¹ तिदिहीज ईशुई कोमेने निगीन फुगारा तोडीप जायन बाेठो. ² ताहा लोकाहा टोला तियाही पाही टोलवाया; ताहा तो उडीम जायन बाेठो आने वाटा लोका फुगारा तोडीप उवारिया. ³ ताहा तियाय दाखला दिइन खुवुज गोठया तिवाहान आख्या, तियाआख्याव्या पोअनारो पारा खातार निग्यो; ⁴ आने तो पाेतलो ताहा थाेडोलो बीयारो वाटीप पोडयाे, आने चिडे आले ते खाय गिये. ⁵ थोडोक खडकापे पाेडयाे, तिही बाद कादु नाय आथाे, आने कादु बाद उंडाे नाय आथाे तिया खाताेर तोअ माहारूज उग्यो. ⁶ पेन दीहि निग्याे, ताहा तो कोमाय गियो आने तीयाहान मुले नाय आथे तियाहाल तो हुकाय गियो. ⁷ थोडो काटाहा चाडवाहाम पोडयो; आने काटाले चाडे वादीन तीया वादनु काेमी वी गीयाे. ⁸ थाेडोक हारा जागाम पाेडयो; आने तिया कीहीक होवपट, कीहीक साठपाट, आने कीहीक तीसपट एहेकी पाक्यो; ⁹ जियाल उनाया कान हाय तो उनाय ले. ¹⁰ हाती चेला पाही आवीन तियाल आखे, तु तियाहा आरी दाखलावाई काहा आखतोहो. ¹¹ तियाय तियान आख्यो, होरगा राज्या खास गोठया जानुलो ओकोल तुमाहान देवली हाय, पेन तियाहान नाहा देदली, ¹² काहाका ज्या केडावे हाय तीयाहान देवाम आवी आने जीया केडावे नाहा तीयाहा जो हाय तो बी तीयाहावेने काडी लेवाम आवी. ¹³ इयाखातोर आय तियाहाआरी दाखलो दिइन गोगुहु; काहाका ते वेतेहे पेन तियाहान देखावतो नाहा आने उनातेहे पेन उनाते नाहा आने तियाहाम होमजातोबी नाहा. ¹⁴ यशया आखली गोठया पुन्या विरीयाहा, ते एहेकी का, तुमा उनायाहाता खेरो पेन तुमहाल होमजानारो नाहा. आने नोजरे पाेडी खेरो पेन तुमहाल देखानारोज नाहा. ¹⁵ काहाका इयाहा लोकाहा मोन कठीन बीगियेहे, ते कानाहाकी उनाताहा आने तीवाहाय डोआ मिची लेटला हाय; इया खातार का तियाही डोआकी वे नाय, कानाहाकी उनाय नाय. मोनाकी होमजे नाव आने फाचे फाचला फिरे नाय आय तियाहाल हारो किंव नाय. ¹⁶ पेन तुमा डोआ धन्य हाय, का ते वेअताहा. आने तुमा कान काहाका ते उनाताहा. ¹⁷ आय तुमाहान खेरोज आखुहु का तुमा जे वेतेहे ते वेरा खातार खुवुज निरोप्या आने धर्मलोक आधा तेवी तियाहान वेरा तिल्या नाहा; आने तुमा जो उनाताहा तो उनाया खातीर ते वी तियाहान उनायाहा मिल्यो नाहा. ¹⁸ आमी तुमा पोनारां दाखलो उनायल्या ¹⁹ पोनारो तो इहाय का, केडो राज्या वचन उनातेहे पेन तीयाहान होमजतो नाहा तो दुश्मन आवीन मोनामेने जो पोअलो तो काडी लेहे. ²⁰ डाेगडापेन्यो पोलो ताई हाय का, तो वचन उनाहीनेतो तुरूतुज खुशी की मानी लेहे. ²¹ पेन तिया मुलउडे नाहा तियाखातारे तो थोडोहोज टाईम टिकेहे आने वचनाहा खातार संकट आलो नेते तारा देदो ताहा तो तुरूतुज सोडी देहे. ²² काटाला चाडाहाव पोअलोतो इज हाय का, तो वचन उनाही पेन संसारा कालजी आन धन दौलती लोक इ वचनाम वाटुलो कमी की देहे आने तो निकामी वेहे. ²³ हारा जागाम पोलेला तो इज हाय का, तो वचन उनाय तो होमजेहे; तो फल देहे ; केडो होव पट केडो, साठपट, केडो तीसपट, एहेकी दे. ²⁴ तियाय तिया आगला विहराे एक दाखलाे आख्यो. ²⁵ केडा एक माहाय तिया खेताम हारो बीवारो पोयो तियाहोच स्वर्गा राज्या हाय. लोक हुवी ताहा तियाहा दुश्मन आवीन गोवाहाम खोड कोचरो पोईन निगी गियो. ²⁶ पेन जाहा पालो फुटयो आने वाला आला ताहा खोड कोचराेवी देखाया लाग्यो. ²⁷ ताहा तिया को धोन्याल आवताम आवीन तीयाल आख्याे, महाराज आपुही आपु खेतामता हारो बीयारो पोयाेहो ने? आन तीयामखाेड कोचरो कीहीने आलो? ²⁸ तियाय तियाहान आख्यो इ कामता केडा दुश्माना हाय. आवत्याही तियाहान आख्या हाती आमा जायन तो काडी टाकजी एहेकी तो मोरजी हाय का? ²⁹ तियाय आख्यो, नाहा तुमा खोड टोलो क्याहाताहा तियाआरी तुमा गोव बी उपटी लीहा. ³⁰ वाडणी तावलुगु