¹ "Ol sin bilong ol Juda i stap long bel bilong ol we ol i raitim wantaim sap naip i olsem nus bilong daimon. Ol i katim stret i go insait long bel bilong ol na raitim tu long ol kom bilong alta. ² Na tu ol pikinini bilong ol tu i tingim yet ol alta bilong ol wantaim ol dispela diwai i stap sait, antap long maunten. ³ Maunten bilong mi long olgeta ples na olgeta gutpela mani kago samting bilong yupela bai mi bagarapim na rausim wantaim ol ples bilong lotu long giaman god, bilong wanem yupela mekim planti sin long olgeta hap long Israel. ⁴ Yupela bai lusim olgeta samting mi givim yupela. Na bai yupela i go kalabus long han bilong ol birua long ples longwe hap yupela i no save long en, Long wanem, yupela i laitim paia long belhat bilong mi na dispela paia bai ino inap pinis. ⁵ God Yawe i tok," Husat manmeri i putim bilip bilong em long man nating em bai kisim bel nogut bilong mi bilong wanem ol i mekim man i kamap strong bilong ol na ol i no luksave na givim bel long God Yawe. ⁶ Em bai i olsem liklik sotpela gras i stap long ples Araba na i no inap lukim gutpela samting i kamap. Em bai kisim taim stret long ples nating we i nogat wanpela samting. ⁷ Tasol man husat i putim bilip bilong em long God Yawe, em bai amamas long wanem, God Yawe i stap olsem strong bilong em. ⁸ Em bai i olsem diwai ol i planim arere long wara. Rop bilong en bai i go nambaut arere long wara. Em i no inap long pret long strongpela san taim em i kam, bilong wanem lip bilong diwai em i grin na i stap yet. Dispela diwai bai i no inap pret long traipela san long wanpela krismas na em bai ino inap long stop long karim kaikai. ⁹ Bel bilong ol man i bagarap tru na i winim ol narapela samting. Em i gat bikpela sik, husat tru inap long luksave long dispela? ¹⁰ Mi God Yawe, husat i save sekim tingting na luksave long bel bilong man. Mi givim wanwan man pei long gutpela pasin na stretpela bilip bilong ol. ¹¹ Pisin patris i save brukim kiao we em yet i no karim. Sampela man bai kisim bikpela pei nating long wok ol i no mekim tasol long namel taim olgeta kago bai i lus nating na long arere bilong en em bai kamap man i nogat gutpela tingting. ¹² Ples bilong yumi long lotu em i stap antap tru bipo yet wantaim olgeta strong. ¹³ God Yawe wanpela tasol bai i helpim ol Israel. Husat i lusim yu bai i kisim bikpela sem na husat i stap long graun na givim baksait long yu, em bai i go insait long graun, long wanem ol i no luksave long God Yawe husat i save givim wara i gat laip oltaim. ¹⁴ Mekim mi orait,God Yawe na bai mi kamap orait gen, helpim mi na kisim mi go malolo, long wanem yu tasol kisim bek mi na mi litimapim nem bilong yu wantaim amamas. ¹⁵ Lukim, ol i tokim mi olsem, 'Tok bilong God Yawe i stap long wanem hap? Larim em i kam.' ¹⁶ Long mi, mi i no ranawe long wok yu givim mi olsem wokman bilong lukautim sipsip. Mi i no tingim na wetim ol bikpela hevi bai i bungim mi. Yu save pinis ol tok i kamaut long maus bilong mi. Olgeta toktok mi mekim long ai bilong yu tasol. ¹⁷ Yu noken birua long mi. Yu tasol bai helpim mi long taim nogut. ¹⁸ Ol birua bilong mi bai ol i sem, tasol yu noken mekim mi sem. Larim ol i pret tasol noken mekim mi pret. Salim bikpela bagarap i go long ol na ol i ken kisim bikpela hevi moa yet. ¹⁹ God Yawe i tokim mi olsem,"Go sanap long dua bilong ol manmeri long hap king bilong ol Judah i save i go i kam na olgeta narapela dua bilong biktaun Jerusalem. ²⁰ Tokim ol olsem, 'Harim tok bilong God Yawe, yupela ol king na manmeri bilong Juda na olgeta haus i stap insait long Jerusalem husat i save kam insait long ol geit. ²¹ God Yawe i tok olsem,"Harim gut nogut yu kisim bagarap,no ken karim hevi long dei Sabat na kisim i kam long ol dua bilong Jerusalem. ²² Yu no ken kisim kago i go aut long haus bilong yu long dei Sabat. Tambu tru long wok, larim dei Sabat i stap em yet, olsem mi God Yawe i bin tokim ol tumbuna bilong yupela bipo." ²³ Ol i no harim tok na bihainim, ol i strongim ol yet na les long harim ol stretpela tok mi mekim na bihainim. ²⁴ Em bai i kamap sapos yu harim mi gut na yu i no kisim hevi i kam long dua bilong biktaun long dei Sabat, long wanem em i dei Sabat bilong God Yawe. Tambu tru long mekim wok long dei Sabat. Dispela em i tok bilong God Yawe, ²⁵ olsem na ol king na ol pikinini man bilong ol wantaim ol lain husat bai sindaun long sia king bilong king Davit bai kamap long dua bilong biktaun wantaim amamas long karis na ol hos, ol bai i kam wantaim ol lida bilong ol Juda na olgeta manmeri husat i stap insait long biktaun Jerusalem na olgeta bai i stap oltaim oltaim. ²⁶ Ol bai kam long biktaun bilong Juda na olgeta hap bilong Jerusalem, hap graun bilong Bensamen na long ples tambilo, long maunten, long Negev na ol bai karim ol ofa olsem, ofa bilong kukim na mekim sakrifais, grein ofa, switpela smel ofa na tenkyu ofa i go long haus bilong God Yawe. ²⁷ Tasol sapos yupela i no harim tok bilong mi, long larim dei Sabat i stap em yet na yu sakim tok na karim hevi kago i kam long dua bilong Jerusalem long dei Sabat. Orait, mi bai kirapim paia long dispela dua na em bai kukim na pinisim ol gutpela samting insait long Jerusalem na dispela paia ol man bai i hat tru long kilim i dai."