¹ Dispela tok i kam long God Yawe na i go long Jeremaia olsem, taim Nebukadnesa king bilong Babilon wantaim ol ami bilong em na olgeta manmeri bilong graun em i bin bosim, ol i go pait long Jerusalem na olgeta biktaun bilong em,na i tok olsem: ² God Yawe, God bilong Israel i tok olsem, go na toktok long Sedekaia king bilong ol Juda na tokim em olsem, God yawe i tok olsem, Lukim, klostu bai mi givim taun bilomg yu i go long han bilong king bilong Babilon na em bai kukim. ³ Yu bai i no inap ranawe long han bilong em. Ol bai holim pasim yu na putim yu long han bilong em na bai yu sanap long ai bilong king bilong Babilon na em bai toktok stret long yu taim yu go long Babilon. ⁴ God Yawe i tok olsem, Sedekaia king bilong Juda! putim yau gut long tok bilong God Yawe,em i tok olsem, bai yu no inap dai long bainat. ⁵ Yu bai i stap gut tru na dai, olsem ol i save mekim long ol tumbuna bilong yu na ol king bipo, bai ol i kukim bodi bilong yu long paia wantaim ol paura i gat gutpela smel long givim biknem long yu. Ol bai i tok olsem ''O sore bikman!'' Mi God Yawe i mekim dispela tok. ⁶ Olsem na profet Jeremaia i mekim ol dispela tok long Sedekaia king bilong ol Juda long Jerusalem. ⁷ Ol ami bilong king bilong Babilon i kirapim pait long Jerusalem na tupela biktaun bilong Juda, Lakis na Aseka. Dispela tupela biktaun bilong Juda i stap yet olsem biktaun i gat strongpela banis. ⁸ Tok bilong God Yawe i go long Jeremaia bihain long King Sedekaia i bin mekim kontrak wantaim olgeta manmeri bilong Jerusalem olsem, olgeta wok manmeri i ken i stap fri, ⁹ olsem na wanwan man i mas lusim ol Hibru kalabus man na meri i go fri, na i nogat wanpela man bai mekim brata bilong em Hibru i stap wokboi nating. ¹⁰ Olsem na olgeta lida na ol manmeri i wokim kontrak olsem bai ol i lusim ol wokman na wokmeri nating i go na ol i no inap mekim ol i kamap wok manmeri nating gen. Ol i harim dispela tok na lusim ol i go fri. ¹¹ Tasol bihain ol i senisim tingting bilong ol na kisim ol i kam bek na mekim ol i stap wok manmeri nating gen. ¹² Na tok bilong God Yawe i kam long Jeramaia na i tok olsem, ¹³ ''God Yawe, God bilong Israel i tok olsem,' Mi yet mi bin mekim kontrak wantaim ol tumbuna bilong yupela long dispela dei mi bin kisim ol i kam aut long graun bilong Isip na long banis bilong kalabus. Long dispela taim mi tok olsem, ¹⁴ ''Long pinis bilong olgeta 7-pela yia, wanwan man i mas lusim brata bilong em bilong Hibru, husat i bin stap olsem wokboi nating long 6 -pela yia long em i go fri.'' Tasol ol tumbuna bilong yupela i no bin harim gut tok bilong mi o putim yau gut long tok bilong mi. ¹⁵ Na yupela i bin tanim bel na mekim stretpela pasin long ai bilong mi na yupela wanwan i tokaut long lusim ol wantok bilong yupela. Na yupela i wokim kontrak long nem bilong mi insait long haus bilong mi. ¹⁶ Tasol yupela i givim baksait long mi na bagarapim nem bilong mi; na yupela i mekim wanwan man long kisim ol wok manmeri nating bilong ol i kam bek, em ol dispela lain yupela bin salim ol i go. Yupela mekim ol i kamap wok manmeri nating gen. ¹⁷ Na God Yawe i tok olsem, Yupela i no harim tok bilong mi. Bilong wanem na yupela i no lusim ol brata na ol wanlain bilong yupela ol Israel i go fri? Olsem na lukim! Mi tok long bai mi lusim yupela i go. God Yawe i tok olsem, olsem na bai mi larim yupela i go long bainat na long sik nogut na yupela bai sot long kaikai. Bai ol man long olgeta hap graun i lukim wanem samting mi mekim long yupela em i samting nogut tru. ¹⁸ Nau bai mi mekim save long ol manmeri i bin brukim kontrak bilong mi, na ol i no bihainim tok bilong kontrak ol i bin mekim long ai bilong mi taim ol i bin katim bulmakau man long tupela hap na ol i wokabaut namel long en, ¹⁹ olsem na ol lida bilong Juda na Jerusalem na ol man em ol i rausim bol bilong ol na ol pris na olgeta manmeri i wokabaut namel long dispela tupela hap bilong bulmakau. ²⁰ Bai mi putim ol long han bilong birua bilong ol,na long ol man husat i laik kilim ol. Bodi bilong ol bai i kamap kaikai bilong ol pisin bilong skai na ol wel abus bilong graun. ²¹ Bai mi givim Sedekaia king bilong ol Juda wantaim ol hetman bilong em i go long han bilong ol birua na ol lain i wok long painim ol na long han bilong ol ami bilong king bilong Babilon. ²² God Yawe i tok olsem, Lukim, mi laik mekim wanpela tok, i kam bek long dispela biktaun na pait na winim ol na kukim. Bai mi senisim ol biktaun bilong ol Juda olsem ples nogut na em bai i no gat man i stap long en.