Áaimma
1
Emá Póroma wayúkati yúrakaq itó-uma Îtuqtaba abarokáq timá-yímikaunayababowaq kemá ánná-naupaqa paá máune. Miráimanibo keráwáqá mamirái-tataaqa Îtumma akáinaiq kéiyaq kemá minnáyaba tikaíkáae-téqa kétune.
2
Abo íma otaa-káyúkáráá aúráaro. kaayoné-umá máaro. Yaímma-wayukamo íkarutaiyamma paá yeráwáqá yíkáaro.
3
Keráwáqá kaayoné-yátááqá anónna-anonna yiméra mórabi Îtogo-ní Aokaq-Áágóní aménáápáqá paá máero. Ketáámá mimórá-túyáwáákáráq mimórá-Áókáq-Áágópí kémaunatae. Kímora íma aónarauna-yataaqa awé-ónúnayabataa Îtogo tááyaraiye.
4
Ketáámá mimórá-túyáwáákáráq mimórá-Áókáq-Áágópí kémaunatae. Kímora íma aónarauna-yataaqa awé-ónúnayabataa Îtogo tááyaraiye.
5
Kímora uyátárai-naqa ketáámá matéqtaa ketáámá máqtemma wekáq tirummá kámunatae. ketáámá máqtemma móraiq-umá Îtogo-ní Aokaq-Áágógáráq kéberaunatae.
6
Ketáámá mimórá-kétíbótáá máiye. Wemá Îtogoma máena káqomma akoqnáá-naqa wekáá-umá íma máiye. Wemá uyátá-maqma máqte-tataakaqa máiye. Wemá keqtáábí máipoata káqo-kayukama wení akoqnáágomma ketááí mayaíbí yemá káonae.
7
Îtogoma tirááténataa wemá keqtááyábá ôriq-umá ákáitana Îtu Mésáiyamma tímikaiqtaae.
8
Îtogo-ní aúba-wannaagoma mará kétiye, “Wemá uyéna ánná-naupake-wayukama taígani kuyátúrena wayúkaraq amuq-yatááqá yímikaiye,” Mirá téna Tébitini ibí kétiye.
9
Abo wemá meyábáq utáiye. Min áaimma yaímma-kanaama ma-márábí máqe-uraiye.
10
Min-nákómá kukáimma wemá mimórá-nákómá anaaékaqa utáiye. wení náápaamma ma-márábí-káyúkámá yiráátiniqtaba wemá utáiye.
11
Wemá wenamáárîq téna, “Keráwápíké yaímmama timáyíkarai-kayukama maíyata abo yaímmama Îtogo-ní amuné-wáyúkámá maíyata, yaímma uréire kéeta monoqá tí-wayukama maíyata, yaímma wayúkati yúrakaq itó-uma máeta átê-wataama tínô-kayukama maíyata, yaímmama ámaan-aimma yirááti-wayukama maíyata ínowe,” téna tiráiye.
12
Wayúkama yokaa-umáyikai aimma uyátárai-nakoqtaba mirá-umatikanowe. Mami-máyáímá nóinabiyo? Mi-máyáímá minnáe. Îtu Káríqtokaq yirummá améta taígani-kayukama kuyátúmeta yíwáqnaa-umá yeqtí itáíq-itaiq í-yátááqá akoqnáá umáyikanoe.
13
Mami yirááti-wayukati watáanapo kétima-timiyanataa Îtogo keqtáámá wen-áanikomma aónayaba tiráátiniye. Wekáq ketááí itáíq-itaiq í-yátááqtábá yirááti-wayukati watáagoma tíwáqnaa ínîqtaae. Mi-kánáámá ketáámá yagaroqtamá áíkuiyona-yupaama mi táoqa Îtogoma keqtáámá timátimiq-timatimiq-umá kétiraatinanama ketááí tirun-íyápógómá itóqma Îtu Káríqtoni áaimma mayéna anóniq-íniye.
14
Mi táoqa ókaraq iyápóraa ketááí túyánákómá íma wániye. Mi táoqa uwáágoma yaayánama waéráinikaa-umá ketáámá káqo-kaqon-aiqtaba íma waéránátae. Ímiye. Ketááí tirun-íyápógómá itóqma anóniq-ínataa táwî wayukati makáqma aónai-yataakaraq kaaqaari-áíkáráq ketáámá íma itánúnatae.
