¹ Dispela tok em i God Yawe i tokaut long maus bilong profet Jeremaia na i tok long graun bilong Kalda i stap long Babilon. ² "Toksave long ol man i stap long dispela kantri i mas harim. Putim wanpela mak i go antap na tokim ol man long harim. Yu noken kisim bek na tokaut olsem Babilon i kisim, god giaman bilong ol i sem. Ol i putim Maduk i kamap ples klia na ol giaman god i sem na ol piksa bilong em ol i stap ples klia. ³ Wanpela Kantri long not bai i kam pait wantaim Babilon. Ol bai bagarapim olgeta man na wel animol wantaim olgeta samting i stap long en na i no gat wanpela samting bai i stap long dispela ples. ⁴ God Yawe i tok. Taim dispela dei i kamap, Ol manmeri bilong Israel na Juda bai kam bung na go wantaim krai na painim God Yawe God bilong ol. ⁵ Ol bai askim na bihainim rot i go long Saion na ol bai i tok olsem, mipela i mas go bek long God Yawe na mekim strongpela kontrak bilong mipela i no ken lus tinting long bihainim em. ⁶ Ol manmeri bilong mi i stap olsem ol lus sipsip. Ol wasman bilong ol sipsip i kisim ol i go longwe long ples mauten; Ol i save kisim ol i go raun long ol maunten ples tasol. Taim ol i go, ol i lus tinting long ples ol i bin stap long en. ⁷ Ol birua bilong ol i bagarapim ol na i tok, mipela i no mekim asua long bagarapim ol. Ol yet i mekim pasin nogut long God Yawe bilong ol. Dispela God Yawe husat ol tumbuna bilong ol i save bilip long en. ⁸ Lusim Babilon na kisim ol manmeri bilong mi i go aut long graun bilong Kaldia olsem ol man meme i save i go pas na ol arapela meme i save bihainim i go. ⁹ Harim, mi bai kamapim ol strongpela kauntri long not long pait wantaim Babilon na kisim em. Ol bai i pait olsem ol man i gat save long pait wantaim spia na i no save kam han natin. ¹⁰ God Yawe i tok. Bikpela bagarap bai i kamap long Kaldia na ol man bai kisim olgeta samting bilong ol. ¹¹ Yupela i mas amamas na kisim wantaim strong bilong yupela ol samting bilong em, olsem na yupela i pulap wantam amamas, yupela i olsem ol pikinini hos i save singaut na kalap taim ol i raun long gutpela gras. ¹² Ol manmeri bilong Babilon bai i no gat amamas na ol bai i sem. Ples bilong ol bai i drai na bagarap na ol man long narapela ples bai i no inap laikim ples bilong ol. ¹³ Long belhat bilong God Yawe tasol, Babilon bai i no inap stap gut, bikpela bagarap bai i kamap, olgeta manmeri husat i abrusim Babilon bai i gat pret long lukim ol dispela bagarap i bin kamap. ¹⁴ Ol i mekim pasin nogut long God Yawe olsem na em bai mekim ol manmeri long taitim bunara na pait wantaim Babilon. Yu no ken larim wanpela i stap bilong wanem ol i mekim sin long God Yawe. ¹⁵ Kirap na mekim singaut bilong pait long Babilon na em bai givim em yet long yu. Ol tawa na ol banis bilong em bai i bruk na God Yawe bai bagarapim olgeta samting bilong ol olsem ol i bin mekim long yupela. ¹⁶ Bai mi bagarapim ol man bilong planim kaikai na ol man bilong bungim kaikai long Babilon. Ol bai pret long bainat na wanwan man bai i givim baksait long ol lain manmeri bilong ol na ranawe i go bek long ples bilong ol yet. ¹⁷ Israel i olsem wanpela sipsip ol laion i holim na kisim i go. King bilong Asiria i bin kam pas na bagarapim ol na bihain Nebukadnesar king bilong ol Babilon i bin brukim bun bilong ol. ¹⁸ Harim gut, God Yawe bilong ol Israel i tok. Mi wok long tinting long mekim save long king bilong ol Babilon na graun bilong em i olsem mi bin mekim long king bilong Asiria. ¹⁹ Mi bai kisim ol Israel i go bek long graun tru bilong ol. Mi bai givim gutpela ples bilong kamapim kaikai i stap long Karmel na Basan. Ol bai i pulap long kaikai na inap tru long maunten bilong Efraim na Gilead. ²⁰ God Yawe i tok. Long dispela taim, mi bai traim long painim aut ol pasin nogut bilong ol Israel na Juda tasol mi no inap painim na mi bai lusim rong bilong ol na mekim gut long ol liklik hap lain". ²¹ God Yawe i tok. Yu mas mekim olgeta samting bihainim wanem mi tokim yu. Mi bai mekim ol birua bilong ol i holim bainat long bagarapim ol. Ol bai bagarapim olgeta samting na pait wantaim Merataim na Pekot. ²² Mekim bikpela nois na singaut bilong ples pait na soim olsem bikpela bagarap i kamap long graun. ²³ Strongpela kantri Babilon bai i bagarap na i no inap stap gut. Ples bilong Babilon bai i drai na kamap ples nogut