¹ जाहा ईशु तिया बारा चेलान ऐ गोठया आखी पारवायाे, ताहा तोअ तिहीने निग्यो आने गालील प्रांतामेने सहेराहांम फिरिन परमेश्वरा हारी गोठया आखीन हिकवा लाग्यो. ² पांयाहाकी बाप्तीस्मा देनारो योहानाल जेलुम कोंडलो आथो, तीयाय ख्रिस्त केतलो ते कामे उनायो, ताहा तियाय तिया चेलाहान ईशुही मोकल्या. ³ तियाहांय तियाल फुच्यो, "जीया ख्रिस्ता आमा वाट जोवताहा तो तुज हाय का? का आमा बीहीरा वाट बेअजी "? ⁴ ईशुई तियाहान आख्यो, " जो तुमा उनाताहा आने वेअताहा तो जायन योहानाल आखजा. ⁵ आंदले वे अतेहे, पांगले चालतेहे, कोडले हारे वे अतेहे, बेरे उनातेहे, मोअले माहि जिवते वेअतेहे, गरीब माअहान परमेश्वरा गोठया आखतेहे. ⁶ जो माअहु मा बाेदल गोठया उनायन मोनाम बीहीरा विचार नाहा केअतो तो सुखी हाय." ⁷ ''फांचे ते आगाडी जाहला तांहा ईशुई लोकाहान योहाना बोदल आखा लाग्यो, "तुमा डोगाम काय बेरा गेहला? वारो ओहवे तांहा आलहे तोंअ पाथडो वेरा का ? ⁸ तुमा काय वेरा खातोर गेहेला ? हारम हारो पोतडो पोवलो माअहाल वेराखातोर गेहला का ? हाराम हारे पोवले माही राजा मेहलाम रेतेहे. ⁹ तुमा काहाल डोगाम गेहला ? परमेश्वरा निरप्याल वेरा का? हा, आंय तुमाहान आखहु, "परमेश्वरा बाद्दा निरप्याहांसे तो मोडो हाय." ¹⁰ तिया बोदल एहेकी लेखलो हाय." आय मा आगाडी दुताल मोकलेहे, तो तोअ खातोर वाट तियार केरी. ¹¹ आय तुमहान खेरोज खाऊहु. इया दुनियाम वाईटापेटे जोल्मुलो जो बाप्तीस्मों देनारो योहान, इयासे मोडो माहांम केडोज नाहा पेन स्वर्गाम जो वादासे हानो हाय तो तियासे मोडोहाय. ¹² जो बाप्तीस्मो केनारो योहान आथो ताे दीयाहालने ता आज लुगू स्वर्गा राज्याप आक्रमन वि रियोहो. आने आक्रमन केअनारे ते पेंदी लेते हे. ¹³ काहाका पेहला नेज योहान आलो ताव लुगु परमेश्वरा संदेष्टा आन नियमशास्त्रा या भविष्य आखलो. ¹⁴ जर तुमा ते गोठया माना तियार बोई ता जो आवनारो एलिया तो ओज हाय, ¹⁵ तियाल कान हाय तो उनाय ¹⁶ इ पिढी लोकाहान आय केडा होच एहकी आखु ? जे पोयरे वाजाराम वोहीन तियाहा हेंगात्याहान हात केअतेहे, तियाहां होच इ पिढी हाय. ¹⁷ ते पोयरे आखतेहे, आमाहितुमा खाताेर खुषी की बाजंत्रे बाजवे तेवी तुमा नाच्या नाहा. आने तुमा खातोर आमाही दुःखा गिते आख्ये तेवी तुमा रोडया नाहा. ¹⁸ योहान कायुज खायन पिइन नाहा आलो तेबी ते आखताहा याल काल्यो पुथ लागलो हाय. ¹⁹ माहा पोयरो खातो पितो आलो इयाखातार लोक आखताहा. "देखा ओ खादाड आन पिड़नारो हाय, ओ करपट्टी उकलावनाराहा आन पापी लोकाहा हेंगात्याे हाय, पेन ओखाल आपू कामांहाकी हारो हाय का. माठों हाय, तिया पुरावा देहे." ²⁰ ताहां तिया सेहेराम ईशुई बादाहासे बाद चमत्कार केअला. तिया संहरामने लोकाहांय पासतावो नाहा केअयो इयाखातार तियाहान दोष देदो. ²¹ ओ खोराजिना सेहरामेने लोकाहांय तुमाहान हाय, ओ वेध सैदा सेहेरामने लोकाहांय तुमाहान हाय, काहाका तुमाहाम जे चमत्कार केया ते आय फिनीशीया देशामेने सोर आने सिदोन सेहेरामने लोकाहाम केअतोता. तिहिने लोक ताहाज तुरूतुज डिलापसे फाटले पोतडे वेटाली लिईन, खाआवा ठेराप बाेहिन पासतावो केअता. ²² पेन आय तुमाहान आखुहु."न्याया दिनी सोर आने सिदाेन सेहेरामने लोकाहान सोपो जाय. ²³ ओ सेहेरा जुग जोतोहो उँचो हाय तोअतो तु उँचो वेरा मागातोहो का ? तु ता पातालाम निचे उती जाहोका ! जे चमत्कार मायु इही केअया ते जर आंय सदोम सेहेरामेने केअतोता. तो आजलुगु टीकी रेतो. ²⁴ आ तुमहान आहु, न्याया हायाहा दिही तुमा से सदाेम सेहेरामेने लोकाहांन सोपो जाय." ²⁵ फाचे ईशुई ऐहकी प्रार्थना केअहे." ओ परमेश्वर बाहका. जुग आने तारती प्रभु, आय तो आभार मानुहु काहाका तुंयुय ऐ गोठया खुव हिलला आने ओकलीवाला लोकाहांहीने दोवावी थोवीन. तुयुंय जियाहा मान हाना पोयराहा होच हाय तियाहान देदया. ²⁶ हा ओ बाहका. तुयुय ई खुव हारो केअयो काहाका तुल ई गोमलो. ²⁷ फाचे ईशुई आख्या मां परमेश्वरा बाहकाय वाटोज मान होपी देदला हाय, बाहका सिवाय पोयराल केडोज वोअखुतो नाहा, आने पोयरा पाची केडोज बाहकाल वोअखुतो नाहा, ²⁸ ओ थाकला आने वोजाहाकी दाबला लोकाहांय. तुमा बादे माईही आवा. आय तुमहान आराम देहे. ²⁹ आंय नंम्र आन गरीव मोना हाय. तुमा मा जुहरो ली लेजा आन मापने हीकी लेजा ताहा तुमाहान आराम मीली. ³⁰ काहाका मां जुहरो सोपो आने मां बोजो ओलको हाय.