताहा ते बाठे ताराये गीये आणे त्याये उरला मांडा तुकडाकी सात सिवले टोला केओये. ³⁸ आणि मांडी खाणारे भैया आणे पोयरे सोडीन चार हजार माहाये आथे. ³⁹ हाती गोदीले निरोप दिने वाटे लागने तो तारुावे बाेहीन मगदाना प्रदेशाम गियो.