¹ Sori long mi! Mi kamap olsem ol pikinini diwai ol save bungim bungim long taim bilong san na wankain olsem pikinini bilong diwai wain ol bin bungim, i no gat hanwain na diwai fig i redi long kaikai na inapim laik bilong mi. ² Ol bilipman i lus nating long graun, namel long olgeta lain i no gat wanpela man i stap stret. Olgeta lain i redi long kapsaitim blut na ol yet i painim rot long mekim nogut long ol brata bilong ol. ³ Han bilong ol i save gut tru long mekim nogut, ol bos man askim long mani na man bilong skelim kot i askim ol long givim mani bilong grisim ol, man i gat biknem tokim ol narapela long wanem samting em i laik kisim. Olsem na olgeta i mekim plen wantaim. ⁴ Ol gutpela man namel long ol i kamap wankain olsem diwai i gat planti nil na pasin bilong ol stretpela lain i winim gras nogut. Dispela em dei we ol was man i bin tok pinis olsem taim bilong mekim save bai kamap. Nau em i taim bilong ol long faul i stap. ⁵ No ken bilip long ol man i stap klostu long yu na ol wantok. Yu mas tingting gut long wanem toktok yu mekim, maski sapos em meri i silip wantaim yu long han bilong yu. ⁶ Olsem na pikinini man bai i no inap onarim papa bilong em, pikinini meri bai birua long mama bilong em na meri bilong pikinini man bai birua wantaim tambu meri bilong em. Ol birua bilong yu em ol lain long haus bilong yu. ⁷ Tasol long mi yet, mi bai lukluk long God Yawe. Mi bai wetim God long kisim bek mi. Na God bilong mi bai harim mi. ⁸ Noken amamas long mi, ol birua bilong mi. Bihain long mi pundaun bai mi kirap. Taim mi stap long tudak God Yawe bai kamap lait bilong mi. ⁹ Long wanem mi bin mekim sin long God Yawe na belhat bilong God bai i stap long mi na bai mi sanap long kot. Em bai kisim mi i go long lait, mi bai lukluk i stap na em bai rausim mi long dispela kot. ¹⁰ Nau birua bilong mi bai lukim na sem bai karamapim dispela man husait i tok bilas olsem "Yawe God bilong yupela i stap we? Mi bai lukluk stap na ol bai kurungutim em olsem graun malumalum long rot. ¹¹ Dei bilong wokim banis bai kam, long dispela dei ol bai surukim mak i longwe stret. ¹² Long dispela dei ol lain bilong yu bai kam long Asaria na long biktaun bilong Isip na i go long wara, nambis na maunten. ¹³ Dispela graun bai i bagarap long dispela kain manmeri i stap long hap, hevi i kam bihainim pasin nogut bilong ol. ¹⁴ Lukautim ol lain manmeri bilong yu wantaim stik bilong wasman. em ol i sipsip bilong yu stret, ol i stap ol yet long bikbus long ples maunten. Larim ol kaikai gras long Basan na Giled olsem bipo. ¹⁵ Wankain olsem long dei, yu bin kam aut long graun bilong Isip, Mi bai soim yupela ol nupela samting. ¹⁶ Ol dispela kantri bai lukim na sem long pawa bilong ol. Ol bai putim han long maus bilong ol na iau bilong ol bai i pas. ¹⁷ Ol bai rapim tang long das olsem snek na olsem ol binatang i save wokabaut long bel bilong ol long graun. Ol bai kam aut long ples hait bilong ol wantaim pret. Ol bai pret na kam long yu, God Yawe, yu God bilong mipela. Ol i pret long yu tasol. ¹⁸ Husait God em i wankain olsem yu, husait i save rausim sin, husait i no luksave tumas long sin bilong ol liklikl hap lain bilong em i bin stap yet. Em i no holim belhat bilong em oltaim, long wanem em save amamas long holim tru stretpela pasin bilong kontrak. ¹⁹ Yu bai sori gen long mipela na larim mipela i stap aninit long lek bilong yu. Rausim ol sin bilong mipela i go daun tru long solwara. ²⁰ Yu bai givim tok tru long Jekob na kontrak bilong bilip long Abram olsem yu bin tok promis long ol tumbuna bilong mipela long taim bipo.