¹ जाहा ईशु आन तिया बारा चेला शब्बाथ दिही एका खेतामने जाहला. तांहा तिया चेलाहान पुख लागी आन ते खेतामने कोअहे तोडीन खां लाग्या. ² तो विईन यहुदी जाती लोकाहामने परूशी लोक तियाल आखा लाग्या, " देख शब्बाथ दिही जो नाय केरा जोजे तोअज तो चेला की रियाहा. ³ तियांय तियाहांन फुच्या; दाविद राजाल आने तिया आरी माहीं आथे तियाहांन पुख लागली तियाय काय केअला ? इ तुमांहाय शास्त्राम नाहा वाच्यो का ? ⁴ तो परमेश्वरा मंदीराम गियो आने मंदीरा अर्पन केलाे मांडो जो याजका शिवाय केडालुज खावुलो अधिकार नाव आथाे त्या तियाही केहकी खाद्या. ⁵ तुमाहाय नाहा वाच्या का, शब्बाथ दिहा दिही मंदिराम सेवा केअनारो याजक मंदिराम काम केअहे, तो नियम तोडहे ते वी तोअ केहेंकी दोषी नाहा रेतों. ⁶ पेन आय तुमहान आखुहु मंदिरासेवा मोडाम मांडो हाय तो ईही हाय. ⁷ शास्त्राम लेखलो हाय. मान अर्पन नाय (जनावरे माअवीन तिया रोगांत पाडुलाकी मान खुशी नाहा मिलती) पेन मान दया गोमेहे. ईया अर्थ तुमा होमजी लेताता. तियाहा चुक नाहा तियाहा हारा लोकाहान दोष नाय लागवुता. ⁸ काहका माअहा पायरो शव्वाथ दिहया वी प्रभु हाय. ⁹ फांचे ईशुई तिहीने निगीन यहुदी लोकाहा भक्ती कॅनु पाँगाम गियो. ¹⁰ तिही एक माअहु आथो तिया आथ हुकाय गिहिलो आथो. ताहा यहुदीलोक ईशुल चुकीम सापडावा खाताेर तियाल फुचताेला? दुःखी माहाल शब्बाथ दिहा दिही हारो केअनु इ नियमाहाकी हारो हाय का नाहा ?" ¹¹ ईशुई तियाहान आख्या. तुमाहावेने केडाप बी एकुज मेंढा हाय आन शब्बाथ दिहा दिही तो खाडांम पोडी गियो ता, तुमा तियाल खाडांमने वारे नाय काडाका. ¹² मेंढा से बी माअहु कोओतावी किंमती हाय, तियाहाल दुःखी माहाल शब्बाथ दिहा दिही हारो केअनु नियमशास्त्र परवानगी देहे." ¹³ फाचे ईशुई आथ लांबाे केअ; तियाय तोअ आथ लांबाे केअयो ताहा तिया विहीरा आथा होच ओ आथ बी एकदम हारो बी गिया. ¹⁴ ताहा परूशी लोक बारे जायन ईशुल केहेकी माय टाकूहु इया बद्दल तिया तियाहांज ठाकज विचार केरा लाग्या. ¹⁵ परूशी लोक काय बी रिया इ ईशुल मालुम आथो, तियाखातोरे तोअ भक्ती केअनू पाँगामेने निंगीन जाहलो ताहा खुवुज लोक दुःखी आधा तिवाहान तियाय हारे केअये. ¹⁶ आने तियाय तियाहान हारकी होमजावीन आख्यो, तुमा मा बाेदल गोठया बीहिरान मा आखाहा. ¹⁷ परमेश्वरा निरप्या यशया की जो वचन आखलो आथो. तोअ पुरो वेरा खातोर एहकी आख्यो. ¹⁸ '' देखा ओ मा सेवक, इयाल मायुय निवडूलाे हाय, आय इयावे माया किअहु. इयाकी आय खुश हाय, आय मा तियावे मोकलेहे, तोअ दुन्यामेने लोकाहान परमेश्वरा न्याया गोठया आखी. ¹⁹ तोअ केडआरी चुलानोरो नाय. बाेंबलुनारो नाय, तिया आवाज वाटिपने माअहे उनायनारे नाय. ²⁰ तोअ न्यायाल हारी ली तांबलुग. वुरू काठकी मुडनारी नाय. आने वाय वोलनारा दिवाल ओलवुनारो नांय. ²¹ बीहरे माहे तीयाप आशा थोवी. ईशुप जो सामर्थ हाय तो परमेश्वरापणे हाय. ²² ताहा लोक एका माआहाल ईशुही ली आला. तियाल पुतडाय आंधलो आने मुको केअलो. तियाल हारो केअयो ताहा तो गोगा आने वेरा लाग्यो. ²³ तो विईन बादा लोकाहान नाेवाय लागी ते आखां लाग्या, " दाविदा जातीमेने जिया आपु वाट जोवताहा तो ख्रिस्त ओज नाय का?" ²⁴ लोक ऐहकी आखताला तो उनायन परूशी लोक आखा लाग्या काल्योपुत (वालजवुल) पुतडाहा मोडो अधिकारी हाय, तिया आधाराकी ईशु पुतडे काडी टाकेहे. " ²⁵ ताहा तियाल विचार जाय लिईन तियांय तियाहान आख्यो, केललो बी फुट पोडली राज्य उजाड बी जाहे आने केललो बी फुट पोडलो सेहेर नेता पोंगा टिकतो ²⁶ सौतान सौतानाल काडी टाकी ता तीयाहाम मतभेद हाय, तीयाम भाग पोड्याहा ता तीयाहा राज्या केहेकी टिकी ? ²⁷ आने आय जर बालजबुला (सौताना) मोदतीकी पुथडे काडुंहू ता तुमा लोक केडा