¹ Long namba wan mun olgeta manmeri bilong Israel na olgeta kominiiti i go kamap long ples drai bilong Zin na ol i stap long Kades. Long dispela ples Miriam i dai na ol i planim em. ² Long dispela ples i no gat wara bilong ol manmeri long dring, olsem na olgeta manmeri bilong kominiti i bung na i tok kros long Moses na Aron. ³ Ol manmeri i tok pait long Moses na ol i tok, ''Em bai i gutpela sapos yumi bin dai taim ol wantok bilong mipela ol Israel i dai long pes bilong God Yawe! ⁴ Bilong wanem yu kisim mipela manmeri bilong God Yawe wantaim ol abus bilong mipela long dai hia long ples drai? ⁵ Bilong wanem yu mekim mipela i lusim Isip na kam aut na kam long kain ples nogut? Long dispela ples i no gat sid long planim, diwai fik, diwai wain na i no gat ol gutpela pikinini diwai na i no gat wara bilong dring.'' ⁶ Orait Moses na Aron i lusim dispela ples ol manmeri i bung i stap. Tupela i go long dua bilong haus sel, na brukim skru na putim pes i go daun. Bikpela strongpela lait bilong God Yawe i kamap long tupela. ⁷ God Yawe i tokim Moses na i tok , ⁸ '' Kisim wokabaut stik bilong yu na bungim ol manmeri, yu na Aron brata bilong yu. Taim ol man meri i lukluk yet, tokim ston long larim wara i kam aut. Yu bai kamapim wara bilong ol komuniti long dring long dispela ston na yu mas givim long ol manmeri na ol animol bilong ol long dring.' ⁹ Orait Moses i kisim stik na mekim olsem, God Yawe i bin tokim em. ¹⁰ Moses na Aron i bungim olgeta manmeri klostu long ston na Moses i tokim ol, '' Harim yupela manmeri bilong sakim tok. Ating bai yumi kisim dispela wara long ston, a?" ¹¹ Orait Moses i apim han bilong em na paitim ston tupela taim wantaim stik bilong em na planti wara i kam aut. Olgeta manmeri i dring na ol bulmakau na sipsip tu i dring. ¹² Bihain God Yawe i tokim Moses na Aron, ''Bilong wanem yutupela i no bilipim mi na givim biknem long mi olsem, em i holi long ai bilong ol manmeri bilong Israel, yutupela bai i no inap kisim ol i go insait long graun, mi bin givim ol.'' ¹³ Dispela ples ol i kolim wara bilong Meriba long wanem ol Israel i bin tok pait wantaim God Yawe na em i bin soim em yet long ol olsem em i holi. ¹⁴ Moses i salim tok i go long king bilong Idom long Kades. Brata bilong yu Israel i tok olsem, '' Yu save pinis long olgeta hevi i kamap long mipela. ¹⁵ Yu save olsem ol tumbuna bilong mipela i bin go daun long Isip na stap longpela taim long Isip. Ol manmeri long Isip i bin mekim pasin nogut tru long mipela na tu long ol lain tumbuna bilong mipela. ¹⁶ Taim mipela i singaut long God Yawe, em i harim singaut bilong mipela na salim ensel i kam na kisim mipela i kam aut long Isip. Lukim, mipela i stap long Kades, bikpela taun i stap long mak bilong graun bilong yu. ¹⁷ Mi askim yu long larim mipela i go olsem long graun bilong yu. Mipela bai i no inap go long gaden wit o long gaden wain na tu mipela ino inap dring long hul wara bilong yupela. Mipela bai i go stret long bikrot bilong king tasol, mipela ino inap tanim long sait long han sut na long han kais inap mipela i go na abrusim mak.'' ¹⁸ Tasol king bilong Idom i bekim tok bilong Moses olsem, ''Yu no inap kam olsem long hia. Sapos yu kam, mi bai kam wantaim bainat long pait wantaim yu.'' ¹⁹ Na ol Israel i tokim em olsem, ''Mipela bai i go long bikrot tasol. Sapos ol animal i dringim wara bilong yupela, bai mipela i baim. Inap yu larim mipela i wokabaut tasol long lek nating na i no inap mekim narapela samting. ²⁰ Tasol king bilong Idom i bekim tok olsem, ''Yupela bai i no inap kam i go,'' Olsem na king bilong Idom i kisim ol soldia wantaim strongpela han bilong em na i kam tok pait wantaim ol Israel. ²¹ King bilong Idom i tok nogat na i no larim ol Israel i abrusim mak bilong ol, olsem na long dispela as ol Israel i tanim bek na lusim graun bilong Idom. ²² Olsem na olgeta manmeri i wokabaut lusim Kades. Ol kominiti na olgeta lain manmeri i kamap long Maunten Hor. ²³ God Yawe i toktok long Moses na Aron long Maunten Hor, long mak bilong graun long Idom. Em i tok, ²⁴ '' Aron i mas bungim ol lain manmeri bilong em, bilong wanem em bai i no inap i go insait long graun, mi bin givim long ol manmeri bilong Israel. Dispela em i olsem, yutupela Moses i bin sakim tok bilong mi long wara Meriba ²⁵ Kisim Aron na Eliasa pikinini man bilong em na kisim tupela i go antap long Maunten Hor. ²⁶ Rausim ol wok pris klos long bodi bilong Aron na putim antap long Eliasa pikinini man bilong em. Aron i mas dai na bungim ol lain manmeri bilong em long hap." ²⁷ Moses i mekim olgeta samting olsem God Yawe i tokim em. Ol i go antap long Maunten Hor taim ol Israel i bung na lukluk yet. ²⁸ Moses i rausim wok klos bilong Aron na putim antap long Eliasa pikinini man bilong em. Aron i dai antap long het bilong Mauten Hor. Bihain Moses na Eliasa i kam daun. ²⁹ Taim olgeta manmeri i lukim olsem Aron i dai pinis, orait olgeta Israel i krai sori long Aron inap long 30pela de.