¹ Sapos ol i stretim wanpela man planti taim tasol em i no harim tok, orait em bai i bagarap wantu tasol na i nogat rot bilong helpim em. ² Taim ol stretpela manmeri i daunim pasin nogut bai ol manmeri i amamas na taim wanpela man nogut i kamap lida ol manmeri bai i bagarap. ³ Man i save laikim gutpela tingting i save mekim papa bilong em i amamas, tasol man i save raun wantaim ol pamuk meri i save pinisim mani bilong em. ⁴ Long stretpela pasin king bai lukautim kantri bilong em gut na sapos em i tingting long kisim mani bilong ol manmeri bai kantri i bagarap. ⁵ Man i grisim wantok bilong em i olsem em i putim umben long lek bilong em yet. ⁶ Sin bilong wanpela man nogut i olsem wanpela umben, tasol stretpela man i save singsing na amamas. ⁷ Stretpela man i save long hevi bilong ol rabis man, tasol ol man nogut i no save long dispela. ⁸ Ol bikhet man i save mekim ol man i belhat, tasol ol man i gat gutpela save i save mekim belhat i kamapim bel isi gen. ⁹ Taim man i gat gutpela tingting i kotim man i nogat gutpela tingting, em i save belhat na kros na i nogat malolo bilong em. ¹⁰ Man i save kilim narapela man i dai i no save laikim tru stretpela man na i laik kilim ol i dai. ¹¹ Man i no gat gutpela tingting i save soim belhat bilong em ples klia tasol man i gat gutpela tingting i save daunim em yet na i stap bel isi. ¹² Sapos wanpela lida i harim ol tok giaman, olgeta wokman bilong em bai i kamap ol wokman nogut. ¹³ God Yawe i wokim ai bilong rabisman na man i save daunim ol arapela man. ¹⁴ Sapos king i skelim stret kot bilong ol rabis man orait ol lain bilong em bai i stap king oltaim. ¹⁵ Sapos pikinini i ranawe taim yu laik stretim em na givim kanda, em bai mekim mama bilong em i sem. ¹⁶ Taim ol man nogut i bosim kantri bai pasin nogut i kamap bikpela, tasol ol stretpela man bai i lukim ol man nogut i pundaun. ¹⁷ Stretim pikininin man bilong yu na em bai mekim yu i stap gut na bai yu amamas. ¹⁸ Taim i nogat tok profet ol man bai i mekim kainkain pasin nambaut, tasol man i bihainim lo bilong God em i ken amamas. ¹⁹ Sapos yu toktok tasol long wokboi bilong yu, em bai harim, tasol em bai i no inap bihainim. ²⁰ Yu lukim man i no save tingting gut na i hariap long toktok? Man i nogat gutpela tingting i winim dispela kain man. ²¹ Sapos yu mekim gut long wokboi bilong yu taim em i stap liklik yet, long taim bihain em bai givim hevi long yu. ²² Man bilong kros na belhat i save mekim planti sin. ²³ Sapos man i apim em yet ol bai daunim em, tasol man i daunim em yet em bai i kisim biknem. ²⁴ Man i helpim ol stilman na i no tokaut long dispela pasin nogut bilong ol, i olsem em i birua long em yet. ²⁵ Pasin bilong pret long man i olsem umben, tasol man i bilip long God Yawe bai i stap gut. ²⁶ Planti lain i save bihainim lida long kisim helpim. God Yawe tasol inap skelim tok stret na helpim ol. ²⁷ Ol stretpela man i no laikim ol man bilong giaman na ol man nogut i no laik long bihainim stretpela pasin.