मोदतीकी काडताहा तीयाल तुमा सोताहा लोक तुमा चुक्या काडी ²⁸ पेन आय परमेश्वरा आत्माकी पुतडे काडुहुंता परमेश्वरा राज तुमाही आवी गियोहो इ नक्कीज होमजी लेजा. ²⁹ तेहेकीज केडो वी केलला वी पेलवान (सोकतीवाला माअहा) कोअ चोरी केरां गियांता, पेअला तिया पेलवानाल बांदी टाक पोडनारो ताहाज तोअ तिही चोरी की सेकनारो. ³⁰ जो केजो माहु मा आरी काम केता नाहा तो मा विरोधाम हा आने जो मा आरी टोलो केतो नाह तो खागावागा केनारो हाय ³¹ इया खातार आंय तुमाहांन आखहु, मांअहु वादी जाती पाप आन निंदा केरी तिया माफी मिली पेन पवित्र आत्मा विरूध्द जो माअंहु निंदा केरी तिवाल माफी नांय मिलनारी. ³² एगदो माअहां पोयरा (मा) विरूध्द निंदा केरी तियाल तिया माफी मिली जाय, पेन केडो वी पवित्र आत्मा विरूध्द निंदा केरी तियाल तिया माफी नाय मिलणार या युगावी नाही आन आवनारा युगाम बी नाहा. ³³ हारा चाडवा हारो फल, माठा चाडवा माठों फल एहेंकी तुमा चाडो हारो केअरा काहाका चाड तिया फलापेने ओअखायेहे. ³⁴ ओ हापा पिलकाहांय, तुमा खोटा हायता हाऱ्या गोठया केहंकी आखी सेकनारा? जो मोनाम पोअलो हाय मुयावाटे निंगहे. ³⁵ हारो माअहु मोनामने हाऱ्या गोठया काडेहे. आन खोटो माअहु, तिया खोटा मोनामेने खोटया काडेहे. ³⁶ आजी आय तुमाहांन आखंहु का केलला बी माअहु जे खोटया गोठवा गोगी. तिया हिसाब तियाल न्याया दिही दां पोडी. ³⁷ काहाका तु तो गोगुलापेन निर्दोष होमजावह आने तु तो गोगुलापणेज दोषी बी होमजाय. ³⁸ जाहा शास्त्री आने परूशी लोकहाय ईशुल आख्या, " ओ गुरू, तु ख्रिस्त हाय तिया आमाहांन पुरावा देखाव." ³⁹ ताहा तियाय तियाहान आख्यो, "इया पिढी लाेक खाेटा हाय आने परमेश्वरा आरी तियाहां संबंध हारो नाहा, एहेंडा लोक चतत्काराकी पुरावा मागताहा, पेन तियाहान परमेश्वरा निरोप्यो योना निशाणी शिवाय, बीहिरी निशाणी देता नाय आवणारी. ⁴⁰ काहाल का योना जेहकी तीन दिही आने तीन रात माेडा मासा डेडीम आथो, तेहकीज मांअहा पायरो ताेरती देडीम तीन रात आने तीन दिही रीइ. ⁴¹ परमेश्वर जाहा इ दुनिया न्याय केरी. ताहा निनवे सेहरा मांही उठीन तुमा विरूध्दाम गोगी, ते तुमनेहेल दोष लागावी काहाका योना आखल्या गोठ्या मानीन तियाहाय पश्चताप कीन मोन फिराव्ये पेन आमी तुमाहाम योना से बी मोडो केडो तेबी इही हाय. ⁴² न्याया दिही दक्षिण देशा राणी इयां पिठी लोकाहां आरी उठीन इयाहा विरोधाम गोगी. काहाका शलमोन राजा ओकली गोठया उनाय खाताेर ती तोरती शेवटया तेडीपेने आलली हाय. देखा, इही जो हाय तो शलमोना से बी माेडो हाय. ⁴³ पेन जाहां दृष्ट आत्मो माअहामेने बारे निंगी जाहे. ताहां तो जिही पाय नाहा रेतो एहेंडा जागाहांम आरामा जागो होदतो फिरहे जागो तियाल मिलतो नाहा. ⁴⁴ ताहा दृष्ट आत्मों आखेहे, जिहीने आय निंगी आलोहा, तिहीज मा कोअमें आय फाचे जाहाय, जाहा तिही तो आलो ताहा. तो पाँगो तियाल हारो साफसुफ केअलो, रिकामा आने सोवतो केअलो देखायो. ⁴⁵ फाचे तो बारे निंग्यो आने तीयासे बी खाराब एहेडे सात पुतडें आरी ली आलो. आने ते बादा आबीन तिया माअहांम रेतहां तांहा तिया माअहा दशा पेअला से खुवुखाराव वी जाहे. तेहकीज इयो खोटी पिठी वेरि. ⁴⁶ ईशु लोकहान गोठया आखतोलो ताहा तिया याहकी आने पावहु तियाआरी गाेठया केराखातार आललें, ते बारे उबले रेअले आथें, ⁴⁷ ताहा केडाय तेबी तिवसाहान आख्यों तो याहकी आने पावहु आरी गोठया केरा खातारे बारे उबले हाय, " ⁴⁸ पेन तियाय तियाल आख्यो; केडी हाय मा याहकी ? ⁴⁹ फाचे तियाय तिया चेलाहांवेल आथ आगाडी किइन आख्यो," देख मा याहकी आने पावहु इंज हाय. ⁵⁰ काहाका जो केडो मां होरगामेने परमेश्वरा वाहका मोरजीकी चालेहे तोज मां पावहु, मां बोअही आन मा याहकी हाय, "