namel long ol narapela manmeri. ²⁴ Mi putim was long yu na kisim yu Babilon na yu no save long dispela. Mi painim yu na holim yu olsem kalabus bilong wanem yu no harim tok bilong God Yawe. ²⁵ God Yawe i laik bagarapim Kaldia olsem na em i opim dua bilong haus na kisim olgeta samting bilong pait long soim belhat bilong em long ol manmeri i bikhet. . ²⁶ Ol birua bai kam pait wantaim em long longwe ples, ol bai opim olgeta haus bilong putim kaikai na bungim olgeta wantaim maunten wit na larim em i stap long bagarapim, noken marimari long em. ²⁷ Kisim olgeta ol yangpela bulmakau bilong ol Babilon na kilim ol i dai, em taim bilong ol long kisim hevi. ²⁸ Ol man i stap laip, ol i pret na ranawe long bikpela nois bilong pait i kamap long Babilon. Dispela i soim belhat bilong God Yawe, em i God bilong Saion na i soim belhat long tempol bilong em. ²⁹ Tokim olgeta man bilong pait wantaim spia na bunara i kam pait wantaim Babilon. Kilim olgeta na noken larim wanpela i ranawe. Bekim bek ol pasin em i mekim long yu long bagarapim nem bilong God Yawe, Holi God bilong ol lain Israel. ³⁰ God Yawe i tok, ol bai kilim olgeta yangpela man namel long biktaun na long dispela dei tasol olgeta man bilong pait bai i dai. ³¹ Bikpela God Yawe i tok. Harim, mi stap birua bilong ol man husat i save givim biknem long ol yet. Dei bilong yupela i kamap pinis, long taim bai mi mekim save long yupela. ³² Ol man husat i save litimapim nem bilong ol yet ol bai i pundaun. I no gat wanpela man inap long helpim ol. Mi bai mekim paia long biktaun na em bai kukim olgeta samting i stap raunim em. ³³ Bikpela God Yawe i tok, ol manmeri i daunim ol Israel na Juda. Ol i kalabusim ol na i no laik long larim ol i go fri. ³⁴ Bikpela God Yawe em nem bilong man husat i helpim ol wantaim strong bilong em. Em bai helpim ol long hevi bilong ol na kisim ol i go long graun bilong ol, tasol ol manmeri bilong Babilon bai i no gat ples malolo bilong ol. ³⁵ God Yawe i tokaut olsem, bainat bilong bagarapim ol Kaldia na ol manmeri i stap long Babilon wantaim ol hetman na ol saveman. ³⁶ Bainat bai bagarapim ol man bilong mekim ol toktok nating na ol bai kamap olsem ol longlong lain. Bainat bai bagarapim ol soldia bilong em na ol bai i stap wantaim pret. ³⁷ Bainat bai bagarapim ol hos bilong ol wantaim ol karis na olgeta lain manmeri i stap insait long Babilon na ol bai stap olsem ol meri. Bainat bai bagarapim haus bilong putim ol samting na ol man bai i go insait na kisim ol samting. ³⁸ Graun ol i stap long en bai i drai na bai i nogat wara, long wanem, ol i save lotuim ol god giaman na bihainim ol pasin nogut bilong god giaman. ³⁹ Ol wel animol bilong ples drai, ol wel dog na ol yangpela wel pisin tasol bai i stap long dispela ples oltaim. I no gat gutpela ol samting bai i stap tu. Wanpela lain manmeri i go long narapela lain manmeri ol i no gat wanpela bai i stap long en. ⁴⁰ Wankain olsem God i bin bagarapim Sodom na Gomora na ol ples i stap klostu long ol. I no gat wanpela man o wanpela samting bai i stap long dispela hap, God Yawe i tokaut olsem. ⁴¹ Harim, ol manmeri bai i kam long hap not, em ol bikpela kantri na planti king bai i kamap longwe tru long graun. ⁴² Ol bai kisim ol bunara na spia bilong pait, ol bai i no gat sori long wanpela samting. Ol bai i pait olsem nois bilong solwara i bruk na ol bai ron long hos olsem ol man i stap long bikpela pait long bagarapim ol pikinini meri bilong Babilon. ⁴³ King bilong Babilon i harim ol tok ol i mekim na em i no bel gut, em i pilim hevi olsem meri i laik karim pikinini. ⁴⁴ Harim, em i wokabaut olsem laion i go long Jordan long painim gutpela hap long stap, tasol hariap tru mi mekim ol i ranawe long dispela hap, mi bai makim wanpela man long was long ol. Husat em i olsem mi, na husat bai hariapim mi? Wanem kain wasman bilong sipsip bai inap long rausim mi? ⁴⁵ Orait harim gut wanem tingting, God Yawe i mekim long bagarapim ol Babilon na tu tingting em i gat long bagarapim graun bilong ol Kaldia. Ol bai kisim olgeta samting bilong ol i go wantaim ol liklik lain sipsip. Ol gutpela ples bilong ol long stap bai i tainim na kamap ples nogut. ⁴⁶ Ol manmeri i kirap nogut long bikpela nois bilong bagarap i kamap long Babilon na ol man bilong narapela kantri bai harim singaut bilong ol.