15
Ímiye. Aaqáo. Miráimanibo ketáámá árain-aimma téqtaa Îtu-ni akaí-yátáákáráq óq-wayukayaba tikánîqtae. Miráinaqtaa ketáámá itóqma Îtun aúyawaakaa onanatáá wemá aqnókáá íniye.
16
Îtuma íbêqa máqtemma wekáq itáíq-itaiq-umá máa kayukama yagaroqtamá wení naúyawaakaa-umá aráápayikanena kéiye. Máqten-aayapaq yabíkéna móra-mora-aukapakemma weqtábá-weqtaba akaíyátábá Îtumma yokaa kéumakaae.
17
Íbêqa akoqnáá-umá uyátárai-nakonopake timá-timune. Keráwáqá Yéntairiq wayukaraa-umá yeqtí aíbôq-yuyanakaraq íma máaro.
18
Yeqtí yúyánámmá paá kumayupí wáiye. Yemá koáráaq-wayukaboata Îtogo-nopake nékaq mááe.
19
Yeráwáqá máqte-tawi-kiyaamoq-yataaqa tarôq kéeta minnáyaba íma yigaaebí kémaraae.
20
Maamirá-qtátáákáá-qtátááqá Îtuma Mesáíyama we-nôpake keráwáqá íma ítaraae.
21
Ímiye. Keráwáqá Îtun-aama kéitaawana wemá árain-iraqo-tataaqa keráwáqá tiráátiraiye.
22
Keráwáqtí naayón-ááímmá keráwáqtí túgoma ákáin-aaikaraq naayó-pááí-únákáqtóráá-umá tiwáábáq kabiraimmá mamirán-ááímmá keráwáqá paábaq matúwáaro.
23
Minnámo matuwéqa aúgen-unakaqtoraaumá aúge-tuyanakaraq aúgen-aaikaraq kúberaaro.
24
Mirámô-éqa káqomma íráqô kanokaa-umá kúberanowe. Aúgemma káqo-naqa aúqma keráwáqtí táaimma aokarîq-umá kateko-umá Îtogo-ní-aaikoraa-umá waíno.
25
Miráinaqa kaaqaari-áímmá ítero. Aati-aatimá pááqínî-qtataaqtaba árain-aimma tero. Ketáámá mimórá-túgóní wayúkabowaqtaa wenamí-kenamin-umá paá árain-aiqtaa tennatao.
26
Abo keráwáqá tíyámma ínaqa íma kúmiq yataariq-oro. Abo íma tíyámma yuwákaiyana waíno, Ímiye. Mimórá-yúpáámá aabaúmá íma kupékainaqa
27
Abo tíyámmo íqi kéiyanamoena Sááqtanima tirunóbáqá yaberániye.
28
Keráwáqtí aúkáapike móra-nakoma moyá-nákómá máqe-urenama íma ókaraq moyámmá mayaíno. Íma miráinimanibo wemá mayaí ko mayaíno. Wení ápéqtaba kamáa káena mayaí kémayena anaaékaqa móra-yataaqa íma makáiya-kayukama yemmá kanaaráq yíwáqnaa íno.
29
Tóyaupike táwî-aimma íma yuwákéraq tero. Miráimanibo paá mi-kátáámá wayúkama umá-yíqtaaiq ínîn-aimma tíyana keráwáqtí táagoma yemmá íráqôniq-umáyikaniye.
30
Îtogo-ní Aokaq-Áágómmá ummaa-yátááqá íma áméro. Keráwáqtí matúqmatuq-umá táí-meyakaraq puí-yátáákáráq mipíkémma keráwáqá Îtogoma tiwíkaitana wení Aokaq-Áágómá keráwáqtí tiwiraí-yátáákómmá káraapaiye.
31
Táwî-toiqa makéq máqten-aimma temmá paábaq iyaabótúwáaro. Íma tíyan-aimma aayaqtáá-umá-téraq káqo kayukayaba mamá táíq-umáyikai tuyanamma íma ítáaro.
32
Anónna-anonna-umá íráqôniq-oro. Anónna-anonna tíyaqa áméro. Abo taákaq-oro. Îtuni áwîkaq Îtogoma keráwáqtí otaammá paábaq matukáiqtaba keráwáqá miráráá-umá anónna-anonna otaammá paábaq matúwáaro.