¹ Abowámá wení iyápó-annama yíkainiq umáraa Îtogo keráwáqtábá kákaiye. Keráwáqá wení iyápó-annabowaq wenáaikaa-umá keráwáqtí táaimma mamá pááq-oro. ² Îtu Káristo keqtáátábá-umátuwena we-naúwaraimma tímikaiqtaae, morá kateko kúyúmmá i-óbámágáráq kataabi-yátááqá Îtogokaq-uraine. ³ Ánibo keráwáqá íma kumari áaina-biyo, kebó yataakaraq kaupayán-áaimma taroq-oro. Mamírán-ááímmá Îtogo-kaqo monoqo ítaa kayuka íma taroq-ínowe. ⁴ Keráwáqá íma kebó-áímmá aábê-aikaa-umá ítero. Ímiye. Îtogo-ní íraqon-aitaba timá wemmá áugau-aráákaro. ⁵ Maminnáyaba ítama-táaro. Kebó-yátáárîq kéo-kayukagaraq, káupáyán-ááímmó- taroqo-o kayukama min kaaqari îtogo-ní áaimma kéwáraae. Miirán-ááíkákáráq wayukama íma Îtu-garaq Îtogomo yabíkái-marupaqa uyáberanionowe. ⁶ Yaímma-wayukama yeqtí kaaqaari-áímmá keráwáqá íma iyuwáiyata makáqma aónaaro. Mi-káyúkámá maami-táwí-yátáárîq kéiya-kayukama Áánûqtuni áyámma mayánóe. ⁷ Keráwáqá nékaq mamirá-káyúkábíkémmá máero. ⁸ Naayóbáqá keráwákáráq kumayuq-yátáákáráq táwî yataakaraq tirunóbáqá wáqe-uraimanibo íbêqa uyátárai-nakoma tirunóbáqá máitaq abo keráwápí ómmá ógiqma mááe. Miráuma ókón áráakaa umá máaro. ⁹ Ókómmá máqten íráqôn-aaikaraq arupú-aaikaraq árain-aaikaraq abarokáq mamá pááq kéiye. ¹⁰ Nói-qtataakoaq uyátárai-nakomma amuqá kémarakaiyaa minnáyaba abáá oro. ¹¹ Mi-qtátááqá waayúkama kamayupí kéo-qtataaqa keráwáqá tinaaémma umáyíkáaro. miráimanibo keráwáqá yiráátero. yemá otaammá kúyo-kayukama mááe. ¹² Táwî-yataaqa wayúkama kumayupí aúpáq oqtábá paá watáayaba kemá tigaaeyô kétune. ¹³ Ópí mami táwí yátááqá aónama kétageta kanaaráq aónáiyana paábaq kumayukóráá-umá koínanama ókómó anónaraq wení márûqa kémayaiye. ¹⁴ Miráipoata maan-áímmá ten-áímmá kéitaunatae. “Keráwáqá túmô wáe-kayukao, itó-oro. pukáapike itó-magiyana Mesáíyama ómmá timíniye,” téna Áísaya Îtogo-ní amuné-nákómá naayóbáqá agatáine. ¹⁵ Abo keráwáqá nói-qtataaqtababi ommá atéráaro. Íma aíbôq-tuyanakaraq mánomanibo aá itaí-wáyúkáráá-umá máero. ¹⁶ Íbêq-yupaama táwî-kanaaboaq keráwáqtí túwaraa-kanaama yabíqma arutéraq íma táwítáwí-oro. ¹⁷ Íma aíbôq-yataariq ínômanibo uyátárai-nakoni aúyánámmá abááumá pááq-oro. ¹⁸ Íma aíbôq-nomma néraq neginaagí ínômanibo Îtogo-ní Aokaq-Áánápó mamá ógiraaro. ¹⁹ Keráwáqá mi-qtátááqá uyátárai-nako Îtrogma káqo-kayukayaba umáyikena keráwáqtábágáráq umátikena i-qtátááqtábá ibí anónna-anonna umá tíq-tiq oro. Nunamummá ibí tero. Uyátárai-nakokaq tirukakékáráq imá tóyaupikemma kaapáúpikekaraq tero. ²⁰ Ketááí uyátárai-nako Îtu Kárísto-ní áwîkaq ketibotááma Îtogo-kaq tíkáiye téraq máqte-tataaqtaba-oro. ²¹ Îtu Kárísto-ní-aama kéiteraq keráwáqá móra-mora-yuma weqtábá-weqtaba-umá yetiménáápáq máero. ²² Aaragô, keráwáqá uyátárai nakoní áamo wáráanikaa-umá keráwáqtí tiwaiqmááti yáama wáráaro. ²³ Ketáámá itáíq-itaiq-umá kéuna-yutaama Îtu Kárísto-ní aúraa umá máunanataa wemá aqnókáá máitana miráráá-umá ánáakoma aúráitana wení awaikómá aqnókáá-umá máiye. Aamô ítáa-kayukama Îtun aúraa owana wemá yemmá pukáapike kéyiwiraiye. ²⁴ Îtunaama ítáa-kayukama wení náápaakoni aménáápáqá mááe. Mirárá-umá ánáakoma we-nawaikóní náápaakoni amenáápáq máiye. ²⁵ Keráwáqá aara-waiqmáqa, Îtu Kárístoma wekáq yirummá ámê-kayukayaba ákáitana yeqtábá pukuráiye. Mirárán-umá keráwáqá yiwaiqmááqa keráwáqtí tínáaqmaataba tikaíno. Îtu Káríqtoma wekáq yirummá ámê-kayukayaba pukéna ²⁶ Wení watáanapo mamá aokarîq-umáyíkaraiye. Yeqtí kúmiq yataaqa paábaq kématuwena tete-umáyíkaraiye. ²⁷ Miráuraiqtaba wení waayúkama anaaékaqa wenaúrakaq kanaaráq itó éta yemá tágaginowe. Upaaigómá kááraa-kaaraa íéna íma kaabú-káábú iníkáá-umá wení waayúkama tágaginowe. Wemmá wáráa-kayukama aokaríq éta máqten-otaakaraq íma waínna miráráá kayukayaba Îtumma kákaiye. ²⁸ Miráráán-umá yiwaiqmááqa yeráwáqtí yúyaba yíkáiniq-umá móraiq-umá yetináaqtaba yikaíno. Máqtemma yetúgoma íma kéyiwaagowe. Ímiye. Abo aáwaqa améta íráqôniq-umá kéyabiye. ²⁹ Miráuma móra-nakoma wenamáárîq wetábá ákáiniq umá wenánáakoqtaba akaíno. Ánibo Îtuma wenaúgaraq kéyabiye. Wenaúma nóinabiyo? Ketáámá wekáq tirummá amúnna-wayukataama wanaúma máunatae. ³⁰ Ketáámá Îtu Káríqton aúma máqte-tuyawaaqa máunatae. ³¹ Minnáyaba Îtogo-ní aúba-wannaabi kétiye, “Waagómá wenanóboama kéiyuwena wenánáakote yagaroqtániye. Maa-kááyáq-nákámá mimórá-yúmá auráíyóye,” téna Mótetima Îtogo-ní aúba-wannaabi agatáine. ³² Mamin-áímmá aúpáq áaikaraq wáiye. Móra-nakoma wení ánáakote kétibo aúpáq-áímmá mirá téna Îtu Kárístoma wení anaaéma kéwaraa-kayukayaba kétiye. ³³ Miráráá-umá keráwápíké móra-mora-nakoma wetábá ákáinikaa-umá ánáakoqtaba akaíno. Ánáakoma awaikó-ní áama yaaguyaqmá itaíno.