¹ तिया दिहाम चौथाई देशा राजो हेरोदाय ईशु बाेद्दल उनायो. ² ताहा तियाय तिया आवत्याहान आख्यो, ईशु ओ बाप्तिस्मा केनारो योहान हाय. तोअ मोअलामेने देखु उठलो हाय तिया खातोरूज तोअ नोवायलागे एहेडे कामे केअहे. ³ हेरोदाय तिया पावुह फिलिप तिया थेअ हेरोदीया अयोखातोर योहानाल तिइन कचरीम काेंडी देदलो आथो. ⁴ काहाका योहान तियाल आखतुलाे, तु तियाल थेअ राखीलेदीइ देवा नियमशास्त्राहा विरूध्दाम हाय. ⁵ हेरोद तियाल मांय टाकनारो आथो पेन तो लोकाहान धाकातलो काहाका लोकाहा एहेडो भोरूसा आथो का, योहान संदेष्टा आशा. ⁶ हेरोदा जल्मा दिही हेरोदिया पोयरीय राजमेहेलाम नाची देखावतली हेरोदाल खुश केअयो. ⁷ तियाकी तियाय शपत लिइन वचन देदो. ती जो ⁸ तियु याहाकीय जेहेकी आख्याे, तेहकी तीयुय आख्यो बाप्तिस्मा केनारा योहाना मुनको थालीम थोवीन माल इही लावी द्या. ⁹ हेरोद राजाल खुप खोटो लाग्यो. पेन तियाय तिया आरीजी शपत खायन वचन लेदलो आथो आने पांगातीम लोकाहा हुबूंर तो दिदा आज्ञा देदो. ¹⁰ आने तियाय कचेरीम माअहे मोकलीन योहाना मुनको तोडी टयाक्यो. ¹¹ आने तियाय तिया मुनको थालीम थोवीन ती पाेयरील लावीदेदो. तीयुय तो तियु याहाकील लावी देदो. ¹² ताहातिया चेला आवीन तियामुरदो विसीली जायने तियाल दाटी देदो आने तीयाही जायन जी वेअयो तो ईशुल आखी देखाव्याे. ¹³ ताहा तो उनायने ईशुल तिवाहीने उडीम बाेहीन दुजा जागावे निगी गिया. इ उनायने आने लोकाहा टोलो सहैरामने तिया फासला पागे- पागे गिया. ¹⁴ फासे जाहा तियाय खुब लोकाहा गाेर्दी वेयी. ताहा तियाल कीव की आली आने जे दुःखी आथे तियाहान तियाय हारे केअये. ¹⁵ जाहा वाअतो पोडयो ताहा चेला तियाही आलाे आने आख्यो, "ओ ता जोगंला जागा हाय आने खाऊला टेम आवी गीयोहो. लोकाही गावाम जायने जियातिया खावनु बेचातोली तीयाल तियाहान मोकलीदे." ¹⁶ पेन ईशुय तियाहान आख्यो, तियाहान जावनु गोरोज नाहा. तुमाज तियाहान काय खावनु द्या." ¹⁷ तियाहान तियाल आख्यो आमाहावे काय" पांच मांडा आने बेन मासे हाय" ¹⁸ तियाय आख्याे ते माआइही ली आवा. ¹⁹ ताहा लोकाहान चारावे वोहा आखी देदो. तियाय त्या पांच माडा आने बेन मासे लिइन उच्चे जुगावेल विइन तियाय तियावे आशिर्वाद माग्यो तियाय मांडा मुडीन चेलाहान देदो आने चेलाही लोकाहान वाटी देदा. ²⁰ तें बादे खायन ताराये गिये. आने त्या वादी गेहला मांडा तियाय बारा सिबले पोराय गिये. ²¹ मांडा खानारे पांच हाजार आदमीज आथा. आने तिहीम बाया पोयरे बी आथे. ²² आय लोकाहान मिलीन वाटे लागवुतलो तो तुमा उडीन बाेहीन माआ आगला तियो तोडी जा एहेकी आखीन तियाय तुरूतुज चेलाहान मोकली देदे. ²³ लोकाहान मोकलीन देदा ताहा तो प्रार्थना केरा खाताेर एकी होवे एखलोज डोगापे चाेडीन गियो आने रात वीगियी ताहा तो तिही एकलोज आथो. ²⁴ पेन उडी फुगाराम आधी आने तिही वारो हुवुरने चालतुलो आथो ता उडील पाआया लाफाकी उचे एठा आलतुला आने तीया खाताेर ते तियावे आवरी नाय सेकतुला. ²⁵ ताहा राती मोठा पाहाटा आरी ईशु तियाहाहोब आलो. तो पाआयापे चालतुल आथो. ²⁶ चेला तियाल पाअयापने चालातो देखीन विगीया आने आखा लाग्या ओ "पुत हाय." आने तेअ वियान वोवल्या. ²⁷ पेन ईशु तुरुतुज तिवाहान आख्याे हिंमत केरा आय हाय; बायाहा ना. ²⁸ पेत्राय आख्यो, प्रभुजी तु हाय ताहा माल पाअयावेने चालीन तो पाही आवा आख. ²⁹ ईशुई आख्यो,"आव" ताहा पेत्र उडीमेने उतीन पायापे चालतो ईशुई जा लाग्यो. ³⁰ ताहा तोअ पाअयापने चालतुलो ताहा जोराहाकी वारो आलो तोवीइन बीया गियो आने वुडालाग्यो ताहा वोवलीन आख्यो "प्रभुजी माल वाचवे." ³¹ आने तुरुतुज ईशुई तिया आथ आगला किइन तियाल तेअयो आने आख्यो, ओ कोमीविश्वाऱ्यां तुयु काहा संशय तेयो. ³² आने ईशु आने पेत्र उडयाम गिया, ताहा वारो बाेंद वेअयो. ³³ ताहा जे चेला उडीम आथा ते तियाल पागे पाेडीन आख्या लाग्या, " तु खेरोज देवाज पोअयरो हाय." ³⁴ फाचे ते फुगारा तिइवेल गनेसरेत भागाम गियो. ³⁵ तिहीने लोकाहाय ईशुल ओखीन ताहा तियाहाय पाही पाहीने बांदा गावाहाम वातमी आखी मोकली, आने माहा बादा प्रकारा बीमारी लोकाहान तियाही ली आले. ³⁶ आने आमाहाल तोअ पोतडा कोराल आथलीला दे, एहेकी विनती केएई, ताहा जोताहाय तियाल आथाल्यो तोतेहे हारे वेये.