आरीज वादा द्या; वाडणी टायमावे आय वाडणाऱ्याधन आखे का, पेला खोडको चरोटोलो केरा आने वाला खाताेर तिया पुला बादा; पेन गोव मा गोदामामथोवा. ³¹ तियाय तियाहा आगला आजी एक दाखलाे आख्यो का, स्वर्गा राज्य राईदाना होस हाय. तो केडा एक माहाय लिआववीन तिया खेताम लागव्यो; ³² तोता वाय दाणहा हाना हाय; तेबी तो वादेहे ताहा आजीपालाहायना माेडा विन तीया एहेडा चाडो वेहे की, जुगामने चिडे तिया डागीप कोराहा केतहे आने रेतेहे. ³³ तियाय तियाहान आजी एक दाखलो आख्याे का, स्वर्गां राज्य खमिराहोच हाय, तो ऐक बायीय लिइन तीन माप लोटामे दोवाबीन थोव्यो, नाहा तो बाठो नोट फुगी गियो. ³⁴ ए बादया गोठया ईशुई दाखलाहाकी लोकाहान आख्याे आने दाखला वाचीन तो तियाहा आरी काय गोग्यो नाहा. ³⁵ इयाखातोर का संदेष्टयाहाय जो आखलो आथो तो पुरो वेरा जोजे. तो एहेकी का दाखला आखाखातोरे आय मा मुय उघडेहे, दुनिया उवजाबी तेहे दोवल्या गोठया आय आखी देखावेहे. ³⁶ हाती तो लोकाहान मोकली दिइन कोमे गियो; ताहा तिया चेला तियाही आवीन आख्याे खेतामने खाेडकाेचरा दाखला आमाहाल होमजावीन आख. ³⁷ तियाय उत्तर देदों का, हाराे बीवारो पाेणाराे ओ माहाआ पोयरो हाय. ³⁸ खेत इ दुनिया हाय; हारो बीवारो इ राज्या पोयरो हाय, खोडकोचरो इ तिया दुश्मना पोयरो हाय, ³⁹ तो पोनारा दुश्मन ओकाल्यापुत हाय; आने वाडणारे इ देवदुत हाय. ⁴⁰ ताहा जेहकी खोडकाेचरो टोलो किईन आगीम बालतेरे तेहकी इ दुनीया पारवानु टेम वेरी. ⁴¹ माअहा पोयरोतिया देवदुताहान मोकली आने ते तीया राज्यामेने बाद्या ठोकरावनान्या वस्तु आने खोटेकाम केअनाराहान टोलो केरी. ⁴² आने तियाहान आगी कुंडाम टाकी दी, तिही तेअ रोडी आने दात पिही. ⁴³ ताहा धार्मीकलोक आपो बाहका राज्याम दिहाहाेस पिपली. तियाल कान हाय तो उनाय. ⁴⁴ स्वर्गा राज्य खेताम दोवावी थाेवली मिलकती होच हाय, तो केडा एका माअहाल सापडयाे आने तियाय ती दोबावीन थोवी आने खुशीमाराम तियाय जाइन, तिया बादी मालमत्ता वेची देदी आने तो खेत वेचतो लेहे. ⁴⁵ आजी, स्वर्गा राज्य हारामाेती होद केनाच्या एका वेपाया होच हाय. ⁴⁶ तियाल एक खुबूज किमती मोती देखायो, ताहा तियान जाईन तीया जांवी आशां तो बादां वेची देदों आने तो वेचताे लेदो. ⁴⁷ आजी स्वर्गाराज्य दोन्याम टाकल्या एका जालाहाेस बादीजाती जाती जीव एककेज सापडुतेहे तियाहाेच हाय. ⁴⁸ तोअ पोरायी ताहा तोडीपे ताई काडयो आने बाेहीन जेहारे ते बासनाहाम टोलव्याने जे खाराबते फेकी देदे. ⁴⁹ तेहेकी दुनिया दाखुनु टेमावे एहेकीज वेरी, देवदूत आवीन धार्मीक लोकाहामने खोटाहान जुदो केरी. ⁵⁰ आने तियाहान आगी भोट्टीम टाकी, तिही रोडुलो ने दात खावुलो चाली. ⁵¹ तुमाहाल ए बाद्या गोठ्या होमजाया का ? तियाही तियाल आख्यो हा. ⁵² ताहा तियाय तियाल आख्याे हरेक नियमशास्त्र हिवुनारा स्वर्गा राज्या चेला वेला हायजो आपु भांडारामेने नोव्या जुन्या वस्तु काडेहे त्या माहाहोस हाय. ⁵³ आने ऐहकी वीयो का, ऐ दाखला आखुलो पारवीन ईशु तियाहाहीने निग्यो. ⁵⁴ आने तो तिया गावाम आवीन तियाहा भोक्ती केरूला ठिकाणी तियाहा एहेकी हिकव्यों का तियाहान नोवाय किईन आख्यो इ ओकॉल आनें सोक्ती कामे केलो इसोक्ती इया माहाल किहीने मिलेहे? ⁵⁵ ओ हुतार्ऱ्या पाेयरो ने ? तिया याहाकील मरीया आखतेहे ने? याकोब, योसे, शिमोन आने यहुदा ए तिया पाऊ ने? ⁵⁶ इया वोअयाहा, त्या वाद्या आपु आरी आवीज रेहत्याहाकने, ता तो वाद्या इयाक केहेकी मिल्या ? ⁵⁷ आने तिही तियाहो अविश्वास इहिमं तियाय खेल नोवाय लागे एहेडेकाम नाहा केये. ⁵⁸ एहकी ते तिया बद्दल ओटक्या. ईशुई तियांन आख्या, संदेष्टयाहान आपु कोअम मान पान मिलतो नाहा.