¹ Keráwáqá iyápóraware, uyátárai-nakon-aama kéwareraq keráwáqtí tinóboyuti yáama wáráaro. Minnáma aanaúramma paá wáiye. Naayóbáqá Mótetima mará-téna agatáine, ² “Keráwáqtí tinóboyuti yáama yaaguyaqmá ítáaro.” Minnáma áqnáabaq ámáan-aimma timá móra akoqnáá umákain-aimma Îtogo timátímikaiye. ³ “Miráráá íyana máqte-tataakoma íráqôniq-umáqtikainaq maa-márábí ayáqtáá-yupaama mánowe,” téna Îtogoma timá akoqnáá uráine. ⁴ Keráwáqá yiboutaae, íma keráwáqtí iyápóma mamá áyámma í-yátáápí aúqyíkáaro. Ímibo keráwáqá uyátárai-nakoma tiráátinikaa-umá keráwáqtí iyápóma yiráátero. Yemá táwî-otaama kéguiyamma yemmá táí-meyamma yímero. Keráwáqá mirámô-éqa yemmá anaúrakaq mamá yiráátimayikanowe. ⁵ Kayóq-wáyúkáma, keráwáqtí kawáá wáyúkátí yáama wáráaro. Tirukaké yáama yaaguyaqmá wáráaro. Keráwáqá Îtu Kárísto-kaq mayaí kémayeraq miráráá-umá keráwáqtí kawáá-wáyúkáráq mayaí yikáinaiq-umá íráqôniq-umá máyáaro. ⁶ Móra-nakoma íma yabíkáinaq keráwáqá aati-aatimá íráqô-mayaima máyáaro. ⁷ Keráwáqá paá waayúkayaba yimuqá marakaí-máyáímá íma mayánômanibo uyátárai-nakoqtaba amuqá marakaí-máyáímá máyáaro. ⁸ Taákaq máráaro. Íráqô-tataariq keráwáqá kéomma mimórá yátááqá anónnáma uyátárai-nakono-pake mayánówe. Mamin-áímmá máqte-kayukayabama áraine. Mi-káyóq-wáyúkáwábiyo íma kayóqá máyaa kayukawabiyo, ápéqa mimóráá-áwáátáq mayainowe. ⁹ Keráwáqá kawáá wayukae, keráwáqtí mayaí-wáyúkáyábámá móraiq-umá yabíqyikaaro. Keráwáqá yemmá íma ikatí-áímmá tero. taákaq oro. Uyátárai-nakoma Îtogoma yabíkái-marupaq wemá yeráwáqtí uyátárai-nakaraq keráwáqtí uyátárai-nakaraq mimórá máena wenaúrakaqa paá-wayukagaraq anó-kayukagaraq íma mááe. Ímiye. Máqte-kayukama mimórá-áúyánákáq kéyainaiye. ¹⁰ Keráwáqtí tébakaq-kanaama ma-márábímmô máeqa uyátárai-nakoqtaba akoqnáá-wayukama aúráaro. ¹¹ Keráwáqtí akoqnááma uyátárai-nakonopake máyáaro. Wení akoqnáárake matéqa weyukáá mayéq keráwáqá Sááqtanima makáqma yabitíné-ínnayaba keráwáqá akoqnáá-umá kanaaráq itó-inowe. ¹² Túyánáámmá ítáama-arútáaro. Ketáámá íma waayúkate ááiqa kéunatae. Ketáámá ma-márábímmá anókogaraq yeqtí náápaakaraq kumayupíqtábá ááiqa kéunatae. Ketááí ááiqa waátáma ketúrapike íma kanaaráq káonetaa yetê ááiqa kéunatae. ¹³ Mirá kéibo Îtogo-ní aimma weyukáá mayéraq mi-táwí-kánáámá yínnama keráwáqá imaamu-wáyúkáráá umá kanaaráq itó éq íma yawautínowe. ¹⁴ Miráuma keráwáqá itó-umá imaamu kuyéqa Îtogo-ní árain-aimma tímûranna kuyéq wení arupú-yataaqa títaaraq tiraaqá kuíyana waátá-akoqnaagoma keráwápímmá íma kanaaráq kobérániye. ¹⁵ Mami íráqô-kataama kaayoné-yátááqtábá aítauqo ánáakuyonaikaa-umá mi-kátáámá taákaq máráaro. ¹⁶ Mamirá éq keráwáqtí itáíq-itaiq-umá yáqtorai-yataaqa túbáqá keráwáqtí weyukóráá-umá akoqnáá ínaq itó-oro. Keráwáqtí uyátá-maqma itáíqitaiq-umá yáqtorai-yataaqa Sáátanima uyátanena ínnama aúyaqtikaniye. ¹⁷ Abo áráín-áímmá tiqnókáq kámokaa káberaq Aokaq Á tokóruraa-puma múte yaúyoro. Keráwáqtí tokóruraa-puma minnáe. Îtogo-ní-aama Áánûqtuni Aokaq-Áágómá tímikaiye. ¹⁸ Nunamummá tíq-tiq oro. Nunamummá kéteraq Îtogo-ní Aokaq-Áágómá ayuwáiyana keráwáqá nóin-ainabi tínômma tiráátiniye. Nunamummá kéteraq túbanaaq-umá yokaa-umá máero. Máqtemma itáíq-itaiq kéo-kayukayabagaraq, ¹⁹ keqtábágáráq nunamummá tíq-tiq oro. Kemá tóyauqa ógaraananama Îtogoma árain-aimma arupú-aikaraq timínîqtaba minnáyaba nunamummá tero. Kemá itó-uma waayúkati yúbáq ÁÎtogo-ní aúpáq-yátááqá wení Mesáíya Îtuqtaba tenúnnayaba Îtogo-kaq nunamupí timá áméro. ²⁰ Kemá waayúkati yúbáq kéteq ikatíq íma ónúnnayaba minnáyabagaraq nunamupí tero. Miráráámô Îtu Kárístotaba tiráunabowaq íbêqa kaarabútibi akoqnáá-annanapo (téininapo) atáá umátíkáawaq máune. ²¹ Táikikasi wemá min-áúbá-wánnáámá keráwáqtôpaq maména wíniye. Wemá ketí máqte-tataaqtaba kemô únnayaba móma timá-timiniye. Wemá ketááí íráqô-tibaqawaaraa-naqa máena wení mayaíráq uyátárai-nakoqtaba yáqtoqma akoqnáá kéiye. Wemá máqte-qtataaqa maabáq wái-qtataaqtaba timá-timiniye. ²² Keráwáqá keqtááyábá itánôqtaba keráwáqtí tíyaqa-umá tíqtaaiq ínîqtaba wemmá timákaraune. ²³ Mami kaayoné-yátáákáráq akaí-yátáákáráq ketibotáá Îtogo-yaa uyátárai-naqa Îtu Kárístogaraq yeqtôpake kéitaq keráwáqá mayaígáae téq kétune. Keráwáqtábá itáíqitaiq-umá yáqtorai-yataakaraq ketááí máqte-tibaqawaaraa-kayukagaraq mayaígáae téq kétune. ²⁴ Keráwáqá keráwáqtí akaí-yátááqá uyátárai-naqa Îtu Káríqtokaq íma aúyatikeq keráwáqá máqtemma Îtogo-ní íráqô-qtataaqa mayaígáae-téq kágayaune. Kemá Pórowe.