¹ पेन ईशुय तिया बारा चेलाहान तियाही हाद्या आने तियाय तिईहान पुतडे काडी टाकनु आने बादी जाती रोग दुःख हारे केअनु अधिकार दे दो. ² त्या बारा प्रेषिताहा नावे ई आथे पेअलो शिमोन जियाल पेत्र आखतले तो आने तिया पावुहु अंद्रिया जब्दी पोयरो याकोब आने तिया पावुहु योहान. ³ फिलीप्प, बर्थलमय, थोमा आने करपट्टी उकलनारो, मत्तय, अल्फी पोयरा याकोव आने तहय " ⁴ शिमोन कनानी आने जियाय ईशुल तिई देदलो तो यहूदा इस्कायत. ⁵ ईशुई तिया बारा चेलाहान एहकी आखीन मोकल्यो का, जे माहे परमेश्वराल बोखुते नाहा तियाहाम जाहा मा. आने शमरोनी माहा केल्लाज शेहराम जाहा मा. ⁶ ता इस्त्राएला कुटबांमने मेढाहा होच टाकाय गेहला लोकाहाम जा. ⁷ तुमा जाहा ताहा तियाहान ऐहकी आखीन संदेश दा, " का होरगा राज पाही आलोहो. ⁸ दुख्याहान हारे केअंजा, मोअलाहान जिवते केओजा, कोडलाहान हारे केओजा, पुतडाहान ओडी काडजा, तुमहान फुकट मिल्योहो ईयाखोतोर तुमाली फुकट देजा. ⁹ तुमा होनाे, चांदी नेता तांबा पोयसा माअ लेता. ¹⁰ आने तुमा जाहा ताहा जे पोवले पोतडे आने पागुमेने चापले तोतेहेज ली जाजा. आजी बिहरी पोतडे चापले पिशवी आने लाकडी ल्याहा मा. काहाका काम केले तिया मोजर मिलीज. ¹¹ तुमा जाहा केल्लावी सेहराम गावाम जाहा ताहा तीही केल्लो माहु हारो हाय ईया होद काङजा आन बीहरा गाबुल जावनु टाईम आवे तावलुगू तिईयाहीज रेजा. ¹² जाहा तुमा ती कोअमे जाअहा ताहा शांती एहेकी आखजा. ¹³ जर खरोखर योग्या वेरी ता तुमा शांती तीही री पेन जर तो पोंगो योग्या नाया वेरी ता तुमा शांती तुमाही फाचे फिरी आवी. ¹⁴ आने जो केडो तुमाहान हादे नाय आने तुमा आखल्या गोठया उनाय नाय तहा तियाहा गावामने नेता शहरामने बारे निगाह ताहा तुमा पागालने उदलो फाेकडी टाकजा. ¹⁵ आन आय तुमाहान खेरो आखुहु त्या न्याया दिहया दिहि त्या शेहरापेक्षा सदोम आने गमोराल खुब सोपो जाय. ¹⁶ जेहकी तोरसां मिचमे मेढाल मोकलुलो तेहकी आय तुमाहान मोकली रियोहो, ईया खातोर तुमा हापडा होच चतुर आण करता होच चोख मोना वेअजा. ¹⁷ पेन तिया माहाहीने हाचबिन रेजा ते तुमनेहेम न्याय केअनारा लोकहान तीई दी आन तुमनेहन ते भक्ती केअनु जागाप चापकाहाकी ठोकी. ¹⁸ आन तुमा मा चेला हाय ईया खातोर ते तुमनेहेन अधिकारी आन राजा हुंवुर लि जाय. आन तुमा तियाहा आगला आन विहिरी माअहा आगला मा वोद्दल साक्षी आखाहा. ¹⁹ जाहा तुमहान तिई देवृलाम आबि ताहा काय गोगु आन केहकी गोगु या चिंता मा केराहा. काहाका तुमा काय गोगा जोजे तो तुमनेहेन ताहाज होमजाय जाय. ²⁰ काहाका गोगनारा तुमा नाहा पेन तुमा परमेश्वर बाहकाे आत्मो तुमहाम रिईन गोगी. ²¹ पाबहु पावाहा विरूध्द आने बाहको कतिया पोयरा विरूध्द उठीन मांय टाकाखातार बीहिरा लोकाहा होपी दी पोयरें बाहाकी आने वाहका विरूध्द उठीन तियाहान माय टाकावी. ²² मा नावा खातोर