¹ Nau harim wanem God Yawe i tok, "Kirap na tokim ol maunten olsem, larim ol liklik maunten i harim tok bilong yu. ² Harim kot bilong God Yawe, yupela ol maunten, yupela i karim as bilong graun. Long wanem God Yawe i gat kot wantaim ol manmeri bilong em na em bai tok pait long kot ol Israel." ³ "Ol manmeri bilong mi, mi mekim wanem long yupela? Long wanem rot mi mekim yu wari? Tokaut long mi nau! ⁴ Mi kisim yupela i kamaut long graun bilong Isip na rausim yupela long kalabus. Mi salim Moses, Aron na Miriam i go long yupela. ⁵ Manmeri bilong mi, tingim tasol dispela samting Balak king bilong ol Moap i bin askim long mekim na Balam pikinini man bilong Beo i bekim tok bilong em taim yupela i go olsem long Sitim na i go long Gilgal, olsem na yupela inap save long stretpela pasin bilong God Yawe." ⁶ Bai mi kisim wanem samting i kam long God Yawe, long taim mi brukim skru long God antap tru? Bai mi kisim ofa bilong paia i kukim olgeta wantaim yangpela bulmakau i gat wanpela krismas? ⁷ Na yu ting God Yawe bai i amamas long 1000 man sipsip, o wantaim 10 000 wara bilong oil? Ating bai mi givim namba wan pikinini bilong mi long asua bilong mi, dispela pikinini kamap long bodi bilong mi long bekim asua mi mekim? ⁸ Em i tokim yu olsem, man, wanem pasin i gutpela na God Yawe i askim long yu. Mekim pasin i stret, pasin bilong laikim wantaim givim bel, daunim yu yet long bihainim God. ⁹ Singaut bilong God Yawe i tokaut long ol biktaun, maski nau gutpela save i givim biknem long yupela. " Putim ai na harim gut ol birua na ol lain husait i stap wantaim, long dispela ples. ¹⁰ I gat ol gutpela samting i stap long haus bilong ol bikhet man i no stret na giaman i pulap i save bagarapim ol. ¹¹ Ating mi inap lukim wanpela man olsem man i nogat asua sapos em i giaman long planti samting i stap long bel bilong en i givim hevi a? ¹² Ol man i gat planti mani i pulap long hevi, ol manmeri i mekim planti giaman toktok long maus bilong ol i pulap long tok giaman. ¹³ Long dispela as tasol, mi bai larim bikpela hevi i kam long yupela na mekim yupela i wari na sori long asua bilong yupela. ¹⁴ Yupela bai kaikai tasol i no inap pulap na yupela bai i stap hangre olsem yet. Yupela bai i bungim planti ol gutpela samting tasol em bai i no inap stap gut, Na wanem samting yupela i bungim, mi bai givim i go long ol birua. ¹⁵ Yupela bai planim kaikai tasol i no inap kisim wanpela kaikai. Yupela bai krungutim oliv tasol yupela bai i no inap rabim long skin bilong yupela na yupela bai krungutim prut bilong wain tasol yupela bai i no inap dring. ¹⁶ Lo bilong Omri yupela i bihainim, Yupela bihainim olgeta pasin bilong ol lain bilong Ahap. Na yupela i bihainim olgeta tingting nogut ol i givim yupela. Olsem na bai mi bagarapim biktaun na olgeta samting bilong yupela ol manmeri bilong mi yet."