¹ Pikinini bilong mi, sapos yu harim gut tok bilong mi na putim gut long tingting bilong yu, ² orait yu mas putim yau bilong yu na harim gut olgeta tok i save givim yu gutpela tingting na kisim gutpela save long bel bilong yu. ³ Sapos yu laik kisim gutpela save na yu krai bikpela, ⁴ Orait yu mas wok hat long painim gutpela tingitng olsem man i save painim silva ol i haitim o olsem man i painim mani samting ol i haitim, ⁵ orait bai yu save long stap aninit long God Yawe na bai yu save gut long God. ⁶ Na God Yawe i save givim gutpela tingting na save long maus bilong em yet. ⁷ Em i pulapim tru gutpela tingting bilong ol man husat ol i painim em na em i save lukautim ol na ol i no inap bagarap, ⁸ em i save lukautim rot bilong ol man husat i mekim stretpela pasin na em i save was long ol man i bihainim em. ⁹ Na bai yu save long olgeta stretpela pasin na bai yu wokabaut long gutpela rot. ¹⁰ Gutpela tingting bai i kam insait long bel bilong yu na gutpela save bai i kam long laip bilong yu. ¹¹ Gutpela tingting bai banisim yu na gutpela save bai was long yu. ¹² Ol bai i helpim yu long rot bilong bagarap na long ol man bilong mekim tok nogut, ¹³ husat i no bihainim stretpela rot na wokabaut long tudak pasin. ¹⁴ Ol i save amamas taim ol i mekim kainkain pasin nogut, olsem na ol i save amamas tru long ol pasin nogut na i no save laik long bihainim stretpela pasin, ¹⁵ Ol i save bihainim rot i no gutpela na giamanim ol, ol i haitim rot bilong ol. ¹⁶ Gutpela tingting bai i helpim yu long abrusim ol pamuk meri long ol kainkain tok nogut bilong ol. ¹⁷ Dispela meri i lusim ol wanlain bilong em long taim bilong yanpela bilong em na em i lusim tingting long tok promis bilong God. ¹⁸ Haus bilong dispela meri i soim rot i go long dai na rot i go long ol lain i stap long matmat. ¹⁹ Husat ol lain i save bihainim em i go, ol i no inap kam bek na ol i no inap painim rot bilong kisim laip. ²⁰ Na bai yupela i wokabaut insait long ol gutpela manmeri na bihainim rot bilong ol stretpela manmeri. ²¹ Ol lain husat i bihainim stretpela pasin bai i stap gut oltaim oltaim na ol lain wantaim stretpela pasin bai i stap longpela taim long graun. ²² Tasol, ol man nogut bai i no inap i stap long graun na ol man i no bilip bai i lus.