बादा लोक तुमा विरूध्द करी पेन शेवटीवलुग जो विश्वासाम टिकी रिई तो वाचाय जाय. ²³ एका गावाम तुमाहान जाहां तारास दी ताहा तुमा बीहिरा गांवाम नाही जाजा, आंय तुमाहान खेरोज आखहुं, माअहा पोयरो फाचें आवहें ताबलुगु इस्त्राएल देशामेने गांवाहांम तुमा फिरी नांवे पारवानारा. ²⁴ " चेलो तिया गुरूसे मोडो नाहा, आने आवात्यों तिया मालकासे मोडो नाहा. ²⁵ चेलो तिया गुरू होरु वेरांज जोजे. मालिकाल तियाहाय बालजबुल एहेंकी आख्याता तिया कोअने बिहिरा माअहान ते केहेंकी नाय आखनारा ! ²⁶ तुमा तियाहान बीयाहा मा, काहाका उगडो नाय वे एहेन्डो कायुज बुजलो नाहा हाय. आन मालुम नेय पोडे एहन्डो काविहीज दोवलो नाहा. ²⁷ जो आय तुमाहान आंदाराम आखहु तोअ तुमा उजबाडाम आखजा आने जो तुमा कानाहांकी उनाताहा, तोंअ तुमा उँचा जागावे उबी रिईन आखजा. ²⁸ जे लोक शरिराल माय टाकताहा पेन आत्माल माही नाहा सेकता तियाहान बीयाहा माअ. तियाहाेसे जो परमेश्वरा आत्माल आन शरिरला नासकी सेकहे, तियाल बिड़जा. ²⁹ बेेन चिडे एका रूप्या वेचतेहे का नाय ? ते बी तुमा परमेश्वरा बाहका मोरजीवाची तियामेने एक बी चिडो तोरतीवे टुटी नाहा पोडतो. ³⁰ आने तुमा मुनकापेने चोअट्टो बी मोजले हाय. '' ³¹ खुप चिडाहाेस तुमा किंमती हाय. इयाखतोर बीयाहा मा. ³² जो केडो बी मान माअहा आगला मानी ली तियाल आय बी मा होरगामने बाहका हुंबुर मानी लेहे. ³³ पेन जो केडो बी मान माअहा हुंबुर माने नाय तियाल बी आय मा होरगामने बाहकाे हुंबूर नाय बोअखु. ³⁴ तुमा एहकी मा होमजा हा का माय तोरतीप शांती लीन आलोहो. आय शांतीता स्थापीत केरा नाहा पेन आय तारवार चालवा आलोहो. ³⁵ आय एकी कोअने माअहान जुदे जुदे केराखातार आलोहो. पोयराल तिया बाहकाे विरूध्द. पायरिल तियो बाहका विरूध्द वाेवडील तीयु हावडी विरूध्द केरावा खातोर आलोहो. ³⁶ सोवताहा कोअनेज माअहे तिया दुष्मन वीजाय. ³⁷ जो केडो मांसे तिया याहकी आने बाहकोप वाद मोया केअहे. तोअ मां खातोर काबिंज काम्यो नाहा. आने तेहकीज जो केअडो मा से वाद तियाहा पोयराप आने पोयरिप वाद मोया केअहे तो मा खातार कायज काम्यो नाहा. ³⁸ जो केडो सोबताहा क्रुसखांव लीईन मा फाचाडी आवतो नाहा, तो मा खाताेर काबिज काम्यो नाहा. ³⁹ जो केअडो सोवताहा जीव वाचावेहे तोअ तिया जिव गोमावी, पेन जो मा खातार जीव गोसावी तो तिया जिव वाचवी ली. ⁴⁰ जो माहु तुमाहाल मानी लेहे तो मान मानी लेहे, आने जो मान मानी लेहे तोअ तिया परमेश्वरा बाहाकाय मान मोकल्याहो तियाल मानी लेहे. ⁴¹ जो केडो परमेश्वरा निरोप्याल, परमेश्वरा निरोप्यो हाय एहेकी जायन मानीली, तियाल परमेश्वरा निरोप्या फल मीली, तियाल धर्मी माअहाल फल मिली. ⁴² आंय तुम्हाल खेरीज आखहु, केडो बी ईया हानाम हानाल मां चेलो हाय एहेंकी जायन एकुज गिलास पांय पाजी तेबी तियाल तिया फल नक्कीज मिली."