¹ ''Winim biugel long maus bilong yu! Wanpela tarangau i kam long haus bilong God Yawe, bilong wanem ol manmeri bilong mi i brukim kontrak bilong mi na givim baksait long lo bilong mi. ² Ol i krai long mi olsem, 'God bilong mipela, mipela ol manmeri bilong Israil i save long yu.' ³ Tasol Israil i no laik long mekim gutpela pasin olsem na ol birua bai bihainim em. ⁴ Ol i putim ol king tasol i no long tingting bilong mi. Ol i makim ol pikinini man bilong king tasol i no wantaim save bilong mi. Wantaim ol silva na gol bilong ol, ol i mekim god bilong ol yet, na dispela ol pasin tasol bai ol i kisim bagarap. ⁵ Samaria, mi no laikim ol bulmakau bilong yu. Belhat bilong mi i olsem paia i lait antap long ol dispela manmeri. Hamas taim bai ol i stap wantaim dispela ol pasin nogut? ⁶ Dispela ol god giaman i kam long Israil; em wokman yet i wokim; i no God Yawe,Olsem na god giaman bilong ol Samaria bai bruk i go liklik, liklik. ⁷ Long wanem ol manmeri i planim win na ol i kamaut strongpela win. Wit i sanap i nogat het bilong en, em i no save karim gut kaikai. Sapos em i kamap bikpela, ol man long narapela hap bai bagarapim ol. ⁸ Ol i daunim Israil, olsem na Israil i stap long olgeta hap long kantri olsem samting nogut. ⁹ Ol i go antap long Asiria olsem ol wel donki long laik bilong em yet. Efriam i baim ol man long laik bilong em yet. ¹⁰ Maski taim ol i baim ol man long ol narapela kantri, nau mi bai bungim ol wantaim. Ol bai stat long bagarap, long wanem ol i bihainim pasin nogut bilong ol pikinini man bilong king. ¹¹ Long wanem Efriam i gat planti ol alta bilong mekim ofa bilong sin, tasol ol i kamap olsem alta bilong kamapim ol pasin nogut. ¹² Mi inap long raitim lo bilong mi long helpim ol 10,000 taim, tasol ol bai i lukim olsem samting em i narakain long ol. ¹³ Long ofa ol i mekim olsem ofa long mi, ol i mekim ofa long mit na ol i kaikai, tasol mi God Yawe i no save kisim dispela ofa. Nau mi bai mekim save long ol pasin nogut bilong ol na ol bai i go bek long Isip. ¹⁴ Israil i lusim tingting long mi, man i mekim ol na wokim ol haus king. Juda i mekim strongpela banis long ol biktaun, tasol mi bai salim paia long ol biktaun na em bai bagarapim olgeta samting bilong ol.