¹ Gutpela sindaun stori bilong Solomon pikinini man bilong Devit, king bilong ol Israel. ² Ol dispela gutpela sindaun stori em bilong lainim na save long ol gutpela tingting na lainim long kisim gutpela tingting long ol samting i stap hait, ³ olsem na yupela i ken kisim tok banis bilong mekim gutpela pasin em i stret na yupla bai stap gut. ⁴ Dispela ol gutpela sindaun stori tu i ken givim gutpela tingting long ol man i nogat gutpela tingting na long givim save na stap olsem tok banis bilong ol yanpela manmeri. ⁵ Larim ol man husat i gat gutpela tingting i harim na kisim gutpela save na larim ol man husat inap long lukluk long tingting na skelim i ken kisim tok banis, ⁶ long kisim tingting long gutpela sindaun na bai save long tok na ol toktok bilong ol saveman na ol tok bokis bilong ol. ⁷ Pasin bilong pret long God Yawe em i stat bilong kisim save, ol bikhet man i save givim baksait long pasin bilong gutpela sindaun taim ol i laik stretim ol. ⁸ Pikinini man bilong mi, harim gut taim papa i skulim yu noken sakim tok bilong mama bilong yu taim em i laik lainim yu, ⁹ ol bai kamap olsem gutpela bilas long het bilong yu na nekles i raunim nek bilong yu. ¹⁰ Pikinini man bilong mi, sapos ol man bilong mekim sin i grisim yu, yu mas tok nogat long bihainim ol. ¹¹ Sapos ol i tok, "Kam wantaim mipela, yumi slip na weit long kilim ol man, yumi hait na kilim ol man i nogat asua. ¹² Yumi bai planim ol taim ol i no dai yet, wankain olsem dai i kisim ol man i nogat sik, mekim ol olsem ol lain husat i pundaun insait long hul. ¹³ Yumi bai painim ol kain kain samting i dia tumas, yumi pulapim haus bilong mipela wantaim ol samting yumi bin stilim long ol narapela lain. ¹⁴ Yupela pilai satu wantaim mipela na yumi i ken skelim olgeta samting namel long yumi yet." ¹⁵ Pikinini man bilong mi, yu noken wokabaut i go daun wantaim ol, yu noken larim lek bilong yu i wokabaut i go long rot bilong ol, ¹⁶ lek bilong ol i ran i go long pasin nogut na hariap tru long kapsaitim blut. ¹⁷ Long wanem em i no gutpela long putim umben taim ol pisin i lukluk i stap. ¹⁸ Dispela ol man i slip na weit long kisim blut bilong ol yet, ol i putim umben bilong kisim laip bilong ol yet. ¹⁹ Dispela em i pasin bilong olgeta man husat i kisim ol samting long rot nogut, pasin bilong kisim ol samting long rot nogut em i rausim laip bilong ol man husat i holim i stap. ²⁰ Gutpela tingting i singaut i stap long bikpela rot, nek bilong em i go antap long ol ples bung, ²¹ long het bilong bikpela rot i gat planti nois em i singaut i go, insait long ol geit bilong taun em i mekim toktok bilong em. ²² "Hamas taim yupela ol man bilong toktok nabaut, i wok long mekim toktok i no stret? Hamas taim, yupela ol man tokbek bai yupela amamas long mekim tokbek na hamas taim yupela ol bikhet man, yupela bai i no laikim save? ²³ Putim yau gut taim mi stretim yu, mi bai kamautim ol tingting bilong mi i go long yupela na mi bai mekim ol toktok bilong mi i go bilong yupela i ken save. ²⁴ Mi bin singaut na yupela i no laik harim, mi putim han bilong mi i go aut long yupela tasol, i no bin gat wanpela man i stap long kisim. ²⁵ Tasol yupela i bin sakim olgeta tok mi bin tokim yupela na i no bihainim tok bilong mi taim mi stretim yupela. ²⁶ Mi bai lap long yupela taim bikpela hevi i kisim yupela na mi bai lap long yupela taim bikpela hevi i kam, ²⁷ taim bikpela pret i kam olsem bikpela win na bagarap i karamapim yupela olsem raunwin na taim pen o sori na pen long bodi o tingting kam antap long yu. ²⁸ Na ol bai i singaut long mi na mi no inap bekim ol, ol bai laikim tru long lukim mi tasol ol i no inap painim mi. ²⁹ Long wanem ol i les long gutpela tingting na ol i laik long bihainim pasin bilong pret long God Yawe, ³⁰ ol i no inap bihainim toktok bilong mi na ol i no laikim mi stretim ol. ³¹ Ol bai kaikai frut bilong pasin bilong ol yet wantaim frut ol yet bungim na kamapim long en ol bai i pulap. ³² Long wanem ol man i no save tok stret bai ol i dai long taim ol givim baksait na ol pasin bilong nogat laikim long ol man, em ol bikhet man bai i bagarapim ol. ³³ Tasol husat ol man i harim tok bilong mi bai i stap gut na kisim malolo gut na ol i no inap pret long kisim bagarap."